Mga Pahinumdom sa Kombensiyon
Oras sa Programa: Ang pasilidad ablihan sa alas 7:00 sa buntag. Sa tulo ka adlaw, ang musika magsugod sa alas 8:20 sa buntag. Nianang orasa, ang tanan kinahanglang manglingkod na aron ang programa makasugod nga hapsay. Sa Biyernes ug Sabado, ang paniklop nga awit ug pag-ampo maoy sa alas 3:55 sa hapon ug alas 2:45 sa hapon sa Dominggo.
Awit sa Pagdayeg Kang Jehova: Sukad pa sa una, ang mga alagad ni Jehova nagdayeg kaniya pinaagig awit. Hangtod karon ang musika nagpabiling importanteng bahin sa matuod nga pagsimba. (Sal. 28:7) Ang matag sesyon sa kombensiyon sugdan pinaagig pasiunang musika. Dili lang ni basta ilhanan nga hapit nang magsugod, kondili giandam ni aron makakat-on ug makasimba ta kang Jehova. Busa dihang ipahibalo sa tsirman nga magsugod na ang pasiunang musika, kinahanglang manglingkod na ta aron maminaw sa musika. Kon himoon nato na, atong gipabilhan ang paningkamot sa mga igsoon sa orkestra sa Watchtower. Kaduha sa usa ka tuig, kini nga mga igsoon mobiyahe ngadto sa Patterson, New York, sa kaugalingon nilang gasto, aron maghimog nindot nga musika nga atong mapaminawan. Human sa pasiunang musika, kitang tanan angayng magdayeg kang Jehova pinaagi sa pagkanta sa mga awit sa Gingharian.
Parkinganan: Sa parkinganan sa asembliyahanan, ang unang makaabot maoy unang makaparking. Kay limitado man ang parkinganan, labing maayo nga mag-uban sa sakyanan ang mga igsoon imbes magdalag iyaiyang sakyanan. Kinahanglang paneguroon sa mga attendant nga kadtong mga sakyanan lang nga may pasaherong baldado ang makaparking sa dapit nga gireserba para nila.
Pagreserbag Lingkoranan: Pag-abli sa pasilidad, palihog ayaw pagdalidali nga mora kag makig-ilog ug lingkoranan. Magmahunahunaon ta sa uban. Kon magsakripisyo ta ug unahon ang kaayohan sa uban, mailhan ta ingong tinuod nga mga Kristohanon ug madasig nato ang mga nanan-aw sa pagdayeg sa Diyos. (Juan 13:34, 35; 1 Cor. 13:4, 5; 1 Ped. 2:12) Pagreserbag lingkoranan para lang sa mga kauban sa balay, kauban sa sakyanan, o sa imong mga Bible study. Palihog ayaw pagbutang ug mga gamit diha sa tupad ninyong lingkoranan aron makita sa uban nga kini bakante pa. Dunay mga lingkoranan nga gireserba para sa mga edaran ug masakiton. Kay limitado lang kini nga mga lingkoranan, usa o duha lang ang puwedeng molingkod uban niya.
Kristohanong Sininaan: Ang atong sinina panahon sa kombensiyon kinahanglang haom para sa Kristohanon ug makasaranganon, dili sama sa kalibotanong mga estilo. (1 Tim. 2:9) Bisan dihang manuroy sa dili pa o human sa sesyon, likayan nato ang sobra ka kaswal o dili desente nga sinina. Sa ingon dili ta maulaw magtaod sa atong badge card ug makasangyaw ta kon dunay kahigayonan. Kon desente tag hitsura ug maayog pamatasan panahon sa kombensiyon, madani ang sinserong mga tawo sa mensahe sa Bibliya ug labaw sa tanan atong mapalipay si Jehova.—Sof. 3:17.
Paggamit ug Elektronikong Gadyet: Mapakita nato ang maayong pamatasan panahon sa programa kon atong i-adjust ang atong cellphone o ubang elektronikong gadyet sa setting nga dili makadisturbo sa uban. Magmahunahunaon sab ta nga dili madisturbo o masalipdan ang uban kon mogamit tag kamera, video recorder, tablet, o uban pa. Kon dili importante, likayan nato nga magtext o mag-email panahon sa programa.
Paniudto: Palihog pagbalon ug paniudto imbes mobiya aron mopalit ug pagkaon human sa sesyon. Mahimong magdalag gamayng cooler nga ikabutang sa ilalom sa lingkoranan. Ayaw pagdalag dagkong cooler ug bildong mga sudlanan sa kombensiyon.
Donasyon: Atong ikapakita ang pagpabili sa mga kahikayan sa kombensiyon pinaagi sa atong boluntaryong donasyon para sa tibuok kalibotang buluhaton. Ang mga tseke nga idonar kinahanglang payable to Watch Tower. Puwede pong magdonar pinaagig debit o credit card.
Tambal: Kon nagtomar kag gireseta nga tambal palihog paneguroa nga magdalag igong suplay kay walay mabatonan diha sa kombensiyon. Ang mga indyeksiyon sa dunay diabetes kinahanglang ilabay sa basurahan nga gimarkahag “hazardous waste” imbes isagol sa ubang basura.
Paglikay sa Disgrasya: Palihog pag-amping ug maayo aron dili madakin-as o madagma. Kada tuig daghan ang madisgrasya tungod sa sapatos, ilabina niadtong tag-as ug takong. Maayo nga magsul-ob ug kasarangan, sigo sa tiil nga sapatos aron luwas kang makalakaw sa rampa, agianang puthaw nga may lungag-lungag, hagdanan, ug uban pa.
Di Kaayo Makadungog: Sa ubang kombensiyon, ang programa madungog sa FM nga frequency. Pagdalag gamay nga debateryang radyo nga dunay earphone, aron madunggan ang programa.
Please Follow Up (S-43) Form: Palihog pagpil-ap ug Please Follow Up form kon duna kay masangyawan nga interesado panahon sa kombensiyon. Ihatag kini sa Book Room o sa sekretaryo sa inyong kongregasyon inig-uli ninyo.
Kan-anan: Pasidunggi ang ngalan ni Jehova pinaagi sa inyong maayong panggawi diha sa mga kan-anan. Pagsul-ob ug sinina nga haom sa mga Kristohanon. Paghatag ug tip kon naandan kini sa inyong dapit.
Pagboluntaryo: Kadtong gustong moboluntaryo angayng moadto sa Volunteer Service Department sa inyong kombensiyon. Ang mga bata nga wala pay 16 anyos makaboluntaryo sab kon ubanan sa ginikanan o sa laing hamtong ubos sa pagtugot sa ginikanan.