Gipanalipdan Gyod Ko ni Jehova kay Misalig Ko Niya

NAKAKAT-ON KO NGA MOSALIG KANG JEHOVA

Natawo ko niadtong 1948 sa usa ka gamayng baryo sa southwest sa Nigeria. Niadtong panahona, ang akong uyoan nga si Moustapha, nga manghod ni Papa, ug dayon si Wahabi, nga among kamagulangang igsoon nga lalaki, nabawtismohan ingong Saksi ni Jehova. Pagka-nuwebe anyos nako, namatay si Papa. Puwerte nakong guola. Giingnan ko ni Wahabi nga puwede namong makita pag-usab si Papa inigkabanhaw niya. Nakapahupay gyod to nako, maong nagpa-Bible study ko. Pagka-1963, nabawtismohan ko. Wala madugay, nabawtismohan pod ang akong tulo ka igsoong lalaki.

Niadtong 1965, miuban ko sa akong magulang nga si Wilson didto sa Lagos, ug nalingaw kaayo ko sa akong pagpakig-uban sa mga regular payunir sa Igbobi Congregation. Ang ilang kadasig ug kalipay nakadasig nako, mao nga niadtong Enero 1968, nagpayunir sab ko.

Si Albert Olugbebi, nga nag-alagad sa Bethel, nag-organisar ug espesyal nga miting uban sa mga batan-on bahin sa panginahanglan sa northern Nigeria ug mga espesyal payunir. Dili gyod ko malimot sa makapadasig nga mga pulong ni Brader Olugbebi: “Batan-on pa mo, ug magamit ninyo ang inyong panahon ug kusog para kang Jehova. Daghang buluhaton ang nagpaabot ninyo!” Kay gusto nakong sundogon ang pagkaandam moboluntaryo ni propetang Isaias, nagpasa kog application.—Isa. 6:8.

Sa Mayo 1968, naasayn ko ingong espesyal payunir sa siyudad sa Kano, sa northern Nigeria. Panahon to sa Biafran War (1967-1970), nga miresultag grabeng pag-antos ug kamatayon sa daghang tawo sa northern Nigeria, ug dayon sa east Nigeria. Naay brader nga misulay pagpugong nako nga moadto kay nabalaka siya nako. Pero ako siyang giingnan: “Salamat kaayo ha. Pero kon gusto ni Jehova nga mag-alagad ko didto, segurado ko nga ubanan ko niya.”

MISALIG KO KANG JEHOVA SA LUGAR NGA GRABENG NAAPEKTOHAN SA GUBAT

Makapaguol kaayo ang kahimtang sa Kano. Kining dako nga siyudad grabeng naapektohan sa gubat. Dihang magsangyaw, usahay makakita mig patayng lawas sa mga gimasaker. Bisag ubay-ubay ang mga kongregasyon sa Kano, kadaghanan sa mga igsoon nangikyas. Wala ray 15 ka magmamantala ang nagpabilin, ug sila nahadlok ug naluya. Ang maong mga igsoon nalipay pag-ayo dihang nangabot ming unom ka espesyal payunir. Amo silang gidasig, ug maayo kaayo ang resulta. Natabangan namo sila nga mabalik ang ilang espirituwal nga rutina. Nakapadala na pod silag balik sa ilang report sa pag-alagad ug mga order sa literatura ngadto sa sangang buhatan.

Kaming mga espesyal payunir nagsugod sa pagkat-on sa Hausa nga pinulongan. Pagkadungog sa mga tawo bahin sa mensahe sa Gingharian diha sa ilang pinulongan, daghan kanila ang naminaw. Pero ang mga membro sa pangunang relihiyon didto wala malipay sa among pagsangyaw, maong kinahanglan ming mag-amping pag-ayo. Dihay higayon nga ako ug ang akong partner gigukod sa tawo nga nagdalag kutsilyo. Maayo na lang kay wala mi niya maapsi! Bisan pa sa mga kapeligrohan, si Jehova “nagpapuyo [kanamo] sa kasegurohan” ug midaghan ang mga magmamantala didto. (Sal. 4:8) Karon, naa nay kapig 500 ka magmamantala ug 11 ka kongregasyon sa Kano.

GILUTOS DIDTO SA NIGER

Pagka-Agosto 1968, human sa pipila lang ka bulan didto sa Kano, ako ug ang duha pa ka espesyal payunir gipadala ngadto sa Niamey, ang kaulohang siyudad sa Republic of Niger. Nadiskobrehan dayon namo nga ang Niger, sa West Africa, maoy usa sa pinakainit nga lugar sa kalibotan. Gawas nga nag-adjust mi sa kainit, kinahanglan pod namong tun-an ang ilang pinulongan nga French. Bisan pa niini nga mga kalisdanan, misalig mi kang Jehova ug nagsugod pagsangyaw sa kaulohang siyudad, uban sa pipila ka igsoon nga nagpuyo didto. Wala madugay, halos tanan sa Niamey nga kamaong mobasa nakadawat ug kopya sa librong Ang Kamatuoran nga Motultol sa Kinabuhing Dayon, nga maoy gigamit kaniadto sa pag-Bible study. Ang mga tawo pa gani ang mangita namo kay gusto silang makakuhag kopya sa libro!

Wala madugay, nakita namo nga ang mga awtoridad dili ganahan sa mga Saksi ni Jehova. Niadtong Hulyo 1969, nagtigom mi para sa pinakaunang sirkitong asembliya sa nasod, nga mga 20 ang attendance. Eksayted mi sa bawtismo sa duha ka bag-ong magmamantala. Pero sa unang adlaw sa asembliya, nangabot ang mga polis ug gipahunong ang programa. Gidala nila sa presinto ang mga espesyal payunir ug ang tigdumala sa sirkito. Gisukitsukit mi nila ug gipabalik pagkaugma. Kay nakamatikod mi nga morag naay dili maayong mahitabo, gihimo namo ang pakigpulong sa bawtismo sa pribadong balay, dayon sekreto namong gibawtismohan ang mga kandidato didto sa sapa.

Paglabayg pipila ka semana, ako ug ang lima pa ka espesyal payunir gipapahawa sa Ministry of the Interior. Gihatagan mi nilag 48 ka oras nga mobiya sa nasod, ug kinahanglan nga kami mismo ang mangitag paagi nga makahawa. Misunod mi ug miadto dayon sa sangang buhatan sa Nigeria, ug gihatagan mig bag-ong mga asaynment.

Naasayn ko sa Orisunbare, usa ka baryo sa Nigeria, ug nag-enjoy ko sa pagsangyaw ug pagdumalag mga pagtuon sa Bibliya uban sa gamayng grupo sa mga igsoon nga nagpuyo didto. Pero paglabayg unom ka bulan, gidapit ko sa sangang buhatan nga mobalik sa Niger nga ako rang usa. Sa primero, nakulbaan ko ug nahadlok, pero eksayted pod ko nga makita pag-usab ang mga igsoon sa Niger.

Mibalik ko sa Niamey. Pagkasunod adlaw, namatikdan sa usa ka Nigerian nga negosyante nga Saksi ko, ug gipangutana ko niya bahin sa Bibliya. Nagpa-Bible study siya, ug dihang naundang na niya ang pagpanigarilyo ug paghuboghubog, nabawtismohan siya. Human ana, nalipay ko nga makaapil sa hinay pero anam-anam nga pag-uswag sa lainlaing lugar sa Niger. Dihang miabot ko sa nasod, 31 pa lang ang Saksi; pagbiya nako, 69 na.

“WALA KAAYO MI NAHIBALOAN BAHIN SA BULUHATON SA GINGHARIAN SA GUINEA”

Pagka-Disyembre 1977, mibalik ko sa Nigeria aron makadawat ug pagbansay. Sa hapit nang matapos ang tulo ka semana nga pagbansay, ang koordinetor sa Branch Committee, si Malcolm Vigo, naay gipabasa nako nga sulat gikan sa sangang buhatan sa Sierra Leone. Ang sangang buhatan didto nangitag himsog ug tagsaanong payunir nga brader nga kamaong mag-English ug French aron mag-alagad ingong tigdumala sa sirkito sa Guinea. Giingnan ko ni Brader Vigo nga ginabansay ko para niana nga asaynment. Giklaro niya nga dili ni sayon nga asaynment. “Hunahunaa ni pag-ayo sa dili pa nimo ni dawaton,” iya kong giingnan. Mitubag dayon ko, “Kay si Jehova man ang nagpadala nako, moadto ko.”

Miadto ko sa Sierra Leone ug nailaila nako ang mga igsoon sa sangang buhatan. Giingnan ko sa usa ka membro sa Branch Committee, “Wala kaayo mi nahibaloan bahin sa buluhaton sa Gingharian sa Guinea.” Bisag ang ilang sangang buhatan ang nagdumala sa buluhatong pagsangyaw sa silingang nasod nga Guinea, wala silay komunikasyon sa mga igsoon tungod sa grabeng kagubot sa politika didto. Ug bisag kapila na sila misulay, wala gyod sila molampos sa pagpadalag representante didto sa Guinea. Busa gihangyo ko nga mobiyahe paingon sa kaulohang siyudad sa Guinea, ang Conakry, aron mosulay pagkuhag residency permit.

Pag-abot nako sa Conakry, miadto ko sa embassy sa Nigeria, ug naestorya nako ang ambassador. Ako siyang giingnan nga gusto kong mosangyaw sa Guinea. Pero giingnan ko niya nga dili magpabilin didto kay basig arestohon ko o kaha mas grabe pa ang mahitabo nako. “Balik na lang sa Nigeria, ug didto pagsangyaw,” siya miingon. Pero mitubag ko, “Determinado kong magpabilin dinhi.” Busa gihangyo niya ang Minister of the Interior sa Guinea nga tabangan ko, ug gitabangan gyod ko sa minister.

Wala madugay, mibalik ko sa sangang buhatan sa Sierra Leone, ug gisultihan nako ang mga igsoon bahin sa desisyon sa minister. Lipay kaayo ang mga igsoon dihang nadunggan nila kon sa unsang paagi gipanalanginan ni Jehova ang akong biyahe. Nahatagan kog residency permit sa Guinea!

Gikan sa 1978 hangtod sa 1989, nag-alagad ko ingong tigdumala sa sirkito sa Guinea ug Sierra Leone, ug ingong substitute nga tigdumala sa sirkito sa Liberia. Sa primero, magsige kog kasakit ug usahay, didto pa gyod sa lagyo nga mga lugar. Pero ang mga igsoon naningkamot gyod nga dad-on ko sa ospital.

Dihay higayon nga grabe kong nasakit tungod sa malaria ug sa mga parasite sa akong tiyan. Dihang naulian ko, nahibaloan nako nga nagsabot na diay ang mga igsoon kon asa ko ilubong! Bisan pa niini nga mga hitabo nga hapit kong mamatay, wala gyod ko maghunahuna nga biyaan ang akong mga asaynment. Kombinsido gihapon ko nga ang Diyos lang ang tinuod nga makapanalipod nato, kay bisag mamatay ta, kaya ta niyang banhawon.

MISALIG KANG JEHOVA INGONG MAGTIAYON

Pagka-1988, nailaila nako si Dorcas, payunir nga sister nga mapainubsanon kaayo ug hamtong sa espirituwal. Nagminyo mi ug nag-uban sa pag-alagad sa sirkitong buluhaton. Si Dorcas mahigugmaon gyod nga asawa nga andam mosakripisyo. Gikan sa usa ka kongregasyon, mamaktas mig hangtod 25 kilometros (15 milya) paingon sa sunod nga kongregasyon, dala ang among mga bagahe. Sa mas lagyong mga kongregasyon, mangita mig bisan unsang kasakyan aron makaagi sa lapokon nga mga dalan, nga daghan pa gyog dagkong lungag.

Si Dorcas isog kaayo. Pananglitan, naay mga panahon nga kinahanglan ming motabok sa mga suba nga daghag buaya. Dihay higayon nga mibiyahe mig lima ka adlaw, ug kinahanglan ming motabok ug sapa pinaagig bangka kay naguba ang mga tulay. Pagtindog ni Dorcas aron monaog sa bangka, nahulog hinuon siya sa lawom nga tubig. Pareho ming dili kamaong molangoy, ug naay mga buaya niana nga sapa. Maayo na lang kay misalom ang pipila ka batan-ong lalaki ug giluwas siya. Taudtaod pod nga gidamandaman mi tungod adto nga hitabo, pero nagpadayon mi sa among asaynment.

Sa sugod sa 1992, nakurat kaayo mi ni Dorcas pagkahibalo namo nga buntis siya. Mao na ba ni kataposan sa among bug-os panahong pag-alagad? Nakahunahuna mi, “Gihatagan ta ni Jehova ug regalo!” Maong ginganlan namo ang among anak nga babaye ug Jahgift. Upat ka tuig human matawo si Jahgift, natawo pod ang iyang igsoon nga si Eric. Silang duha regalo gyod ni Jehova kanamo. Si Jahgift nakaboluntaryo sa remote translation office sa Conakry, ug si Eric ministeryal nga alagad.

Sa ngadtongadto, si Dorcas kinahanglang moundang sa pag-espesyal payunir, pero padayon gihapon siyang nag-regular payunir bisag nagpadako sa among mga anak. Sa tabang ni Jehova, nakapadayon ko sa espesyal nga bug-os panahong pag-alagad. Dihang dagko na ang among mga anak, si Dorcas nakaalagad pag-usab ingong espesyal payunir. Karon, kaming duha mga misyonaryo sa Conakry.

SI JEHOVA LANG ANG TINUOD NGA MAKAPANALIPOD NATO

Kanunay kong miadto kon asa ko gipadala ni Jehova. Gibati gyod nako ug sa akong asawa ang panalipod ug panalangin ni Jehova. Ang pagsalig kaniya nakatabang namo nga malikayan ang daghang problema ug kabalaka nga sagad naeksperyensiyahan niadtong nagsalig sa materyal nga mga butang. Base sa among mga nasinatian, nakat-onan namo nga si Jehova, ang “Diyos sa [atong] kaluwasan,” mao ray tinuod nga makapanalipod nato. (1 Cron. 16:35) Segurado ko nga ang kinabuhi sa tanang nagasalig kaniya “panalipdan gayod ni Jehova.”—1 Sam. 25:29.