Pangutana

◼ Kinahanglan bang gamiton sa mga magmamantala ang Internet sa pagsangyaw o pag-Bible study sa mga tawong nagpuyo sa laing nasod?

Ang ubang igsoon naggamit sa Internet aron mangitag Bible study diha sa mga nasod diin gidili ang atong buluhaton o gamay ra ang magmamantala. Sa pipila ka situwasyon, maayo ang nahimong resulta. Apan dunay kapeligrohan kon ang mga igsoon makig-email o makig-chat sa mga tawong dili nila kaila. (Tan-awa ang Hulyo 2007 nga Atong Ministeryo sa Gingharian, p. 3.) Bisan pag ang tuyo nato maoy pagpangitag mga interesado ug pagpaambit ngadto kanila sa mensahe sa Gingharian, kini mahimong moresulta sa daotang pagpakig-uban o kaha pakigkontak sa mga apostata. (1 Cor. 1:19-25; Col. 2:8) Dugang pa, diha sa mga dapit diin gidili ang buluhaton sa Gingharian, posibleng ginamonitor sa awtoridad ang mga komunikasyon. Basig makapameligro kini sa mga igsoon didto. Busa, dili angayng gamiton sa mga igsoon ang Internet sa pagpangitag mga tawo sa laing nasod aron sangyawan sa maayong balita.

Kon duna tay masangyawan nga taga-laing nasod nga nagbakasyon sa atong lugar, dili nato siya angayng kontakon human siya makauli sa iyang nasod aron halingon ang iyang interes, gawas kon dunay instruksiyon gikan sa branch office nianang nasora. Mas maayong ipakita na lang kon unsaon paggamit ang jw.org sa pagkuhag dugang impormasyon o kon unsaon niya pagkontak ang lokal nga branch office. Puwede sab nato siyang dasigon sa pagtambong sa Kingdom Hall diha sa iyang lugar. Hinuon, dunay mga nasod diin walay Kingdom Hall. Kon gusto niyang duawon ug Saksi, kitay mopil-ap sa Please Follow Up (S-43) form ug ihatag kini sa sekretaryo, nga maoy magpadala niini diha sa jw.org. Ang branch office nga nagdumala sa buluhaton diha sa nasod nga gipuy-an sa interesado pamilyar sa mga kahimtang didto ug mas nahibalo kon unsaon siya pagtabang sa espirituwal.​—Tan-awa ang Hunyo 2014 nga Atong Ministeryo sa Gingharian, p. 7, ug ang Nobyembre 2011 nga Atong Ministeryo sa Gingharian, p. 2.

Kon ang interesado nga atong ginaduaw mobalhin sa laing nasod o kaha duna tay gidumalahan nga Bible study sa laing nasod nga nailhan ra nato sa Internet, kinahanglang atong sundon ang instruksiyon nga bag-o rang gihisgotan. Pero puwede natong padayonon ang pag-ugmad sa iyang interes hangtod nga maduaw siyag Saksi nga nagpuyo sa ilang lugar. Bisan pa niana, kon siya nagpuyo sa lugar diin gidili ang atong buluhaton, kinahanglang mag-amping ug maayo kon maghisgot ug mga topiko sa Bibliya diha sa sulat, telepono, o Internet.​—Mat. 10:16.