Makabaton Kag Kalinaw Bisan pa sa Gubat ug Panag-away
“Sa wala pa ko magtuon ug Bibliya,” miingon si Gary, nga sundalo sa una, “wala gyod koy ideya kon nganong grabe kaayo ang kapintasan, inhustisya, ug pag-antos sa kalibotan. Pero karon naa na koy kalinaw sa hunahuna. Nahibalo ko nga bag-ohon ni Jehova nga Diyos ang tanan ug himoon niyang luwas puy-an ang kalibotan.”
Dili lang si Gary ang mibati ana. Sayra kon sa unsang paagi ang Bibliya nakatabang pod sa uban.
ANG GIINGON SA BIBLIYA: “Ikaw, Oh Jehova, maayo ug andam sa pagpasaylo.”—Salmo 86:5.
KON SA UNSANG PAAGI NI NAKATABANG: “Kini nga teksto nagpasalig nako nga maluluy-on kaayo si Jehova. Nahibalo ko nga iya gyod kong pasayloon sa tanan nakong nahimo kaniadto dihang miapil ko sa gubat.”—Wilmar, Colombia.
ANG GIINGON SA BIBLIYA: “Naglalang kog bag-ong mga langit ug bag-ong yuta; ug ang kanhing mga butang dili na hinumdoman, ug dili na kini motungha sa kasingkasing.”—Isaias 65:17.
KON SA UNSANG PAAGI NI NAKATABANG: “Naa koy post-traumatic stress disorder ug depresyon tungod sa akong mga naeksperyensiyahan sa sundalo pa ko. Pero gipahinumdoman ko ani nga teksto nga sa di madugay, tabangan ko ni Jehova nga malimtan ang tanan nakong pait nga kasinatian. Bug-os na gyod ning mawala sa akong hunahuna ug kasingkasing. Nindot gyod kaayo na nga regalo!”—Zafirah, United States.
ANG GIINGON SA BIBLIYA: “Sa iyang mga adlaw molambo ang matarong, ug ang pakigdait modagaya hangtod nga ang bulan mahanaw na.”—Salmo 72:7.
KON SA UNSANG PAAGI NI NAKATABANG: “Pirme gyod nakong mahinumdoman ni nga teksto. Sa umaabot, mawala na unya ang kahadlok tungod sa gubat, ug dili na ta mabalaka nga basig naay mahitabong dili maayo sa atong mga minahal.”—Oleksandra, Ukraine.
ANG GIINGON SA BIBLIYA: “Ang imong mga patay mabuhi. . . . Pagmata ug singgit sa kalipay, kamong nagpuyo sa abog!”—Isaias 26:19.
KON SA UNSANG PAAGI NI NAKATABANG: “Halos tanan sa akong pamilya ang gipatay dihang giatake ming mga Tutsi sa laing tribo. Pero kini nga teksto nagpasalig nako nga makita nako sila pag-usab. Eksayted kaayo kong madunggan pag-usab ang ilang mga tingog dihang mabanhaw na sila!”—Marie, Rwanda.
ANG GIINGON SA BIBLIYA: “Sa dili na madugay, ang daotan mawala na . . . Apan ang mga maaghop manag-iya sa yuta, ug mabatonan nila ang tumang kalipay tungod sa dagayang pakigdait.”—Salmo 37:10, 11.
KON SA UNSANG PAAGI NI NAKATABANG: “Bisag wala nay gubat sa among lugar, duna gihapoy inhustisya ug daotang mga tawo. Pero kining tekstoha nakatabang gyod nako. Nakita ni Jehova ang akong kahimtang ug nakasabot gyod siya nako. Nagsaad siya nga hapit na niyang wagtangon ang tanang pag-antos, ug dili na ni mahinumdoman pa.”—Daler, Tajikistan.
Ang mga tawo nga gihisgotan niini nga magasin apil sa minilyon ka Saksi ni Jehova nga nakakaplag ug kalinaw tungod sa pagtuon sa Bibliya. Nakakat-on sila kon unsaon nga mawala ang bisan unsang pagdumot nga naa sa ilang kasingkasing, tingali tungod sa rasa, nasyonalidad, o uban pang hinungdan. (Efeso 4:31, 32) Ang mga Saksi ni Jehova neyutral sa politika ug dili gyod moapil sa mga kalihokan nga nagpasiugdag kapintasan.—Juan 18:36.
Ang mga Saksi ni Jehova sa tibuok kalibotan nagtinabangay, samag pamilya nga naay tinuod nga gugma sa usag usa. (Juan 13:35) Pananglitan, si Oleksandra, nga gihisgotan ganina, kinahanglang mobalhig laing nasod uban sa iyang igsoong babaye tungod sa gubat. Siya miingon: “Pag-abot gyod namo didto, naa nay mga Saksi nga naghulat namo. Giabiabi mi nila ug ang ilang pag-atiman nakatabang gyod namo nga maka-adjust sa bag-ong nasod ingong mga refugee.”
Gidapit ka namo nga motambong sa among mga tigom aron makakat-on kag dugang sa giingon sa Bibliya bahin sa kalinaw ug kon unsay imong mahimo aron maangkon ni. Ablihi ang jw.org aron makita nimo kon asa sa among mga tigomanan ang duol sa inyo, o pagpil-ap ug request para sa libreng interactive nga pagtuon sa Bibliya uban ang usa ka Saksi ni Jehova gamit ang publikasyon nga Mabuhi Ka Hangtod sa Hangtod!