Ruta sa Magasin—Tabang sa Pagsugod ug Bible Study
1. Nganong ang organisasyon ni Jehova nagdasig sa mga magmamantala nga magbatog ruta sa magasin?
1 Daghan ang dili interesadong magpa-Bible study, apan gusto rang mobasa sa atong magasin. Busa, ang organisasyon ni Jehova dugay nang nagdasig sa mga magmamantala nga magbatog ruta sa magasin. Kay regular nga nagbasa sa atong mga magasin, sila sagad makaugmad ug pangandoy sa Pulong sa Diyos. (1 Ped. 2:2) Unya, basin may mabasa sila nga makapukaw sa ilang interes ug tungod niana modawat ug Bible study.
2. Sa unsang paagi mahaling nato ang interes sa atong mga ruta sa magasin?
2 ‘Bisbisi’ ang mga Binhi sa Kamatuoran: Imbes ihatod lang ang mga magasin, pakig-estorya sa tagbalay aron magkailhanay pa mo. Kini makatabang aron imong masayran ang iyang kahimtang, mga interes, ug pagtuo, ug sa ingon ikaw makasulti nga masinaboton. (Prov. 16:23) Pangandam sa matag pagduaw. Kon posible, paghisgot ug usa ka punto ug teksto gikan sa mga magasin, nga samag imong gibisbisan ang mga binhi sa kamatuoran sa iyang kasingkasing. (1 Cor. 3:6) Irekord ang petsa sa matag pagduaw, basahon nga gihatag, ug mga ulohan ug teksto nga gihisgotan.
3. Kapila nato duawon ang atong ruta sa magasin?
3 Kapila Ka Moduaw? Angay kang moduaw kas-a sa usa ka bulan aron dad-an silag kinabag-ohang mga magasin. Hinuon, depende sa imong kahimtang ug sa interes sa tagbalay, ikaw makaduaw nga subsob pa. Pananglitan, usa o duha ka semana human ibilin ang mga magasin, ikaw makabalik ug makaingon, “Mihapit lang ko kay dunay punto nga akong ipakita sa magasin nga gibilin nako nimo.” Mapukaw niini ang iyang interes nga basahon ang maong artikulo. Kon iya na kanang nabasa, pangutana kon unsay iyang hunahuna bahin sa maong artikulo ug hisgotan kanag kadiyot. O kon ang tagbalay gusto rang mobasa sa atong literatura, puwede kang mobalik ug tanyagi siyag tract, brosyur, o libro nga maoy tanyag nianang bulana.
4. Matag karon ug unya, unsay atong mahimo aron masayran kon ang atong ruta sa magasin gustong magpa-Bible study?
4 Ayawg paabota nga tagbalay ang mohangyo nimo nga magpa-study. Ikaw ang mangitag paagi. Bisan pag mibalibad siya kaniadto, matag karon ug unya, puwede nimong ipakita ang “Tubag sa mga Pangutana Bahin sa Bibliya” sa Bantayanang Torre ug tan-awa kon gusto ba niyang makighisgot niana. Basin makasugod kag pagtuon diha ra sa pultahan. Pero kon dili, ipadayon ang paghatod kaniyag mga magasin aron mahaling ang iyang interes.