Gamita ang “Introduksiyon sa Pulong sa Diyos”—Sa Pagsugod ug Panag-estorya

1. Unsa bag-ong pulyeto ang atong nadawat nga magamit sa pagsangyaw?

¹ Ang pulyetong “Introduksiyon sa Pulong sa Diyos” girelease sa 2014 nga regional convention. Unsaon nato kini paggamit dihang mangandam ug mga presentasyon alang sa pagsangyaw? Sanglit gigrupo man niini ang mga teksto ubos sa lainlaing topiko sa Bibliya, sama sa gihimo diha sa librong Nangatarongan, dako kinig tabang sa pagsugod ug panag-estorya.

2. Unsaon nato paggamit ang “Introduksiyon sa Pulong sa Diyos” diha sa pagsangyaw?

² Tingali gamiton nimo ang pangutana 8 ug moingon: “Nanganhi mi sa inyong dapit kay daghan ang nangutana kon ‘Diyos bay mabasol sa pag-antos sa tawo?’ [Sa ubang teritoryo, mas epektibong ipakita ang pangutana ngadto sa tagbalay.] Unsay imong hunahuna? [Patubaga.] Ang Bibliya dunay tubag niana nga pangutana.” Basaha ug hisgoti ang usa o uban pang gikutlong teksto direkta sa Bibliya. Kon ang tagbalay magpakitag interes, ipakita kaniya ang 20 ka pangutana sa pulyeto ug papilia siyag usa nga inyong hisgotan sa sunod duaw. O mahimo nimo siyang tanyagan ug usa sa pang-Bible study nga mga publikasyon nga naghatag ug dugang impormasyon bahin sa ulohan nga inyong gihisgotan.

3. Unsaon nato paggamit ang “Introduksiyon sa Pulong sa Diyos” sa pagsugod ug panag-estorya sa mga tawo nga dili Kristohanon?

³ Ang pangutana 4 ug 13 ngadto sa 17 makatabang dihang magsangyaw diha sa mga teritoryo nga ang mga tawo dili Kristohanon ug relihiyon. Pananglitan, mahimo nimong gamiton ang impormasyon sa pangutana 17 ug moingon: “Miduaw mi kay gusto namong makatabang sa pamilya. Tingali mouyon ka nga daghan kaayog problema ang mga pamilya karon? [Patubaga.] Nakatabang sa mga magtiayon kining maayo nga tambag: “Ang asawa angay nga adunay halawom nga pagtahod sa iyang bana.” [Dili na kinahanglang isulti nga kini gikan sa Efeso 5:33. Kon babaye ang imong kaestorya, isulti ang giingon sa Efeso 5:28.] Sa imong hunahuna, ang pagsunod ba niini nga tambag makatabang sa kaminyoon?”

4. Unsay puwede nimong buhaton pagkahuman sa inyong panag-estoryahay sa usa ka tawo nga dili Kristohanon?

⁴ Pagkahuman ninyog estorya, pakigsabot kon kanus-a ka puwedeng mobalik aron ipadayon ang inyong panaghisgot. Puwede ninyong hisgotan sa sunod ang usa sa mga teksto gikan sa pangutana nga imong gigamit. Sa hustong panahon, isulti sa tagbalay nga ang mapuslanong mga pulong nga imong gisulti kaniya maoy gikan sa Bibliya. Depende sa inyong panaghisgot sa nangagi ug sa iyang panglantaw sa Bibliya, tanyagi siyag publikasyon nga sa imong hunahuna makapainteres kaniya.—Tan-awa ang pasukip sa Disyembre 2013 nga Atong Ministeryo sa Gingharian.