Nagkagrabeng Problema sa Kamingaw—Ang Giingon sa Bibliya

Sumala sa survey nga bag-o lang gihimo sa lainlaing bahin sa kalibotan,a mga usa sa upat ka tawo ang mibatig kamingaw.

• “Ang pagbati nga nag-inusara puwedeng mahitabo kang bisan kinsa, bisag pila pay edad ug bisag asa pa nagpuyo.”—Chido Mpemba, cochair sa Commission on Social Connection sa World Health Organization.

Ang uban naghunahuna nga ang mga edaran ug kadtong nag-inusara lang ang mobatig kamingaw. Pero ang tinuod, apektado pod niini bisan kadtong mga batabata pa, himsog, maayog kahimtang sa kinabuhi, ug minyo. Ang kamingaw ug ang pagbati nga nag-inusara makadaot sa emosyon ug panglawas sa usa ka tawo.

• “Ang kamingaw dili lang kay basta negatibo nga pagbati,” miingon si Dr. Vivek Murthy, usa ka surgeon general sa U.S. Siya midugang: “Ang risgo nga mamatay tungod sa pagbati nga nag-inusara parehas sa risgo sa pagpanigarilyog 15 ka sigarilyo kada adlaw.”

Ang giingon sa Bibliya

Dili gusto sa atong Maglalalang nga mobati tang nag-inusara. Katuyoan sa Diyos nga ang mga tawo magmalipayon sa pagpakig-uban sa ilang pamilya ug mga higala.

• Prinsipyo sa Bibliya: ‘Ang Diyos miingon: “Dili maayo nga padayong mag-inusara ang tawo.”’—Genesis 2:18.

Gusto sa Diyos nga masuod ta niya. Nagsaad siya nga makigsuod siya nato kon maningkamot ta nga makigsuod niya.—Santiago 4:8.

• Prinsipyo sa Bibliya: “Malipayon kadtong mahunahunaon sa ilang espirituwal nga panginahanglan, kay ila ang Gingharian sa langit.”—Mateo 5:3.

Gusto sa Diyos nga naa tay mga kauban sa pagsimba niya. Kon ato ning himoon, mas magmalipayon ta.

• Prinsipyo sa Bibliya: “Hunahunaon nato ang usag usa aron magdinasigay sa pagpakitag gugma ug sa paghimog maayong mga buhat, nga dili pasagdan ang atong mga panagkatigom, . . . apan dasigon ang usag usa.”—Hebreohanon 10:24, 25.

Para sa dugang impormasyon kon nganong importante nga likayan ang kamingaw, basaha ang artikulo nga “Kamingaw sa Kalibotan nga Daghag Paagi sa Pagpakigkomunikar.”