Magmakugihon sa “Paghatag ug Bug-os nga Pagpamatuod”
1, 2. Unsay nakapadayeg kanimo bahin sa panglantaw ni Pablo sa pagsangyaw sa maayong balita, ug sa unsang paagi atong masundog ang iyang panig-ingnan sa “paghatag ug bug-os nga pagpamatuod”?
1 Sama kang Jesus ug sa daghang uban pang matinumanong mga alagad kaniadto, ang apostol nga si Pablo maoy masibotong magwawali sa maayong balita, nga ‘naghatag ug bug-os nga pagpamatuod’ bisag unsa pay mga kahimtang. Bisan pag gibilanggo diha sa balay, iyang “ginadawat nga maluloton ang tanan nga mangadto kaniya, nga nagwali sa gingharian sa Diyos ngadto kanila ug nagtudlo sa mga butang mahitungod sa Ginoong Jesu-Kristo uban ang labing dakong kagawasan sa pagsulti.”—Buh. 28:16-31.
2 Kita usab mahimong magmakugihon sa “paghatag ug bug-os nga pagpamatuod” sa tanang panahon. Naglakip kana sa pagsangyaw sa mga tawo nga atong mahibalag diha sa atong pagbiyahe paingon sa mga asembliya ug mga kombensiyon o sa mga biyahe panahon sa bakasyon.—Buh. 28:23; Sal. 145:10-13.
3. Sa unsang paagi atong malikayan nga ang atong di-pormal nga pagsangyaw dili mahimong sulagma lang nga paningkamot?
3 Unsay Di-Pormal nga Pagsangyaw? Ang di-pormal nga pagsangyaw dili usa ka butang nga nahitabong sulagma lang o wala tuyoa, nga morag wala kini planoha o dili hinungdanon. Dili gayod kana mao ang kahubitan sa atong pagsangyaw. Sama sa kahimtang ni Pablo, ang paghimaya sa Diyos pinaagi sa atong pagsangyaw maoy hinungdanon kanato, ug kini angayng mao ang atong tumong sa pagpamatuod diin haom samtang kita nagabiyahe karong ting-init. Hinunoa, ang paagi sa atong pagduol sa uban haom nga tawgong di-pormal—nga mao, relaks, mahigalaon, ug natural. Kining paagiha makapatunghag maayong mga resulta.
4. Unsay nakapaarang kang Pablo sa pagsangyaw diha sa iyang gipuy-an?
4 Pangandam sa Paghatag ug Pagpamatuod: Si Pablo kinahanglang mohimog mga kahigayonan sa pagpamatuod samtang gibilanggo sa balay didto sa Roma. Gikan sa iyang gipuy-an, gidapit gayod niya ang lokal nga Hudiyohanong mga pangulo ngadto sa iyang balay. (Buh. 28:17) Bisan tuod ug may Kristohanong kongregasyon sa Roma, nakat-onan ni Pablo nga ang Hudiyohanong katilingban sa maong siyudad diyutay lamag kasayoran bahin sa Kristohanong pagtuo. (Buh. 28:22; Roma 1:7) Wala siya maglangan sa “paghatag ug bug-os nga pagpamatuod” bahin kang Jesu-Kristo ug sa Gingharian sa Diyos.
5, 6. Unsang mga kahigayonan ang atong mabatonan aron makahatag ug di-pormal nga pagpamatuod, ug unsang mga pagpangandam ang atong buhaton aron mahimo kana sa epektibong paagi?
5 Hunahunaa daan ang tanang tawo nga imong mahibalag sa imong mga pagbiyahe nga wala kaayoy kasayoran bahin sa mga Saksi ni Jehova. Basin wala gani sila mahibalo nga nagtanyag kita ug libreng mga pagtuon sa Bibliya sa balay. Magmaabtik sa mga kahigayonan sa pagpamatuod niadtong imong mahibalag samtang nagabiyahe, mohunong sa mga estasyonan, magpagasolina, mamalit, mopuyo sa mga hotel, mokaon sa mga restawran, mosakay ug publikong mga sakyanan, ug uban pa. Tinoa daan kon unsay imong isulti sa pagsugod sa panaghisgot ug sa paghatag ug mubong pagpamatuod. Tingali sa umaabot nga mga adlaw makapraktis ka pinaagi sa pagsangyaw nga di-pormal ngadto sa imong mga silingan, paryente, kauban sa trabaho, ug uban pang mga kaila.
6 Nagkinahanglan kag suplay sa mga publikasyon nga arang magamit sa di-pormal nga pagsangyaw. Unsang mga publikasyona? Mahimo mong gamiton ang tract nga Gusto Ka Bang Makabaton ug Dugang Kahibalo Bahin sa Bibliya? Ipasiugda ang unang lima ka parapo, diin gihatag ang nagkalainlaing mga rason sa pagbasa sa Bibliya. Ipakita ang kupon sa luyo alang sa hangyo sa usa ka libreng pagtuon sa Bibliya sa balay. Kon makahibalag kag interesadong tawo, itanyag ang brosyur nga Gikinahanglan. Agig pagpangandam nga makahibalag ug mga tawo nga nagsultig langyaw nga pinulongan, dad-a ang pulyeto nga Good News for All Nations. Ang panid 2 nagpatin-aw kon unsaon paggamit kana aron makasangyaw. Kon nagabiyahe pinaagig awto, mahimo kang magdalag pipila ka uban pang pangunang mga publikasyon alang niadtong magpakitag tinuod nga interes sa mensahe sa Gingharian.
7, 8. Unsang pasidaan bahin sa atong personal nga panagway ug panggawi samtang nagabiyahe ug panahon sa paglulinghayaw ang angay natong bantayan?
7 Tagda ang Imong Panagway ug Panggawi: Kinahanglan natong paneguroon nga ang atong panggawi maingon man ang atong pamesti ug pamostura dili makahatag ug sayop nga impresyon sa uban o magpahinabo kanila nga makasaway sa organisasyon ni Jehova. (Buh. 28:22) Mapadapat kini dili lang sa dihang motambong ug mga asembliya o mga kombensiyon kondili samtang nagabiyahe usab ug panahon sa paglulinghayaw. Ang Agosto 1, 2002, Bantayanang Torre, panid 18, parapo 14, nagpasidaan: “Ang atong panapot dili angayng mapagawalon, katingad-an, makapapukaw sa gana sa sekso, magladlad sa mga parte sa lawas nga naandan nang tabonan, o sobra ka makiuso. Dugang pa, kita angayng mamesti sa paagi nga magbanaag ug ‘pagtahod sa Diyos.’ Angay natong hinuktokan kana, dili ba? Ang gipasabot dinhi dili kay magsul-ob ra ug haom nga besti kon motambong sa mga tigom sa kongregasyon [o mga asembliya] ug dayon dili na magpakabana sa pamesti sa ubang mga panahon. Ang atong personal nga panagway angayng magbanaag kanunay ug matinahoron, dungganon nga tinamdan tungod kay kita maoy mga Kristohanon ug mga ministro 24 oras kada adlaw.”—1 Tim. 2:9, 10.
8 Angay kitang magsapot nga makasaranganon ug uban ang kaligdong. Kon ang atong panagway ug panggawi kanunayng magbanaag sa atong pagtuo sa Diyos, dili gayod kita mobating napugos nga moayad sa di-pormal nga pagsangyaw tungod kay ang atong personal nga panagway dili man angay ingong ministro.—1 Ped. 3:15.
9. Unsang kalamposan sa pagsangyaw ang nahimo ni Pablo didto sa Roma?
9 Ang Di-Pormal nga Pagsangyaw Mabungahon: Sulod sa duha ka tuig nga si Pablo gibilanggo sa balay didto sa Roma, nakita niya ang maayong mga resulta tungod sa iyang mga paningkamot sa pagsangyaw. Si Lucas mitaho nga “dihay pipila nga mituo sa mga butang nga iyang gisulti.” (Buh. 28:24) Gihatagan gayod ug bili ni Pablo ang pagkaepektibo sa iyang “paghatag ug bug-os nga pagpamatuod” sa dihang siya misulat: “Ang akong mga kalihokan misangpot hinuon sa pagpauswag sa maayong balita inay sa kasukwahi, mao nga ang akong mga gapos nahibaloan sa publiko kalangkit kang Kristo taliwala sa tanang Praetorianong Guwardiya ug sa tanang uban pa; ug kadaghanan sa mga igsoon diha sa Ginoo, nga mibati ug pagsalig tungod sa akong mga talikala sa bilanggoan, nagapakita ug labi pa gayod nga kaisog sa pagsulti sa pulong sa Diyos sa walay kahadlok.”—Filip. 1:12-14.
10. Unsang kalamposan diha sa pagsangyaw ang naangkon sa usa ka magtiayon sa miaging ting-init?
10 Sa miaging ting-init, human makagugol ug adlaw sa distritong kombensiyon, ang usa ka magtiayon nakabaton ug mabungahong eksperyensiya sa pagpamatuod nga di-pormal ngadto sa usa ka wetres nga nangutana kanila bahin sa ilang mga badge card sa kombensiyon. Ilang gisultihan siya bahin sa kombensiyon ug bahin usab sa paglaom nga gitanyag sa Bibliya alang sa umaabot sa katawhan. Gihatagan nila siyag tract nga Gusto Ka Bang Makabaton ug Dugang Kahibalo Bahin sa Bibliya? ug gisaysay ang kahikayan sa libreng pagtuon sa Bibliya sa balay. Ang babaye miingon nga gusto niyang may moduaw kaniya, nagsulat sa iyang ngalan ug adres sa luyo sa maong tract, ug naghangyo sa magtiayon nga maoy mohimo sa maong mga kahikayan. Unsang kalamposan ang imo tingaling matagamtam pinaagi sa pagkamakugihon sa “paghatag ug bug-os nga pagpamatuod” sa matag kahigayonan?
11. Unsang mga hiyas ang angay natong ugmaron sa pagpakaylap sa maayong balita pinaagi sa “paghatag ug bug-os nga pagpamatuod”?
11 Ipakaylap sa Bug-os ang Maayong Balita: Hunahunaa kon unsa ka malipayon si Pablo sa dihang nahibaloan niya nga ang mga isigka-Kristohanon nagsundog sa iyang masibotong panig-ingnan! Hinaot buhaton nato ang kutob sa atong maarangan sa pagsangyaw sa maayong balita pinaagi sa paggamit sa matag haom nga kahigayonan sa pagpamatuod sa di-pormal nga paagi bahin sa atong pinasukad-sa-Bibliya nga mga pagtuo.
[Kahon sa panid 3]
Mga Publikasyon nga Gikinahanglan Alang sa Di-Pormal nga Pagsangyaw
■ Gusto Ka Bang Makabaton ug Dugang Kahibalo Bahin sa Bibliya? (tract)
■ Unsay Gikinahanglan sa Diyos Kanato? (brosyur)
■ Good News for All Nations (pulyeto)
■ Uban pang pangunang mga publikasyon