Sundoga ang Kadasig ni Jesus sa Pagsangyaw

1. Unsa ang usa ka hiyas nga nakapalahi sa katawhan ni Jehova gikan sa uban nga nag-angkong Kristohanon?

ANG mga alagad ni Jehova nailhan sa ilang kadasiga sa pagsangyaw, ug mao nay usa sa nakapalahi nila gikan sa mga nag-angkong Kristohanon. (Tito 2:14) Pero naay mga panahon nga dili kaayo ta ganahang mosangyaw. Bation tingali nato ang gibati sa usa ka kugihang ansiyano, kinsa miingon, “Usahay, wala koy ganang mosangyaw.”

2. Nganong usahay mawad-an tag kadasig sa pagsangyaw?

² Usahay, mas ganahan tang mohimo ug ubang klase sa sagradong pag-alagad imbes mosangyaw. Ngano? Kay sa dihang moapil ta sa pagpanukod ug pagmentinar sa mga pasilidad sa organisasyon, motabang niadtong naapektohan sa mga kalamidad, o modasig sa mga igsoon, makita dayon nato ang maayong mga resulta ug mobati tag kalipay. Ma-enjoy pod nato ang pagtrabaho kauban sa mga igsoon kay naay kalinaw ug gugma, ug nahibalo ta nga gipabilhan nila ang atong mga ginahimo. Sa laing bahin, daghang tuig na tingali tang nagsangyaw sa usa ka teritoryo nga wala kaayoy maayong resulta. Basin ang uban dili ganahang maminaw sa atong mensahe. Ug samtang magkaduol ang kataposan, makadahom tag mas daghang pagsupak. (Mat. 10:22) Unsay makatabang aron mamentinar o mas madugangan pa ang atong kadasig sa pagsangyaw?

3. Unsay atong makat-onan kang Jesus diha sa ilustrasyon sa Lucas 13:6-9?

³ Naa tay makat-onan sa kadasig ni Jesus sa buluhatong pagsangyaw. Sa dihang dinhi pa si Jesus sa yuta, wala gyod moawop ang iyang kadasig. Gani, samtang nagkadugay, mas nagkugi pa gyod siya. (Basaha ang Lucas 13:6-9.) Samag tig-atiman sa ubasan nga tulo ka tuig nang nag-atiman sa kahoyng igos nga wala gyod mamunga, si Jesus mga tulo ka tuig pod nga nagsangyaw sa mga Hudiyo, ug kadaghanan nila wala modawat sa mensahe. Pero sama sa tig-atiman sa ubasan nga wala mawad-ig paglaom sa kahoyng igos, wala pod mawad-ig paglaom si Jesus sa mga tawo. Hinuon, mas naningkamot siya nga matandog ang ilang kasingkasing.

4. Unsa ang upat ka butang nga atong makat-onan kang Jesus?

⁴ Niining artikuloha, atong hisgotan kon sa unsang paagi gipakita ni Jesus ang kadasig, ilabina sa kataposang unom ka bulan sa iyang ministeryo. (Tan-awa ang “After these things” nga study note sa Lucas 10:1.) Kon mokat-on ta sa iyang mga gisulti ug gihimo, makatabang ni nato nga padayong magkugi sa pagsangyaw. Atong hisgotan ang upat ka butang nga atong makat-onan kang Jesus: (1) Nagpokus siya sa kabubut-on ni Jehova, (2) gihinumdoman niya ang mga tagna sa Bibliya, (3) misalig siya sa tabang ni Jehova, ug (4) padayon siyang milaom nga naa gihapoy maminaw niya.

NAGPOKUS SIYA SA KABUBUT-ON NI JEHOVA

5. Giunsa pagpakita ni Jesus nga nagpokus siya sa kabubut-on sa Diyos?

⁵ Si Jesus madasigong nagsangyaw sa “maayong balita sa Gingharian” kay nahibalo siya nga mao ni ang gusto sa Diyos nga iyang himoon. (Luc. 4:43) Giuna gyod ni Jesus ang ministeryo kay giisip ni niya ingong pinakaimportanteng buluhaton. Bisan sa hapit nang matapos ang iyang ministeryo, miadto siya “sa mga siyudad ug kabaryohan” aron tudloan ang mga tawo. (Luc. 13:22) Nagbansay pod siyag dugang nga mga tinun-an sa pagsangyaw.—Luc. 10:1.

6. Sa unsang paagi ang buluhatong pagsangyaw konektado sa uban pang buluhaton sa pag-alagad? (Tan-awa sab ang hulagway.)

⁶ Karon, ang pagsangyaw sa maayong balita mao gihapon ang pangunang buluhaton nga gusto ni Jehova ug Jesus nga atong himoon. (Mat. 24:14; 28:19, 20) Gani, konektado sa pagsangyaw ang uban pa natong buluhaton sa pag-alagad. Pananglitan, nagtukod tag mga pasilidad o nag-alagad sa Bethel aron masuportahan ang buluhatong pagsangyaw. Naghimo tag mga disaster relief dili lang aron tabangan ang mga igsoon sa ilang mga panginahanglan kondili aron makabalik sila sa ilang espirituwal nga rutina, sama sa pagsangyaw. Kon atong hinumdoman nga importante kaayo ang pagsangyaw ug nga mao ni ang pangunang buluhaton nga gusto ni Jehova nga atong himoon, mas madasig ta nga regular nga makigbahin niini nga buluhaton. Si János, nga ansiyano sa Hungary, miingon, “Pirme nakong hinumdoman nga walay bisan unsang buluhaton sa pag-alagad ang makapuli sa pagsangyaw; mao ni ang atong pinakaimportanteng buluhaton.”

7. Nganong gusto ni Jehova nga padayon tang mosangyaw? (1 Timoteo 2:3, 4)

⁷ Mas madasig ta nga mosangyaw kon sundogon nato ang panglantaw ni Jehova sa mga tawo. Kutob sa mahimo, gusto niya nga daghang tawo ang makadungog sa maayong balita ug modawat niini. (Basaha ang 1 Timoteo 2:3, 4.) Tungod ana, iya tang gibansay aron mahimo tang mas epektibo sa pagsangyaw niini nga mensahe nga makaluwas ug kinabuhi. Pananglitan, ang brosyur nga Higugmaa ang mga Tawo—Paghimog Tinun-an naghatag ug praktikal nga mga sugyot kon unsaon nga makasugod tag panag-estorya ug makahimog tinun-an. Bisag dili pa modawat ang mga tawo sa mensahe karon, posibleng naa pa silay kahigayonan hangtod nga dili pa matapos ang dakong kasakitan. Ang atong ginasulti karon basin mahinumdoman nila nianang panahona ug magpalihok nila nga moalagad kang Jehova. Pero mahitabo lang na kon padayon tang mosangyaw.

GIHINUMDOMAN NIYA ANG MGA TAGNA SA BIBLIYA

8. Kay nahibalo si Jesus sa mga tagna sa Bibliya, giunsa niya paggamit ang iyang panahon?

⁸ Nahibalo si Jesus kon sa unsang paagi matuman ang mga tagna sa Bibliya. Pananglitan, nahibalo siya nga ang iyang ministeryo maoy tulo ra ka tuig ug tunga. (Dan. 9:26, 27) Nahibalo pod siya kon kanus-a ug kon sa unsang paagi siya mamatay. (Luc. 18:31-34) Tungod ana, gigamit niya ang iyang panahon sa pinakamaayong paagi. Nagkugi siya sa pagsangyaw aron mahuman niya ang buluhaton nga gisugo kaniya.

9. Nganong ang mga tagna sa Bibliya magpalihok nato nga padayong magkugi sa pagsangyaw?

⁹ Ang pagpamalandong sa mga tagna sa Bibliya magpalihok nato nga padayong magkugi sa pagsangyaw. Nahibalo ta nga hapit na gyong laglagon kini nga sistema. Nakita nato nga ang mga panghitabo karon ug ang kinaiya sa mga tawo nagtuman sa tagna sa Bibliya bahin sa kataposang mga adlaw. Nasabtan nato nga ang panag-away sa Anglo-Amerikanong Gahom sa Kalibotan ug sa Russia ug sa mga kaalyado niini nagtuman sa tagna bahin sa hari sa habagatan ug sa hari sa amihanan “panahon sa kataposan.” (Dan. 11:40) Nasabtan pod nato nga ang Anglo-Amerikanong Gahom sa Kalibotan mao ang girepresentahan sa tiil sa estatuwa nga gihisgotan diha sa Daniel 2:43-45. Base sa mga tagna sa Bibliya, kombinsido ta nga hapit na gyong laglagon sa Gingharian sa Diyos ang mga gobyerno sa tawo. Duol na gyod kaayo ang kataposan, maong maningkamot ta nga magkugi sa pagsangyaw sa maayong balita.

10. Unsa pay mga rason nga ang mga tagna sa Bibliya makadasig nato nga padayong mosangyaw?

¹⁰ Ang mga tagna sa Bibliya naa poy makapahupay nga mensahe nga gusto natong isulti sa uban. Si Carrie, sister nga nag-alagad sa Dominican Republic, miingon: “Ang nindot kaayong mga saad ni Jehova bahin sa umaabot nagdasig nako nga isangyaw ni sa uban.” Miingon pod siya: “Sa dihang makita nako ang mga problema nga giatubang sa mga tawo karon, makaingon ko nga kini nga mga saad dili lang para nako; para pod ni nila.” Gipakita sa mga tagna sa Bibliya nga si Jehova ang nagtabang nato sa atong buluhaton, maong dili gyod ta magduhaduha nga mosangyaw. Si Leila, nga nagpuyo sa Hungary, miingon: “Ang Isaias 11:6-9 nagdasig nako nga isangyaw ang maayong balita bisan ngadto sa mga tawo nga morag imposibleng modawat niini. Nahibalo ko nga bisan kinsa puwedeng magbag-o uban sa tabang ni Jehova.” Ug si Christopher, brader nga taga-Zambia, miingon: “Natuman gyod ang gitagna sa Marcos 13:10 nga ang maayong balita isangyaw sa tibuok kalibotan. Ug pribilehiyo kaayo para nako nga nakatabang ko sa katumanan niini.” Sa imong bahin, unsa nga mga tagna sa Bibliya ang nakadasig nimo nga mosangyaw?

MISALIG SIYA SA TABANG NI JEHOVA

11. Nganong kinahanglang mosalig si Jesus sa tabang ni Jehova aron makapadayon siya sa pagsangyaw? (Lucas 12:49, 53)

¹¹ Si Jesus misalig sa tabang ni Jehova aron makapadayon siya sa pagsangyaw. Bisag nag-amping si Jesus sa iyang isulti, nahibalo siya nga ang maayong balita sa Gingharian makapasuko sa uban ug daghan ang mosupak niini. (Basaha ang Lucas 12:49, 53.) Tungod sa pagsangyaw ni Jesus, ang relihiyosong mga lider balikbalik nga misulay sa pagpatay niya. (Juan 8:59; 10:31, 39) Pero padayong nagsangyaw si Jesus kay nahibalo siya nga si Jehova nag-uban kaniya. Siya miingon: “Wala ko mag-inusara, apan ang Amahan nga nagpadala kanako nagauban kanako. . . . Wala ko niya biyai kay kanunay nakong gibuhat ang mga butang nga makapahimuot kaniya.”—Juan 8:16, 29.

12. Giunsa pagtabang ni Jesus ang iyang mga tinun-an nga padayong mosangyaw bisan pa sa mga pagsupak?

¹² Gipahinumdoman ni Jesus ang iyang mga tinun-an nga makasalig sila sa tabang ni Jehova. Balikbalik niya silang gipasaligan nga tabangan sila ni Jehova bisan dihang makaatubang silag paglutos. (Mat. 10:18-20; Luc. 12:11, 12) Ug gitambagan niya sila nga mag-amping. (Mat. 10:16; Luc. 10:3) Gipahinumdoman pod niya sila nga dili ipamugos ang ilang mensahe niadtong dili gustong maminaw. (Luc. 10:10, 11) Ug giingnan niya sila nga moikyas kon lutoson sila. (Mat. 10:23) Bisag dasig si Jesus ug nagsalig kang Jehova, nag-amping pod siya aron dili mameligro ang iyang kinabuhi.—Juan 11:53, 54.

13. Nganong makaseguro ka nga tabangan gyod ka ni Jehova?

¹³ Gikinahanglan nato ang tabang ni Jehova aron magpabilin ang atong kadasig sa pagsangyaw bisan pa sa mga pagsupak. (Pin. 12:17) Nganong makaseguro ka nga tabangan gyod ka ni Jehova? Konsideraha ang pag-ampo ni Jesus nga narekord sa Juan kapitulo 17. Gihangyo ni Jesus si Jehova nga bantayan ang mga apostoles, ug gitubag ni Jehova ang iyang pag-ampo. Ang basahon sa Buhat naghisgot kon giunsa pagtabang ni Jehova ang mga apostoles nga padayong mosangyaw bisan pa sa mga pagsupak. Sa pag-ampo ni Jesus, iya pong gihangyo si Jehova nga bantayan kadtong mga motuo sa itudlo sa mga apostoles. Oo, apil ka sa giampo ni Jesus. Kay padayon mang gitubag ni Jehova ang pag-ampo ni Jesus, makasalig ka nga tabangan gyod ka Niya, sama nga gitabangan Niya ang mga apostoles.—Juan 17:11, 15, 20.

14. Nganong makaseguro ta nga kaya natong mosangyaw nga may kadasig bisag lisod ang kahimtang? (Tan-awa sab ang hulagway.)

¹⁴ Samtang mas magkaduol ang kataposan, mas magkalisod ang pagsangyaw sa maayong balita. Pero gipasaligan ta ni Jesus nga mabatonan nato ang tabang nga atong gikinahanglan aron makasangyaw nga may kadasig. (Luc. 21:12-15) Sama kang Jesus ug sa iyang mga tinun-an, dili nato ipamugos ang atong mensahe ug dili pod ta makiglalis. Bisan sa mga lugar nga naay restriksiyon ang atong buluhaton, padayong gisangyaw sa mga igsoon ang maayong balita kay misalig sila kang Jehova, dili sa ilang kaugalingon. Sama nga gitabangan ni Jehova ang iyang mga alagad sa unang siglo, gitabangan pod ta niya karon aron atong “matuman sa bug-os” ang pagsangyaw, hangtod moingon si Jehova nga ang buluhaton natapos na. (2 Tim. 4:17) Makaseguro ka nga kon mosalig ka kang Jehova, makapadayon ka sa pagsangyaw nga may kadasig.

PADAYON SIYANG MILAOM NGA NAA GIHAPOY MAMINAW

15. Unsay nagpakita nga positibo ang panglantaw ni Jesus sa ministeryo?

¹⁵ Positibo ang panglantaw ni Jesus sa ministeryo. Tungod ana, wala mawala ang iyang kadasig sa pagsangyaw. Pananglitan, sa hinapos nga bahin sa 30 C.E., nakita ni Jesus nga daghan ang andam maminaw sa maayong balita, ug gipakasama niya sila ug kaumahan nga hinog na aron anihon. (Juan 4:35) Mga usa ka tuig sa ulahi, giingnan niya ang iyang mga tinun-an: “Daghan ang anihonon.” (Mat. 9:37, 38) Sa laing higayon, siya miingon pag-usab: “Daghan ang anihonon . . . Hangyoa ninyo ang Agalon nga magpadalag dugang mangangani.” (Luc. 10:2) Wala gyod mawad-ig paglaom si Jesus nga naa gihapoy maminaw sa maayong balita, ug nalipay siya dihang ila ning gidawat.—Luc. 10:21.

16. Sa unsang paagi ang mga ilustrasyon ni Jesus nakatabang sa iyang mga tinun-an nga makabaton ug positibong panglantaw sa ministeryo? (Lucas 13:18-21) (Tan-awa sab ang hulagway.)

¹⁶ Gitudloan ni Jesus ang iyang mga tinun-an nga batonan ang positibong panglantaw sa ilang mensahe, nga makatabang aron dili mawala ang ilang kadasig sa pagsangyaw. Pananglitan, konsideraha ang duha sa mga ilustrasyon ni Jesus. (Basaha ang Lucas 13:18-21.) Gikompara ni Jesus ang mensahe sa Gingharian sa liso sa mustasa nga mitubo ug nahimong dakong kahoy. Nagpasabot ni nga daghang tawo ang modawat sa mensahe sa Gingharian, ug walay makapugong sa pagtubo niini. Gikompara pod ni Jesus ang mensahe ngadto sa lebadura. Ang mensahe sa Gingharian masangyaw sa daghang lugar sa tibuok kalibotan ug magdasig sa mga tawo sa paghimog mga kausaban, nga sa primero dili tingali dayon mamatikdan. Pinaagi niini nga mga ilustrasyon, gitabangan ni Jesus ang iyang mga tinun-an nga masabtan nga ang mensahe nga ilang isangyaw naa gyoy maayong resulta.

17. Nganong angay nga positibo tag panglantaw sa ministeryo?

¹⁷ Mapalihok ta nga padayong mosangyaw nga madasigon kon atong pamalandongon kon unsay napalampos niini sa tibuok kalibotan. Kada tuig, minilyong mga interesado ang motambong sa Memoryal ug magpa-Bible study. Libolibo ang mabawtismohan ug moapil na pod sa pagsangyaw. Wala ta mahibalo kon pila pay modawat sa maayong balita, pero nahibalo ta nga ginatigom ni Jehova ang dakong panon nga maluwas unya sa dakong kasakitan. (Pin. 7:9, 14) Si Jehova, ang Agalon sa pagpangani, nahibalo nga daghan pa ang modawat sa maayong balita, maong naa gyod tay maayong rason nga padayong mosangyaw.

18. Unsay gusto nato nga ikasulti sa uban bahin nato?

¹⁸ Ang mga tinun-an ni Jesus nailhan gyod nga dasig sa pagsangyaw. Sa dihang nakita sa mga tawo ang kaisog sa mga apostoles sa pagsangyaw, “ilang naamgohan nga sila nakauban ni Jesus.” (Buh. 4:13) Hinaot nga sa dihang magsangyaw ta, makaingon pod ang mga tawo nga atong gisundog ang kadasig ni Jesus!