Mga Leksiyon nga Among Nakat-onan Gikan sa Atong Dakong Instruktor

EHEMPLO SA AKONG MGA GINIKANAN

Sa ulahing bahin sa dekada sa 1950, ang akong mga ginikanan mibiya sa Italy ug mibalhin sa Kindersley, sa Saskatchewan, Canada. Wala madugay, sila nakakat-on sa kamatuoran ug nahimo ning panguna sa among kinabuhi. Niadtong bata pa ko, kanunay kong magsangyaw kauban sa among pamilya, maong usahay mangomedya ko nga otso anyos pa lang ko “oksilyare payunir” na ko!

Pobre ra ang akong mga ginikanan, pero naghatag silag maayong ehemplo sa pagkahimong andam mosakripisyo para kang Jehova. Pananglitan, niadtong 1963 daghan silag gibaligya nga mga butang aron makatambong sa internasyonal nga kombensiyon sa Pasadena, California, U.S.A. Pagka-1972, mibalhin mi sa Trail, British Columbia, Canada, nga mga 1,000 kilometros (mga 620 milya) gikan sa amoa, aron masangyawan ang mga tawong nagsultig Italian didto. Si Papa nagtrabaho ingong janitor. Gitanyagan siya nga i-promote sa trabaho, pero iya nang gibalibaran aron makapokus siya sa espirituwal nga mga kalihokan.

Mapasalamaton kaayo ko sa maayong ehemplo nga gipakita sa akong mga ginikanan para nako ug sa akong tulo ka igsoon. Mao toy sinugdanan sa espirituwal nga pagbansay nga akong nadawat, nga naglakip sa importanteng leksiyon nga pirme nakong hinumdoman: Kon unahon nako ang Gingharian, dili gyod ko pasagdan ni Jehova.—Mat. 6:33.

MISULOD SA BUG-OS PANAHONG PAG-ALAGAD

Niadtong 1980, nagminyo mi ni Debbie, usa ka guwapa ug madasigon nga sister. Gusto namong mosulod sa bug-os panahong pag-alagad, maong nagpayunir si Debbie tulo ka bulan human sa among kasal. Usa ka tuig human mi maminyo, mibalhin mi sa usa ka gamayng kongregasyon nga mas dakog panginahanglan, ug misugod pod ko sa pagpayunir.

Pero miabot ang panahon nga nawala ang among kalipay ug nagplano ming mobalhin. Nakig-estorya una mi sa tigdumala sa sirkito. Mahigugmaon ug prangka niya ming giingnan: “Apil mo sa problema. Nagpokus ra mo sa negatibong mga butang sa inyong kahimtang. Pero kon magpokus mo sa positibo, naa gyod moy makita nga maayo.” Mao gyod to ang tambag nga among gikinahanglan. (Sal. 141:5) Gipadapat dayon namo kini, ug wala madugay nakita namo nga tinuod gyod ang gisulti sa tigdumala sa sirkito. Gani, daghan diha sa kongregasyon ang gustong mohimog dugang para kang Jehova, apil na ang mga batan-on ug ang mga sister nga dili Saksi ang bana. Importante kaayo to nga leksiyon para namo. Nakakat-on mi nga magpokus sa maayong hiyas sa mga igsoon ug maghulat kang Jehova sa pagtul-id sa situwasyon. (Miq. 7:7) Nabalik ang among kalipay ug miarang-arang ang kahimtang.

Ang among mga instruktor sa Pioneer Service School nakaalagad kaniadto sa ubang mga nasod. Nagpakita silag mga picture ug ilang gihisgotan ang mga kalisdanan ug mga panalangin nga ilang naeksperyensiyahan sa ilang asaynment. Nadasig gyod mi sa ilang mga eksperyensiya, maong gihimo namong tumong nga mahimong mga misyonaryo.

Maong pagka-1984, mibalhin mi sa Quebec nga kapig 4,000 kilometros (2,485 milya) gikan sa British Columbia. Kay French man ang gigamit dinhi, kinahanglan ming mokat-on ug bag-ong pinulongan ug kultura. Gawas pa ana, kanunay pong mahurot ang among badyet. Naay higayon nga kinahanglan ming manghagdaw ug patatas aron lang naa mi makaon. Si Debbie makamaong moluto ug lainlaing recipe sa patatas! Bisan pa sa mga kalisdanan, naningkamot mi nga padayong makaalagad uban ang kalipay. Ug nakita namo nga wala gyod mi pasagdi ni Jehova.—Sal. 64:10.

Usa ka adlaw, nakadawat mig tawag sa telepono. Gidapit mi nga mag-alagad sa Bethel sa Canada. Nalipay mi, sa samang higayon, naguol pod mi kay nakapasa na mig aplikasyon para sa Gilead School. Pero gidawat namo ang imbitasyon nga mag-alagad sa Bethel. Pag-abot namo sa Bethel, nangutana mi kang Brader Kenneth Little, nga membro sa Branch Committee, “Unsay among himoon kay nakapasa na ra ba mig aplikasyon sa Gilead?” Siya mitubag, “Ayaw lang sa na sobrang hunahunaa sa pagkakaron.”

Paglabay sa usa ka semana, nadawat namo ni Debbie ang imbitasyon nga moeskuwela sa Gilead. Maong kinahanglan ming mohimog desisyon. Gisultihan mi ni Brader Little: “Bisan unsa pay inyong pilion, posibleng moabot gihapon ang panahon nga makaingon mo nga maayo untag lahi ang inyong gipili. Parehas na nga pribilehiyo, ug panalanginan na ni Jehova.” Gipili namo ang pag-eskuwela sa Gilead, ug paglabay sa mga tuig, nakita namo nga tinuod gyod ang tambag ni Brader Little. Kanunay namong gamiton ang mga pulong ni Brader Little sa pagtambag sa uban dihang maglibog sila kon unsa nga asaynment ang ilang pilion.

INGONG MGA MISYONARYO

Eksayted kaayo mi nga apil mi sa 24 ka estudyante nga moeskuwela sa ika-83 nga klase sa Gilead. Gihimo to sa Brooklyn, New York niadtong Abril 1987. Si Brader Ulysses Glass ug Jack Redford ang among pangunang mga instruktor. Paspas nga milabay ang lima ka bulan, ug mi-graduate mi pagka-Septiyembre 6, 1987. Giasayn mi sa Haiti uban ni John ug Marie Goode.

Sukad sa 1962, dihang ang mga misyonaryo sa Haiti gipapahawa sa nasod, wala nay mga misyonaryo nga gikan sa Gilead ang giasayn didto. Tulo ka semana human sa among graduwasyon, didto na mi nag-alagad sa hilit kaayo nga lugar sa Haiti ug nagpasakop sa gamayng kongregasyon nga 35 ra ang magmamantala. Dili to sayon kay kami rang duha sa missionary home. Kulang pa mig kasinatian maong wala kaayo mi ideya kon unsay among buhaton. Ang mga tawo didto pobre kaayo ug kadaghanan nila dili makamaong mobasa. Niadtong mga panahona, gubot kaayo ang kahimtang. Ang mga tawo nagrebelde sa gobyerno ug nagprotesta, ug ang mga dalan ilang gipang-alihan ug gipangsunog. Naa poy mga bagyo didto.

Ang mga igsoon sa Haiti malahutayon ug malipayon bisan pa sa ilang kahimtang, ug daghan gyod mig nakat-onan nila. Daghan nila ang nakasinatig kalisdanan, pero gimahal gihapon nila si Jehova ug ang ilang ministeryo. Pananglitan, naay tigulang nga sister nga dili makamaong mobasa, pero naka-memorize siya ug 150 ka teksto. Tungod sa lisod nga mga kahimtang didto, mas milig-on ang among determinasyon nga padayong isangyaw ang mensahe sa Gingharian ingong bugtong solusyon sa mga problema sa tawo. Nakabalita mi nga ang among mga Bible study sa una nahimo nang mga regular payunir, espesyal payunir, ug ansiyano. Natandog gyod mi ato.

Samtang naa mi sa Haiti, nailaila nako si Trevor, usa ka batan-ong misyonaryo sa Mormons. Naay mga higayon nga naghisgot mi bahin sa Bibliya. Paglabay sa mga tuig, nakadawat kog sulat gikan niya, ug wala ko magdahom adto. Siya miingon: “Magpabawtismo na ko sa sunod nga asembliya! Gusto kong mobalik sa Haiti ug moalagad ingong espesyal payunir sa lugar diin naasayn ko kaniadto ingong misyonaryo sa Mormons.” Ug mao gyod nay iyang gihimo sulod sa daghang tuig uban sa iyang asawa.

NAASAYN SA EUROPE—DAYON SA AFRICA

Sa ngadtongadto, giasayn mi sa usa ka nasod sa Europe dihang medyo miluag na ang restriksiyon sa atong buluhaton didto. Pagka-1992, nakaabot mi sa Ljubljana, Slovenia, duol sa lugar diin nagdako ang akong mga ginikanan sa wala pa sila mobalhin sa Italy. Nagpadayon pa gihapon niadto ang giyera sa mga lugar sa kanhing Yugoslavia. Niadtong panahona, ang buluhatong pagsangyaw didto maoy ubos sa pagdumala sa sangang buhatan sa Vienna, Austria, ug sa mga opisina sa Zagreb, Croatia, ug Belgrade, Serbia. Kini nga mga nasod naay kaugalingong mga kahikayan sa Bethel.

Nagpasabot ni nga kinahanglan na pod ming mokat-on ug bag-ong pinulongan ug kultura. Ang mga taga-Slovenia sagad moingon, “Jezik je težek,” nga nagkahulogang “Lisod ang among pinulongan.” Ug lisod gyod tuod to! Nakadayeg gyod mi sa pagkamaunongon sa mga igsoon nga andam modawat sa mga kabag-ohan sa organisasyon ug nakita namo nga gipanalanginan sila ni Jehova. Nakita na pod namo nga si Jehova mahigugmaon gyod nga magtul-id sa mga butang sa hustong panahon. Sa mga tuig nga nag-alagad mi sa Slovenia, nakatabang gyod namo ang mga leksiyon nga among nakat-onan sa kanhi namong mga asaynment. Ug nakakat-on pod mig bag-ong mga leksiyon.

Pero naa na poy mga kausaban sa among asaynment. Pagka-2000, giasayn mi sa Côte d’Ivoire, sa West Africa. Dayon pagka-Nobyembre 2002, tungod sa giyera gipabalhin mi ngadto sa Sierra Leone. Niadtong panahona, bag-o ra nahuman ang 11 ka tuig nga giyera sa Sierra Leone. Lisod gyod to kay kalit kaayo ang among pagbiya sa Côte d’Ivoire. Pero ang mga leksiyon nga among nakat-onan nakatabang namo nga magpabiling malipayon.

Nagpokus mi sa daghang tawo nga gustong makakat-on sa kamatuoran ug sa mahigugmaong mga igsoon nga dugaydugay pong nag-antos tungod sa giyera. Pobre ang mga igsoon, pero gusto nilang mohatag kon unsay naa nila. Naay sister nga naghatag ug mga sinina kang Debbie. Sa primero, si Debbie nagduhaduha sa pagdawat, pero ang maong igsoon miinsistir ug miingon: “Panahon sa giyera, gisuportahan mi sa mga igsoon sa lainlaing lugar. Karon kami na poy motabang sa mga igsoon.” Naningkamot gyod mi nga masundog ang ilang maayong ehemplo.

Sa ngadtongadto, mibalik mi sa Côte d’Ivoire, pero nagkagubot na pod didto tungod sa politika. Maong pagka-Nobyembre 2004, mibiya mi ni Debbie sakay sa helicopter, ug tig-usa ra nga bag ang among nadala. Pagkagabii, natulog mi sa salog sa kampo sa French nga mga sundalo, ug pagkaugma, mibiya mi paingon sa Switzerland. Dihang niabot mi sa sangang buhatan sa halos tungang gabii, ang Branch Committee ug ang mga instruktor sa Ministerial Training School kauban sa ilang mga asawa, mainitong nag-abiabi namo. Ila ming gigakos, giandaman ug laming pagkaon ug daghang lami nga Swiss chocolate. Nakapatandog gyod to namo.

Temporaryo ming giasayn sa Ghana, ug dayon giasayn mig balik sa Côte d’Ivoire dihang dili na kaayo gubot didto. Ang pagkamaayo sa mga igsoon nakatabang namo nga malahutay ang kahasol sa pagsigeg bakwet ug sa among temporaryong mga asaynment. Tinuod nga sulod sa organisasyon ni Jehova, normal lang nga magpakitag gugma ang mga igsoon. Pero nagsabot mi ni Debbie nga di gyod namo kalimtan ang gugma nga gipakita kanamo. Gani, kadtong lisod nga mga kahimtang giisip namo nga importanteng bahin sa among pagbansay.

GIASAYN SA MIDDLE EAST

Pagka-2006, nakadawat mig sulat gikan sa world headquarters nga nagpahibalo namo nga iasayn mi sa Middle East. Nagpasabot ni nga kinahanglan na pod ming mag-adjust sa bag-ong palibot, pinulongan, ug kultura. Lisod pod to kay daghang tawo sa Middle East ang panatiko sa politika ug relihiyon. Ganahan mi kay bisag lainlain ug pinulongan ang mga igsoon sa mga kongregasyon, nagkahiusa gihapon sila tungod kay nagsunod sila sa direksiyon sa organisasyon. Kadaghanan sa mga igsoon gisupak sa ilang mga pamilya, schoolmate, katrabaho, ug silingan. Pero milahutay gihapon sila, ug napalig-on mi sa ilang maayong ehemplo.

Niadtong 2012, mitambong mi sa espesyal nga kombensiyon sa Tel Aviv, Israel. Kini nga kombensiyon mao ang unang higayon nga nagkatigom ang daghang alagad ni Jehova niining dapita sukad niadtong Pentekostes 33 C.E. Talagsaon gyod to!

Niadtong mga tuiga, gipaduaw mi sa nasod diin gidili ang atong buluhaton. Nagdala mig mga literatura didto, miuban ug sangyaw, ug mitambong ug gagmayng mga asembliya. Makakita ka didto bisag asa ug mga sundalo nga nagbitbit ug armas ug daghag checkpoint, maong nag-amping mi sa pagbiyahe kauban sa pipila lang ka igsoon. Ug mibati ming luwas.

GIASAYN UG BALIK SA AFRICA

Pagka-2013, nakadawat mig talagsaon nga asaynment nga moalagad sa sangang buhatan sa Kinshasa, Congo. Kini nga nasod dako ug nindot kaayo, pero pobre ni ug nakasinatig daghang giyera. Sa primero, miingon mi, “Dili ra ni lisod kay nakaalagad na mi sa Africa.” Pero nasayop mi. Dili diay sayon didto, ug lisod ang pagbiyahe kay walay tarong nga kalsada o tulay didto. Pero nagpokus mi sa positibong mga butang—ang pagkamalahutayon ug pagkamalipayon sa mga igsoon bisan sa kalisod sa panginabuhi, ang ilang gugma sa ministeryo, ug ang ilang paningkamot sa pagtambong sa mga tigom ug asembliya. Nakita namo nga paspas ang pag-uswag sa buluhaton didto tungod sa tabang ug panalangin ni Jehova. Napalig-on gyod mi sa mga tuig nga nag-alagad mi sa bug-os panahon didto sa Congo, ug nadugangan ang among espirituwal nga pamilya.

Sa hinapos sa 2017, naa na pod mi laing asaynment. Giasayn mi sa South Africa. Kini ang kinadak-ang sangang buhatan nga among naalagaran, ug bag-o pod para sa amo ang among mga asaynment sa Bethel. Daghan mig angayng makat-onan dinhi, pero nakatabang gyod namo ang mga leksiyon nga among nakat-onan sa miagi. Gimahal gyod namo ang mga igsoon nga maunongong milahutay sulod sa daghang katuigan. Ug nadasig gyod mi kay bisag ang mga Bethelite lainlain ug rasa ug kultura, nagkahiusa gihapon sila. Klaro kaayo nga gipanalanginan ni Jehova ug kalinaw ang iyang katawhan kay naningkamot sila sa pagsul-ob sa bag-ong personalidad ug pagpadapat sa mga prinsipyo sa Bibliya.

Sulod sa daghang katuigan, nakadawat mi ni Debbie ug talagsaong mga asaynment, nag-adjust sa lainlaing kultura, ug nagkat-on ug bag-ong mga pinulongan. Dili gyod to sayon, pero kanunay namong gibati ang maunongong gugma ni Jehova pinaagi sa iyang organisasyon ug sa mga igsoon. (Sal. 144:2) Ang pagbansay nga among nadawat sa bug-os panahong pag-alagad nakatabang namo nga mahimong mas maayong alagad ni Jehova.

Ako gyong gipabilhan ang maayong pagmatuto sa akong mga ginikanan kanako, ang suporta sa akong minahal nga asawa nga si Debbie, ug ang maayong ehemplo sa mga igsoon sa lainlaing lugar. Wala mi mahibalo ni Debbie kon unsaon mi paggamit ni Jehova sa umaabot, pero determinado mi nga padayong mokat-on gikan sa atong Dakong Instruktor.