“Maghatag ug Bug-os nga Pamatuod”
1. Unsang maayong panig-ingnan ang gipakita ni apostol Pablo bahin sa ministeryo?
1 “Himoang bug-os ang imong pag-alagad.” (2 Tim. 4:5, Byington) Si apostol Pablo angayan gayod nga mohatag sa maong tambag kang Timoteo. Sa pagkatinuod, tali sa katuigang 47 ug 56 C.E., nakompleto ni Pablo ang tulo ka misyonaryong panaw. Ang basahon sa Mga Buhat subsob naghisgot nga si Pablo naghatag ug “bug-os nga pagpamatuod.” (Buh. 23:11; 28:23) Sa unsang paagi atong mahimo kana karon?
2. Sa unsang paagi makahatag kitag bug-os nga pagpamatuod dihang magsangyaw sa balay ug balay?
2 Sa Balay ug Balay: Aron mahimamat ang mga tagbalay nga wala pa gayod makadungog sa maayong balita, basin gikinahanglang duawon nato sila sa lainlaing takna sa adlaw. Ang bana tingali anaa sa balay sa magabii o sa hinapos sa semana. Angayng maningkamot kita nga may masangyawan sa matag balay, nga balikbalikon ug duaw ang mga balay nga walay tawo. Komosta kon dili molampos ang imong pagpaningkamot? Tingali ang pagsangyaw pinaagig sulat o telepono mohatag ug maayong mga resulta.
3. Unsay imong mga kahigayonan sa pagpamatuod sa publiko ug sa di-pormal nga paagi?
3 Sa Publiko ug sa Di-pormal nga Paagi: Ang mga alagad ni Jehova karon nagmantala sa “matuod nga kaalam” ngadto sa tanan nga mamati. Kini usahay ginahimo “diha sa dalan” o “diha sa mga plasa.” (Prov. 1:20, 21) Samtang nagabuhat sa atong adlaw-adlawng mga kalihokan, kita ba mahunahunaon nga mohatag ug pamatuod? Ikaingon ba nga kita “okupado kaayo sa pulong”? (Buh. 18:5) Kon mao, nan kita nagatuman sa atong obligasyon nga “maghatag ug bug-os nga pamatuod.”—Buh. 10:42; 17:17; 20:20, 21, 24.
4. Sa unsang paagi ang pag-ampo ug pagpamalandong makatabang kanato sa paghatag ug bug-os nga pamatuod?
4 Apan usahay, tungod sa personal nga kahuyangan o pagkamaulawon, basin magpanuko kita sa pagpamatuod. Sa pagkatinuod, si Jehova nakasabot sa atong mga limitasyon. (Sal. 103:14) Bisan pa niana, dihang motungha ang maong kahigayonan, makaampo kita kaniya alang sa kaisog sa pagsulti. (Buh. 4:29, 31) Dugang pa, dihang maghimog personal nga pagtuon ug mamalandong sa Pulong sa Diyos, makapokus kita sa pagpalalom sa atong apresasyon sa pagkalabawg bili sa maayong balita. (Filip. 3:8) Kini magdasig kanato nga magmasiboton sa pagmantala niini!
5. Sa unsang paagi makapakigbahin kita sa katumanan sa tagna ni Joel?
5 Si Joel mitagna nga sa dili pa moabot ang dako ug makalilisang nga adlaw ni Jehova, ang katawhan sa Diyos “mopadayon sa paglakaw” ug dili magpababag sa ilang pagsangyaw. (Joel 2:2, 7-9) Hinaot himoon nato ang tanan aron makapakigbahin niining dili-na-masubli nga buluhatong pagpamatuod!