Nganong Daghan Kaayong Tawo ang Mamingawon?

SA ATONG katilingban karon, daghang tawo ang nakasinatig kamingaw. Naagoman kini sa mga tawo sa tanang pangedaron, rasa, kahimtang sa kinabuhi, ug relihiyon. Mibati ka na bag kamingaw sukad? Mamingawon ka ba karon? Sa pagkatinuod, dunay mga panahon nga ang matag usa kanato mibati ug panginahanglan sa panag-ubanay​—nga may usa nga magpatalinghog kanato, maghatag kanatog pasalig o mopahayag ug pag-uyon sa atong lalom nga mga pagbati o kinailadmang mga hunahuna, ug makasabot kanato ingong indibiduwal. Aduna kitay panginahanglan sa usa kinsa sensitibo sa atong mga pagbati.

Apan, kon kita nag-inusara, wala kana kanunayng nagpasabot nga kita mamingawon na. Ang usa ka tawo mahimong mag-inusara sa taastaas nga panahon, nga malingaw ra sa iyang ginabuhat, nga dili gayod batiog kamingaw. Sa kasukwahi, adunay mga tawo nga dili makaagwanta nga mag-inusara. Ang The American Heritage Dictionary nag-ingon: “Ang pulong nga nag-inusara nagkahulogan ug pagkanahimulag gikan sa uban apan wala kanunayng nagpasabot ug pagkamagul-anon. . . . Ang mamingawon kasagarang nagpasabot ug kaguol gumikan sa pag-inusara ug kahidlaw sa panag-ubanay,” sa ato pa, kini maoy usa ka kahimtang diin ang usa ka tawo naguol, nasakit, o nasubo. Gikinahanglan sa maong tawo ang paghupay sa sinsero ug mahigugmaong mga higala aron siya magmalipayon pag-usab.

Ang kamingaw maoy bug-at kaayo nga pagbati, ug masakit kaayo kini. Tungod niini, mobati kitag kahaw-ang. Mobati kitang nag-inusara, nga daw nahimulag kita gikan sa ubang mga tawo. Makapaluya kini sa

atong emosyon ug makapalisang kanato. Mibati ka na bag sama niini sukad? Unsay hinungdan sa kamingaw?

Ang mga problema, situwasyon, ug mga kahimtang dunay lainlaing mga epekto sa mga tawo. Tingali mobati ka nga sinalikway sa imong mga isigkaingon tungod sa imong panagway, rasa, o relihiyon. Ang mga kausaban sa palibot​—sama sa pagbalhin ug eskuylahan, pagsugod ug bag-ong trabaho, o pagbalhin sa laing lugar, siyudad, o nasod—​maghimo kanimong mamingawon tungod kay ikaw mahilayo na sa imong karaang mga higala. Ang mga tawo mobatig kamingaw sulod tingali sa daghang tuig tungod sa pagkamatay sa ilang mga ginikanan o kapikas. Dugang pa, samtang kita magkatigulang, ang grupo sa atong mga higala ug mga kaila mahimong mabag-o, mamenosan, o mawala.

Ang kaminyoon dili kanunayng mogarantiya nga ang usa ka tawo dili na magmamingawon. Kon ang magtiayon dili magkasinabot o magkauyon, mahimong motungha ang tensiyon nga magpahinabog kawalay-kasegurohan ug mahimong moresulta sa paglinay-anay sa mga magtiayon ug mga anak. Apan gawas pa sa pagkahimong mamingawon tungod sa kamatayon sa usa ka minahal, diborsiyo, o pisikal o emosyonal nga pag-inusara, aduna pay laing matang sa pagkamamingawon nga adunay dakong epekto kanato. Kini mahitabo kon ang atong relasyon sa Diyos madaot ug mobati kitang nahimulag kaniya.

Nasinati mo na ba ang bisan hain sa mga kahimtang nga gihisgotan sa ibabaw? Posible ba nga mabuntog ang pagkamamingawon?

[Mga hulagway sa panid 4]

Ang mga kausaban sa kinabuhi, sama sa pagbalhin ug eskuylahan ug pagkamatay sa kapikas, makahimo kanatong mamingawon