Ayaw Limitahe ang Imong Kaugalingon—Pagbuntog sa Pagbating Dili-Takos
1. Nganong ang pipila naglikay sa pagtanyag ug Bible study?
1 Naglikay ka ba sa pagtanyag ug Bible study kay mibati ka nga dili-takos sa pagdumala niana sa epektibong paagi? Ang matinumanong mga alagad sa karaang panahon, sama ni Moises ug Jeremias, may higayong mibati nga dili-takos sa ilang asaynment. (Ex. 3:10, 11; 4:10; Jer. 1:4-6) Busa, ang maong pagbati dili talagsaon. Sa unsang paagi kana mabuntog?
2. Nganong dili angay natong ilimite ang atong ministeryo diha sa pagsangyaw lang sa balay ug balay ug itugyan sa uban ang pag-Bible study?
2 Angay natong hinumdoman nga dili kita sugoon ni Jehova sa pagbuhat sa dili nato maarangan. (Sal. 103:14) Busa kita makatuman sa buluhatong gisugo kanato nga mao ang “paghimog mga tinun-an,” “nga magatudlo kanila.” (Mat. 28:19, 20) Kini usa ka pribilehiyo nga gihatag ni Jehova dili lamang ngadto sa labing eksperyensiyado o labing utokan. (1 Cor. 1:26, 27) Busa, dili nato angayng ilimite ang atong ministeryo diha sa pagsangyaw lang sa balay ug balay ug itugyan sa uban ang pag-Bible study.
3. Sa unsang paagi si Jehova naghimo kanatong takos sa pagdumalag Bible study?
3 Si Jehova Naghimo Kanatong Takos: Ang atong mga katakos sa paghimog mga tinun-an naggikan kang Jehova. (2 Cor. 3:5) Pinaagi sa iyang organisasyon siya nagtudlo kanatog mga kamatuoran sa Bibliya nga wala mahibaloi bisan sa labing edukadong mga tawo sa kalibotan. (1 Cor. 2:7, 8) Siya nagtipig ug talaan sa mga paagi sa pagtudlo ni Jesus, ang Dakong Magtutudlo, aron atong masundog, ug siya padayong nagbansay kanato pinaagi sa kongregasyon. Dugang pa, si Jehova naghatag kanatog tun-anang materyal nga atong gikinahanglan alang sa pagtudlo sa Bibliya. Siya nagtaganag mga kahimanan, sama sa librong Gitudlo sa Bibliya, nga nagtudlo sa kamatuoran sa paagi nga lohikal ug daling masabtan. Ang pagdumalag Bible study mahimong dili kaayo lisod kay sa atong gihunahuna.
4. Nganong makasalig kita nga si Jehova motabang kanato?
4 Si Moises ug Jeremias nakatuman sa ilang mga asaynment sa tabang ni Jehova. (Ex. 4:11, 12; Jer. 1:7, 8) Makapangayo sab kitag tabang kang Jehova. Ngani, dihang magdumala kitag Bible study, nagtudlo kita sa kamatuoran bahin kang Jehova ug kana kahimut-anan sa mga mata sa Diyos. (1 Juan 3:22) Busa, himoang tumong ang pagdumalag Bible study, nga usa ka makalilipay ug magantihon kaayong bahin sa ministeryo.