Hinumdomi ang Nagpuyo sa mga Nursing Home
1. Nganong mosangyaw ta sa mga nursing home?
1 Daghan ang nalisdan tungod sa epekto sa pagkatigulang. (Eccl. 12:1-7) Ang uban kanila nagpuyo sa mga nursing home mao nga usahay dili nato sila masangyawan dihang kita mamalaybalay. Ingon niini ang kahimtang bisan sa mga dapit diin nabatasan nga ang mga tigulang moipon sa ilang mga anak o paryente. Bisag dili na kaayo makalihoklihok ug medyo limtanon na, ang mga tigulang ug uban pa nga nagpuyo sa nursing home makahimo pa sa pagkat-on ug paghigugma kang Jehova. Unsaon nato pagpaambit kanila ang maayong balita sa “makalilipay nga paglaom”?—Tito 2:13.
2. Unsaon nato pagpangita ang mga nursing home diha sa atong teritoryo?
2 Kon Unsaon Pagsugod: Ang mga nursing home sagad makita pinaagi sa pagsusi sa Internet o sa telephone directory. Tan-awa ang mga kategoriya sama sa “nursing homes,” “group homes,” ug “residential-care facilities.” Ang magtatan-aw sa pag-alagad maoy mag-asayn ug kuwalipikadong mga magmamantala sa pagduaw niini nga mga pasilidad. Pinaagi sa maayong pagplano ug pagsalig kang Jehova, posible nga makasugod ug grupong pagtuon sa Bibliya.—Prov. 21:5; 1 Juan 5:14, 15.
3, 4. (a) Kang kinsa mananghid bahin sa grupong pagtuon? (b) Unsay atong isulti bahin sa kahikayan sa pagtuon?
3 Ang paagi sa pagpananghid aron ipahigayon kini nga pagtuon nagdepende sa matang sa pasilidad. Sa dagkong pasilidad diin daghag residente ug empleyado, maayong moduol sa receptionist ug mohangyo nga makig-estorya sa tagdumala. Sa gagmayng pasilidad, nga tingali pipila ray residente ug duha o tulo ray caregiver, maayong makig-estorya sa tag-iya mismo.
4 Niining duha ka kahimtang, isulti nga nagboluntaryo ka aron tabangan ang mga tawo nga gustong mobasa o makigsulti bahin sa Bibliya. Pangutana kon duna bay gustong moapil sa grupong panaghisgot sa Bibliya sulod sa 30 minutos kada semana. Daghang basahon ang puwedeng gamiton, apan daghag ganahan sa librong Akong Basahon sa mga Estorya sa Bibliya ug Ang Labing Bantogang Tawo nga Nabuhi Sukad. Ang mga libro mahimo nimong ipakita sa tagdumala. Ang adlaw, oras, ug lugar sa pagtuon mahimong sabotan ug sagad ila kining ipaskin diha sa ilang bulletin board. Ayawg kahadlok sa pagpaila nga Saksi ni Jehova ka. Ipasabot usab sa tagdumala nga dili ka magwali kondili nagdasig lang sa pagtuon sa Bibliya.
5. Unsay puwedeng himoon aron ang pagtuon makalingaw ug matulon-anon?
5 Pagdumala sa Pagtuon: Ang paagi sa pagdumala nagdepende sa mga kahimtang sa pasilidad, busa angay nga mapailin-ilinon ka ug makamaong mosabot sa situwasyon. Ang magdumala sa pagtuon magdalag ubay-ubayng kopya sa publikasyon ug kolektahon kini pagkahuman sa pagtuon. Basin kinahanglang magdalag mga kopya nga dagkog letra para sa uban. Mahimong basahon ang parapo, isukna ang mga pangutana, ug puwede silang mokomento. Kadtong gusto ug makaarang pa sa pagbasa mahimong pabasahon sa mga parapo o teksto. Ang pagdumala angayng makapainteres, positibo, ug mahigalaon. Kon mosugot ang tagdumala, mahimong ipasalida usahay ang atong mga video nga makapalig-on sa pagtuo maylabot sa Bibliya o magtudlog mga leksiyon bahin sa usa ka estorya sa Bibliya. Posible usab nga ang pagtuon sugdan ug taposon pinaagig mubong pag-ampo. Gigamit pa gani sa ubang magmamantala ang atong mga alawiton.
6. Unsay himoon kon dunay mosupak?
6 Unsay himoon kon dunay mosupak sa imong gibasa o gisulti panahon sa pagtuon? Magmataktikanhon sa pagtubag. (Col. 4:6) Tingali mobasa kag teksto aron matin-awan siya. Kon dili kana praktikal, labing maayo nga pasalamatan siya sa iyang komento ug sultihan siya nga kini hisgotan ninyong duha human sa pagtuon.
7. Unsay himoon kon dunay mangutana o gustong makakat-og dugang?
7 Usahay dunay mangutana o moingon nga gusto siyang makakat-og dugang. Usa ka sister mitubag niining paagiha: “Maayo nang imong pangutana. Unsa kaha kon ato nang hisgotan human sa pagtuon?” Kasagaran, ang pagtuon sa Bibliya uban sa interesado mahimong dumalahon sa ubang oras ug lugar.
8. Unsay paagi sa pagtaho sa grupong pagtuon ug sa pagtuon uban sa indibiduwal?
8 Labing maayo nga mao rang mga igsoona ang mobalik sa pasilidad sa matag higayon nga magtuon ang grupo. Ang tanang magmamantala nga moduyog sa pagtuon makataho ug oras. Kon regular na ang pagtuon, ang magmamantala nga nagdumala makataho ug usa ka pagbalikduaw sa matag pagtuon sa grupo ug usa ka pagtuon sa Bibliya kada bulan. Ang pagdumalag pagtuon sa Bibliya uban sa mga indibiduwal nga makahimo pa sa pagsabot ug pagkat-on itaho sama sa naandan.
9, 10. Unsa nga mga hiyas ang gikinahanglan niini nga buluhaton? Ipatin-aw.
9 Kon Unsaon nga Mapadayon ang Pagtuon: Labing maayo nga himoon ang grupong pagtuon sa samang adlaw ug oras. Ang mga residente ug empleyado magdahom nga regular ang pagtuon ug kini sugdan ug taposon sa eksaktong oras. (Mat. 5:37) Busa ang mga igsoon nga maasayn kinahanglang kugihan, organisado, ug motuman gyod sa sabot. Napamatud-an nga labing maayo kon duha ka kuwalipikadong magmamantala ang mag-uban sa pagtuon. (Eccl. 4:9, 10) Sa dagkong pasilidad, lagmit mas daghang magmamantala ang gikinahanglan.
10 Ang pagkamahigalaon ug personal nga interes importante usab. (Filip. 2:4) Sa unang pagduaw, gahinig panahon nga maestorya ang matag usa nga motambong. Isulat ug sag-uloha ang ilang ngalan sa dili pa ang sunod nga pagtuon. Ang pagpailob ug pagpakitag kaayo mopabati nila nga sila gimahal ug gipabilhan.
11. Unsaon pagtratar ang mga empleyado ug ang mga paryente sa residente?
11 Kinahanglang tahoron usab ug pakitaag kaayo ang mga empleyado ug ang mga paryente sa mga residente. Sa dihang masabotan na ang oras ug kahikayan sa pagtuon, ayaw kini usba nga walay permiso sa tagdumala. Pangutan-a usahay ang tagdumala kon unsay iyang ikasulti bahin sa pagtuon. Kon moduaw ang mga paryente panahon sa pagtuon, duola sila. Sultihi sila sa katuyoan sa pagtuon. Pasaligi sila nga interesado ka sa kaayohan sa membro sa ilang pamilya. Dapita sila sa pagpaminaw sa pagtuon.
12, 13. Iasoy ang maayong mga resulta sa pagpamatuod diha sa mga nursing home.
12 Mga Resulta: Ang report sa nagapanawng mga magtatan-aw ug mga kongregasyon nagpakita sa maayong mga resulta niini nga paagi sa pagministeryo. Sa usa ka nursing home, mga 20 ka residente ang mitambong sa unang pagtuon. Tungod niini unom ka residente ang nagpa-Bible study ug usa ang nabawtismohan. Sa laing nursing home, dihay 85 anyos nga babaye nga tigtambongan sa kongregasyon ug gusto nang magpabawtismo. Sa dihang midesisyon ang usa ka pasilidad nga usahon ang ilang mga kalihokan ug gipahunong ang grupong pagtuon sa mga Saksi ni Jehova, ang mga residente mireklamo ngadto sa tagdumala! Sa ulahi gibalik ang pagtuon ug 25 ngadto sa 30 ang tigtambongan.
13 Ang gugma nga atong ipakita maayog epekto dili lang sa mga residente. Pananglitan, bisan ang mga empleyado moduyog ug makigbahin pa gani sa pagtuon. Ang atong pagpakitag personal nga interes sa mga residente sa nursing home makahatag usab ug maayong pamatuod diha sa komunidad. (1 Ped. 2:12) Human masultihi bahin sa katuyoan sa pagtuon, usa ka tagdumala miingon: “Nganong karon lang ni? Kanus-a ninyo ni sugdan?” Laing tagdumala miingon: “Irekomendar gyod nako sa ubang nursing home sa atong lugar kining grupong pagtuon. Libre ning ginahimo sa mga Saksi ni Jehova ingong bahin sa ilang pagserbisyo sa komunidad.” Dihay nursing home sa Hawaii nga naghatag sa mga Saksi ni Jehova ug Volunteer Service Award, diin nasulat niini nga ang mga boluntaryo dakog natabang sa mga residente sa pasilidad.
14. Nganong maningkamot kita sa pagtabang sa mga residente sa nursing home?
14 Ang mga tigulang gidapit ni Jehova sa pagdayeg kaniya. (Sal. 148:12, 13) Lakip sa gidapit kadtong nagpuyo sa mga nursing home. Duna bay nursing home sa inyong teritoryo? Sa tabang sa mga ansiyano ug sa mga tagdumala sa mga nursing home, makahatag kitag maayong pamatuod sa mga residente sa nursing home. Kon atong hinumdoman ang mga tigulang, atong gisundog si Jehova.—Sal. 71:9, 18.