“These Words . . . Must Be on Your Heart”

Ang mga ginikanan samag magbalantay. Kinahanglan nilang atimanon ang ilang mga anak, kay sila daling masalaag ug daling matukob. (Prov. 27:23) Unsaon pagtuman sa mga ginikanan ang ilang responsibilidad? Kinahanglan silang mogahin ug panahon kada adlaw sa pagpakig-estorya sa ilang mga anak aron masayran kon unsay naa sa ilang hunahuna ug kasingkasing. (Prov. 20:5) Kinahanglang palig-onon sab sa mga ginikanan ang pagtuo sa ilang mga anak aron makabarog sila sa mga pagsulay. (1 Cor. 3:10-15) Ang video nga “These Words . . . Must Be on Your Heart” nagpasiugda sa kahinungdanon sa regular nga pamilyahanong pagsimba. Tan-awa kini uban sa imong pamilya, dayon tubaga ang mosunod nga mga pangutana.

(1) Unsay nakaingon sa dili maayong espirituwalidad sa pamilyang Roman? (2) Nganong wala molampos sa sinugdan ang paningkamot ni Brader Roman sa pagdumalag pamilyahanong pagsimba? (3) Unsang prinsipyo sa Bibliya ang makatabang aron molampos sa pagmatutog mga anak? (Deut. 6:6, 7) (4) Unsay makatabang aron dunay maayong komunikasyon sa pamilya? (5) Unsang mga sakripisyo ang kinahanglang himoon sa mga ginikanan para sa ilang mga anak? (6) Sa unsang paagi ang panig-ingnan ni Brader ug Sister Barrow nakatabang sa pamilyang Roman? (Prov. 27:17) (7) Unsang abanteng pagpangandam ang kinahanglang himoon sa ulo sa pamilya aron molampos ang pamilyahanong pagsimba? (8) Unsay gihimo ni Brader Roman aron mausab ang kahimtang sa iyang pamilya? (9) Nganong importante ang regular nga pamilyahanong pagsimba? (Efe. 6:4) (10) Unsay pipila ka praktikal nga paagi ang puwedeng himoon sa pamilyahanong pagsimba? (11) Nganong makaingon ta nga si Brader Roman kalmado pero lig-on sa iyang pagtabang kang Marcus nga makita ang kaimportante sa pagbuhat ug matarong? (Jer. 17:9) (12) Giunsa pagpangatarongan ni Brader ug Sister Roman kang Rebecca aron matabangan siya sa paghimog hustong desisyon bahin sa iyang relasyon kang Justin? (Mar. 12:30; 2 Tim. 2:22) (13) Giunsa pagpakita ni Brader ug Sister Roman ang ilang pagtuo dihang mihimog mga kausaban sa ilang kinabuhi? (Mat. 6:33) (14) Giunsa pagpasiugda sa video nga importanteng atimanon sa mga ulo sa pamilya ang espirituwalidad sa ilang pamilya? (1 Tim. 5:8) (15) Unsay imong determinasyon ingong ulo sa pamilya?

PAHINUMDOM SA ULO SA PAMILYA: Kini nga video gidrama sa regional convention sa 2011. Niadtong panahona, duna ba kay namatikdan nga kinahanglang pauswagon sa inyong pamilyahanong pagsimba? Komosta karon? Kon duna pay kinahanglang pauswagon, palihog iampo nga makahimo kag kausaban. Para kini sa dumalayong kaayohan sa imong pamilya.​—Efe. 5:15-17.