Bisan pag Maulawon Ko, Nahimo Kong Misyonaryo

Natawo ko niadtong 1951 sa Vienna, Austria, ug Katoliko ang akong pamilya. Nagtuo ko sa Diyos ug kanunay kong nag-ampo niya, pero maulawon kaayo ko. Niadtong nuybe anyos ko, nagpa-Bible study si Papa sa mga Saksi ni Jehova, ug wala madugay nagpa-Bible study pod si Mama.

Nagpasakop mi sa kongregasyon sa Döbling, sa Vienna. Ingong pamilya, dungan ming magbasa ug magtuon sa Bibliya, motambong sa mga tigom, ug moboluntaryo panahon sa mga asembliya. Sukad sa bata pa ko, gitudloan ko ni Papa nga higugmaon gyod si Jehova. Gani, kanunayng iampo ni Papa nga ako ug ang akong igsoong babaye mahimong mga payunir. Pero dili kana ang akong tumong niadtong panahona.

NAGSUGOD SA BUG-OS PANAHONG PAG-ALAGAD

Pagka-1965, nabawtismohan ko sa edad nga 14. Pero nalisdan ko sa pagpakig-estorya sa mga tawo diha sa ministeryo. Gibati pod nako nga mas ubos ko kay sa ubang mga batan-on ug gusto nako nga ila kong dawaton. Wala madugay human ko mabawtismohi, nakigbarkada ko sa mga wala magsimba kang Jehova. Bisag ganahan kong makig-uban nila kanunay, makonsensiya ko kay dili sila alagad ni Jehova. Pero naglisod kog biya nila. Unsay nakatabang nako?

Naay 16 anyos nga sister nga ginganlag Dorothée nga nagpasakop sa among kongregasyon. Nadasig gyod ko sa iyang kakugi sa pagsangyaw. Bisag mas magulang ko niya gamay, mas kugihan siyang mosangyaw. Maong nakahunahuna ko: ‘Saksi ang akong mga ginikanan, pero si Dorothée ray Saksi sa iyang pamilya. Nag-atiman pa gyod siya sa iyang masakitong inahan, pero pirme siyang mosangyaw.’ Ang iyang maayong ehemplo nakadasig nako nga mohimo pag dugang para kang Jehova. Sa wala madugay, nahimo nakong partner si Dorothée sa pagpayunir. Una, nahimo ming mga oksilyare payunir, nga gitawag kaniadto ug vacation pioneer. Ug dayon nag-alagad mi ingong mga regular payunir. Makatakod gyod ang kadasig ni Dorothée. Iya kong gitabangan nga masugdan ang akong unang Bible study. Maong sa ngadtongadto, mas sayon na para nako ang pagpakig-estorya sa mga tawo diha sa ilang balay, sa dalan, ug bisan asa.

Sa akong unang tuig sa pagpayunir, naay brader nga ginganlag Heinz nga mibalhin sa among kongregasyon. Nakakat-on siya sa kamatuoran sa Canada dihang mibisita siya sa iyang magulang nga Saksi. Si Heinz giasayn sa among kongregasyon sa Vienna ingong espesyal payunir. Nakagusto dayon ko niya. Gusto siyang mahimong misyonaryo, pero wala sa akong plano nga magmisyonaryo. Maong sa primero, akong gitago ang akong pagbati para niya. Pero sa ulahi, nagkatrato mi, nagminyo, ug nag-alagad sa Austria ingong mga payunir.

GIHIMONG TUMONG ANG PAGMISYONARYO

Pirme kong sultihan ni Heinz nga gusto gyod niyang magmisyonaryo. Wala ko niya pugsa nga magmisyonaryo, pero iya kong gidasig pinaagi sa pagpangutana, “Kay wala man tay mga anak, naa pa ba kaha tay dugang mahimo sa pag-alagad kang Jehova?” Tungod kay maulawon man ko, nahadlok ko nga magmisyonaryo. Okey ra nako ang pagpayunir, pero dili gyod nako ma-imagine ang akong kaugalingon nga mahimong misyonaryo. Bisan pa ana, mapailobon gyod si Heinz nako, ug pirme ko niyang dasigon nga mas magpokus sa mga tawo imbes sa akong kaugalingon. Nakatabang gyod nako ang iyang tambag.

Paglabay sa panahon, giganahan na ko nga mahimong misyonaryo, maong miaplay mi sa Gilead School. Pero giingnan ko sa branch servant nga kinahanglan pa kong magtuon ug dugang sa English nga pinulongan. Human sa tulo ka tuig nga pagpraktis ug English, nasorpresa mi kay giasayn mi sa usa ka kongregasyon sa Salzburg, Austria, nga nagsultig Serbo-Croatian nga pinulongan. Nag-alagad mi didto sulod sa pito ka tuig, ug ang usa ka tuig niana maoy sa sirkitong buluhaton. Lisod ang Serbo-Croatian nga pinulongan, pero daghan mig Bible study.

Dayon pagka-1979, gihangyo mi nga “magbakasyon” sa Bulgaria. Gidili ang buluhatong pagsangyaw didto, maong wala gyod mi makasangyaw panahon sa among “bakasyon.” Pero sekreto ming nagdala ug gipagamay nga mga literatura para sa lima ka sister nga nagpuyo sa Sofia, ang kaulohang siyudad sa Bulgaria. Gikulbaan kaayo ko adto, pero gitabangan ko ni Jehova. Ang kaisog nga gipakita sa maong mga sister ug ang kalipay nga ilang gibati bisan pag nameligro silang mapriso nakadasig nako nga himoon ang akong maarangan sa bisan unsang asaynment nga ihatag kanako sa organisasyon ni Jehova.

Miaplay mig balik sa Gilead, ug nakadawat mig imbitasyon. Abi namog paeskuwelahon mi sa United States gamit ang English nga pinulongan. Pero pagka-Nobyembre 1981, gisugdan didto sa Wiesbaden, Germany, ang Gilead Extension School. Ug kay German nga pinulongan man ang gigamit sa klase, mas sayon ni nakong masabtan. Asa kaha mi iasayn?

NAG-ALAGAD SA GUBOT KAAYO NGA NASOD

Giasayn mi sa Kenya. Pero ang sangang buhatan sa Kenya naghangyo namo nga moalagad sa duol nga nasod sa Uganda. Mga 10 ka tuig una pa niana, nasakop ni Heneral Idi Amin ang gobyerno sa Uganda. Panahon sa iyang pagmando, libolibo ang gipamatay ug milyonmilyong tawo ang nag-antos. Dayon pagka-1979, ang gobyerno nga gimandoan ni Idi Amin giilog sa iyang mga kaaway. Kanay hinungdan kon nganong nahadlok ko nga mobalhin niini nga nasod. Pero gitabangan mi sa Gilead nga mosalig kang Jehova. Maong gidawat namo ang asaynment.

Lisod kaayo ang kahimtang sa Uganda. Mao ni ang giingon ni Heinz diha sa 2010 Tinuig nga Basahon: “Ang daghang serbisyo nadaot, . . . sama sa suplay sa tubig ug komunikasyon. . . . Ang mga pagpinusilay ug pagpangawat nahimong ordinaryo na lamang ilabina sa magabii. . . . Ang tanan anaa na sa sulod sa balay nga nag-ampo nga unta molabay ang gabii nga walay daotang tawo nga mosulod sa ilang balay.” Pero bisag lisod kaayo ang ilang kahimtang, ang mga igsoon didto malipayong nag-alagad kang Jehova.

Pagka-1982 nakaabot mi ni Heinz sa Kampala, ang kaulohang siyudad sa Uganda. Sulod sa unang lima ka bulan, nagpuyo mi sa balay ni Sam ug Christina Waiswa uban sa ilang lima ka anak ug upat ka paryente. Nakadayeg gyod mi sa pagkamaabiabihon sa pamilyang Waiswa. Kasagaran, kas-a ra sa usa ka adlaw sila mokaon, pero naningkamot gyod sila nga mohatag kon unsay naa nila. Daghan gyod mig nakat-onan nga praktikal nga mga leksiyon sa among pagpakig-uban sa pamilyang Waiswa, nga nakatabang namo sa among pagmisyonaryo. Pananglitan, nakakat-on mi nga dili mag-usik ug tubig. Ang among ikaligo nga tubig among saloron ug maoy among gamiton para sa kasilyas. Pagka-1983, mibalhin mi ni Heinz sa mas luwas nga lugar sa Kampala.

Nag-enjoy gyod mi sa among ministeryo. Pananglitan, dihay bulan nga nakatanyag mi ug kapig 4,000 ka magasin. Ganahan kaayo mi sa mga tawo didto, kay gitahod nila ang Diyos ug gusto silang makig-estorya bahin sa Bibliya. Kami ni Heinz kasagarang magdumala ug tig-10 ngadto sa 15 ka Bible study. Ug daghan kaayo mig nakat-onan gikan nila. Pananglitan, bisag magbaktas lang sila padulong ug pauli gikan sa tigom kada semana, wala gyod sila moreklamo ug kanunay silang malipayon.

Pagka-1985 ug 1986, naa na poy nahitabong duha ka giyera sa Uganda. Sagad makakita mig mga bata nga gihimong sundalo nga nagbitbit ug tag-as nga mga armas ug maoy nagbantay sa mga checkpoint. Kanunay ming moampo kang Jehova nga tabangan mi nga makahimog maalamong desisyon ug makabaton ug kalmadong kasingkasing samtang nangita mig mga interesado diha sa ministeryo. Ug gitubag gyod ni Jehova ang among mga pag-ampo. Mawala ang among kahadlok dihang makakita mig mga interesado nga modawat sa mensahe sa Gingharian.

Nag-enjoy pod mi sa pagsangyaw sa mga foreigner. Pananglitan, among nailhan ug nadumalahag pagtuon sa Bibliya si Murat ug Dilbar Ibatullin, magtiayon nga gikan sa Tatarstan (Central Russia). Si Murat maoy usa ka doktor. Kini nga magtiayon nabawtismohan ug matinumanon silang nag-alagad kang Jehova hangtod karon. Dayon, nailhan nako si Tatjana Vileyska, babaye nga gikan sa Ukraine nga naghunahuna nga magpakamatay. Human mabawtismohi si Tatjana, siya mibalik sa Ukraine ug sa ulahi nag-alagad ingong translator sa atong mga publikasyon.a

BAG-ONG ASAYNMENT

Pagka-1991, dihang mibakasyon mi ni Heinz sa Austria, nakadawat mig sulat gikan sa sangang buhatan ug gipahibalo mi bahin sa among bag-ong asaynment: sa Bulgaria. Human mapukan ang komunismo sa Eastern Europe, nahimong legal ang kalihokan sa mga Saksi ni Jehova sa Bulgaria. Sa ako nang nahisgotan, kami ni Heinz sekretong nagdalag mga literatura nianang nasora dihang gidili pa ang buluhaton didto. Pero karon gipadala na mi didto aron mosangyaw.

Gihatagan mig direksiyon nga dili mobalik sa Uganda ug moderetso na sa Bulgaria. Maong wala na mi makapanghipos sa among mga gamit ug wala na mi makapanamilit sa mga igsoon sa Uganda. Miadto mi sa Bethel sa Germany, ug gikan didto nagdrayb mi paingon sa Bulgaria. Giasayn mi sa usa ka grupo sa Sofia nga naay mga 20 ka magmamantala.

Dili sayon ang among asaynment didto sa Bulgaria. Una, dili mi makasabot sa ilang pinulongan. Ikaduha, duha lang ka publikasyon niadtong panahona ang gihubad sa Bulgarian nga pinulongan: Ang Kamatuoran nga Motultol sa Kinabuhing Dayon ug Akong Basahon sa mga Estorya sa Bibliya. Ikatulo, nalisdan mi sa pagpangitag Bible study. Bisan pa niini, ang among gamay pero madasigong grupo nagmauswagon. Wala malipay ang Orthodox Church sa Bulgaria sa among buluhatong pagsangyaw, ug ila ming gilutos.

Pagka-1994, ang mga Saksi ni Jehova wala na ilha sa gobyerno ingong relihiyon, ug daghang tawo ang naghunahuna nga peligroso mi nga sekta. Daghang igsoon ang gidakop. Ang media nagpakaylap ug dili tinuod nga mga impormasyon bahin namo. Miingon sila nga pasagdan ra kuno sa mga Saksi ni Jehova ang ilang mga anak nga mamatay ug gikombinsir daw nila ang ubang mga Saksi nga magpakamatay. Maong lisod para namo ni Heinz nga mosangyaw. Kanunay ming makahibalag ug isog nga mga tawo. Ila ming singgitan, isumbong sa mga polis, ug bisan unsa ray ilang ilabay namo. Dili puwede nga magpasulod ug mga literatura sa nasod ug lisod ang pag-abang ug dapit nga tigomanan. Panahon sa usa ka kombensiyon, naay mga polis nga nangabot ug ila ming gipahunong. Wala mi maanad ni Heinz nga ang mga tawo masuko namo, kay sa Uganda ang mga tawo ganahang maminaw bahin sa Bibliya ug mahigalaon. Unsay nakatabang namo?

Nakatabang gyod namo ang pagpakig-uban sa mga igsoon. Nalipay sila nga ilang nakaplagan ang kamatuoran ug mapasalamaton sila sa among pagtabang nila. Suod kaayo mi sa mga igsoon ug nagtinabangay mi. Nakat-onan namo ni Heinz nga puwede ming magmalipayon sa bisan unsang asaynment basta unahon namo ang kaayohan sa uban, imbes magsigeg hunahuna sa among mga problema.

Paglabay sa panahon, miarang-arang ra ang kahimtang, ug dili na kaayo estrikto ang gobyerno sa atong buluhaton. Pagka-1998, narehistro ug balik ang atong organisasyon ingong relihiyon, ug daghang publikasyon ang nahubad sa Bulgarian nga pinulongan. Dayon pagka-2004, gidedikar ang usa ka bag-ong pasilidad sa sangang buhatan. Karon, naa nay 57 ka kongregasyon ug 2,953 ka magmamantala sa Bulgaria. Sa miaging tuig sa pag-alagad, 6,475 ang mitambong sa Memoryal. Sa una, naa ray lima ka sister sa Sofia, pero karon naa nay siyam ka kongregasyon didto. Nakita gyod namo nga “ang diyutay [nahimong] usa ka libo.”—Isa. 60:22.

MILAHUTAY BISAN PA SA MGA PROBLEMA

Paglabay sa panahon, daghan na kog gipangbati sa lawas. Nadayagnos sa mga doktor nga naa koy mga tumor, apil na ang akong tumor sa utok. Nagpa-radiation therapy ko ug miadto sa India aron magpaopera. Dose ka oras kong gioperahan ug nakuha nila ang dakong bahin sa akong tumor. Human sa operasyon, gipaestar mi sa Bethel sa India hangtod nga naka-recover ko. Dayon, mibalik mi sa among asaynment sa Bulgaria.

Nadayagnos pod si Heinz nga naay Huntington’s disease, usa ka dili komon nga kondisyon. Maglisod siya sa paglakaw ug pagsulti, ug maglisod pod siyag kontrol sa iyang paglihok. Samtang nagkagrabe ang iyang sakit, mas nagkinahanglan si Heinz sa akong pag-atiman. Usahay, mobati kog grabeng kakapoy, ug nabalaka ko nga basin dili na nako siya kayang atimanon. Pero naay usa ka batan-ong brader nga ginganlag Bobi nga kanunayng mouban kang Heinz sa pagsangyaw. Wala ra ikaulaw ni Bobi si Heinz bisan pag maglisod siyag sulti ug maglisod ug kontrol sa iyang paglihok. Dihang dili ko makahimo sa pag-atiman kang Heinz, andam gyod si Bobi sa pagtabang. Bisag wala mi anak ni Heinz niini nga sistema, giisip namo si Bobi ingong anak ug regalo gikan kang Jehova.—Mar. 10:​29, 30.

Nadayagnos pod si Heinz nga naay kanser. Makapaguol kay namatay ang akong pinalanggang bana niadtong 2015. Gimingaw gyod ko kang Heinz. Siya ang nagtabang nako nga dili sobrang mabalaka, maong maglisod kog dawat nga wala na siya. Pero sa akong hunahuna, buhi kaayo siya. (Luc. 20:38) Mahinumdom ko kada adlaw sa iyang mahigugmaong pagdasig ug mga tambag. Mapasalamaton kaayo ko sa mga tuig nga nag-uban mi sa pag-alagad nga matinumanon kang Jehova.

MAPASALAMATON SA TABANG NI JEHOVA

Gitabangan gyod ko ni Jehova nga makalahutay sa tanan nakong pagsulay. Gitabangan pod ko niya nga masuklan ang akong pagkamaulawon ug mahimong misyonaryo nga nahigugma sa mga tawo. (2 Tim. 1:7) Sa tabang ni Jehova, ako ug ang akong manghod nga babaye parehas nga naa sa bug-os panahong pag-alagad. Karon, siya ug ang iyang bana naa sa sirkitong buluhaton, nga nagduaw sa mga kongregasyon sa Europe nga nagsultig Serbian. Gitubag gyod ni Jehova ang giampo ni Papa para namo niadtong mga bata pa mi!

Sa matag higayon nga magtuon kog Bibliya, mobati kog kalinaw. Sa lisod nga mga panahon, nakakat-on ko nga moampo nga “tibuok kasingkasing,” sama sa gihimo ni Jesus. (Luc. 22:44) Gitubag ni Jehova ang akong mga pag-ampo pinaagi sa gugma ug pagkamaayo sa mga igsoon sa among kongregasyon sa Nadezhda, Sofia. Kanunay ko nilang imbitahon ug sultihan nga ila kong gimahal, ug nakapalipay gyod na nako.

Kanunay kong mamalandong bahin sa pagkabanhaw. Mag-imagine ko kang Papa ug Mama nga naa sa atubangan sa among balay, nga guwapo ug guwapa sama sa panahon nga gikasal sila. Mag-imagine pod ko sa akong igsoon nga nag-andam ug pagkaon ug ni Heinz nga nagtindog tapad sa iyang kabayo. Ang pagpamalandong niini nakatabang nako nga dili malumsan sa negatibong mga pagbati ug mahimong mas mapasalamaton kang Jehova.

Dihang mamalandong ko sa mga panalangin ni Jehova kanako karon ug sa umaabot, mouyon gyod ko sa mga pulong ni David sa Salmo 27:​13, 14: “Unsa na kahay nahitabo kanako kon wala pa koy pagtuo nga makita nako ang pagkamaayo ni Jehova samtang buhi pa ko? Laom kang Jehova; magmaisogon ug lig-ona ang imong kasingkasing. Oo, laom kang Jehova.”