Ang Hunahuna sa Bibliya

Ang Bibliya Makatabang ba sa Mamingawon?

Ang kinabuhi mingaw alang sa tigulang nga lalaki karon nga ang iyang asawa tua na sa balay sa tigulang. Sa paglabay sa mga semana, gihukom niya nga wala nay hinungdang mabuhi pa. Kana ang hinungdang mikuha siyag pusil . . .

ANG kamingaw gitawag “ang sakit sa ika-20ng siglo.” Kini motakboy dili lamang sa mga tigulang apan kini ang hinungdan sa pag-abusar sa droga, alkoholismo, ug bisan sa paghikog taliwala sa mga batan-on.

Oo, ang kamingaw maoy modernong-adlawng hampak. Ang mga paningkamot sa pagpuno sa kahaw-ang sa kamingaw kadaghanan kawang. Ang pipila nagasulay nga malibotan sila sa “mga higala”—nga unya hisayran lamang nga subsob hapaw ug dili makapatagbaw ang maong mga relasyon. Ang uban magdalidali sa pagminyo. Miingon ang popular nga sikologong si Dr. Joyce Brothers: “Ang pagdalidali sa pagminyo dili mao ang sulbad [sa kamingaw]. Sa dili pa nimo mapahimuslan ang bisan unsang relasyon, kinahanglang makasabot ka sa imong kaugalingong mga suliran.”

Ang Matarong nga Panglantaw

Hinuon, ang Bibliya nagahatag ug praktikal nga panglantaw sa kamingaw. Tinuod, ang kamingaw mahimong makaguol, apan ang pag-inusara dili kanunay daotan. Si Jesu-Kristo giingong nagpahimulos sa mugbong mga yugto sa pag-inusara. (Mateo 14:13) Inay mamingawon o tiglainlain, gigamit niya ang maong mga okasyon alang sa gikinahanglang pahulay ug pag-ampo.—Marcos 6:31; Lucas 9:18.

Ang pagtulon-an? Kon ikaw nagainusara, dili kinahanglang magmingaw ka! Sa pagkamatuod, ang imong panglantaw sa pag-inusara labaw nga usa ka hinungdan sa kon unsay imong pagbati inay ang kamatuoran sa pisikal nga pag-inusara. Busa sa unsang paagi gamiton nimo ang imong panahon dihang ikaw nagainusara? Yano ka bang nagapalabay sa panahon? Nganong dili gamitong mabungahon kanang panahona? Adunay daghang mapuslanong mga kalihokan nga imong mapahimuslang nagainusara, sama sa pagpamati sa musika o pagbuhat sa dugay-nang-nalangang mga buluhaton sa panimalay. Ang pagbasa sa Pulong sa Diyos mapuslanon sa linain. Kini “buhi ug gamhanan” ug magkuha sa atong mga hunahuna gikan sa atong kaugalingon. (Hebreohanon 4:12) Kon gamiton sa tukmang paagi, ang mga gutlo sa pag-inusara makatabang nimo nga madasig na usab—sa pisikal, emosyonal, ug espirituwal nga paagi.

Maayong Relasyon sa Uban

Hinuon, may panahong buot ug kinahanglan nimong makig-uban sa uban. Nan, dili katingalahang ang Bibliya may tambag usab bahin sa pag-ugmad ug makapatagbawng relasyon sa ubang tawo. Pananglitan, ang Proverbio 18:24 nagaingon: “Adunay usa ka higala nga mounong labaw kay sa usa ka igsoon.” Busa dili kinahanglan kanunay nga daghan kag higala sa paghupay sa kamingaw. Makaatiman ka sa pila ka suod nga panaghigala.

Hinuon, ang mga tawong mamingawon subsob malisdan sa pagbatog mga higala. Apan miingon ang usa ka Canadianong magtatambag sa pamilya: “Ang mga tawong mamingawon, ilabina kadtong anaa sa panuigong 20 anyos nagadahom ug dako, apan dili buot mohatag sa bisan unsa.” Ang Bibliya susamang nagaingon nga ‘ang usang nagapalain sa kaugalingon nagapangita sa iyang kaugalingong mahakogong pangandoy.’—Proverbio 18:1.

Kon nagaantos ka sa kamingaw, basin kinahanglang imong ipakita ang labawng kaikag sa uban. Kon makahibalag ug lagmit bag-ong mga higala, nagapakita ka bag kaikag sa mga butang maylabot kanila o imo bang iwahing ang estorya nganha sa imong kaugalingon? Sa pagbungkag sa tuyok sa kamingaw, ang usa kinahanglang tighatag.

Sa Filipos 2:4 si apostol Pablo nagaawhag kanato nga ‘magbantay, dili sa atong kaugalingong mga kaayohan, kondili sa iya usab sa uban.’ Sa unsang paagi kanang tambaga makatambal sa kamingaw? Sa orihinal nga pinulongan sa Bibliya, ang berbong gihubad nga “magbantay” nagpasabot sa paghimog ‘pagtagad sa hunahuna’ o ‘pagsurbi’ sa tuyo nga ipunting ang labing maayong panahon sa paglihok. Busa panan-aw sa palibot ug tan-awa kon kinsay nagakinahanglag tabang, kinsay nagakinahanglag higala. Dihang imong makita ang ingon nga tawo—lihok! Daghang tawo ang nagatan-aw lamang sa ilang kaugalingon: ang tanan nga uban ulahi, kon ugaling nagatan-aw man. Ang Bibliya nagasugyot sa kaatbang: Tan-awa una ang uban.

Busa, aron makabatog mga higala, kinahanglan unang molihok ingon nga higala! Ang Bibliya nagaingon: “Panghatag kamo, ug pagahatagan kamo sa mga tawo.” (Lucas 6:38) Gawas pa, “adunay labaw nga kalipay sa paghatag kay sa pagdawat.”—Buhat 20:35.

“Ako Wala Mag-inusara”

Hinuon, ang tawhanong mga relasyon dili bug-os makatagbaw sa tanan natong panginahanglan. Kini tungod kay ang tawo gilalang uban ang panginahanglan nga masuod sa iyang Maglalalang. (Itandi ang Mateo 5:3.) Ang pakighigala sa Diyos mapamatud-ang malig-on, bisan pag mapakyas ang tawhanong mga relasyon. Si Jesu-Kristo kas-a miingon ngadto sa iyang mga tinun-an: “Tan-awa! Ang takna nagasingabot, sa pagkamatuod, kini miabot na, sa dihang kamo mahitibulaag ang matag usa ngadto sa iyang kaugalingong balay ug ako inyong biyaan nga magainusara.” Pagkamakaguol! Apan si Jesus nakaingon: “Bisan pa niana ako wala mag-inusara, tungod kay ang Amahan nagauban kanako.”—Juan 16:32.

Ang pakighigala sa Diyos sa ingon mao ang labing maayong tambal sa kamingaw. Busa paggahin ug panahon sa pagkaila kaniya. “Tilawi ug tan-awa nga si Jehova maayo” pinaagi sa pagsugod sa usa ka pagtuon sa Bibliya. (Salmo 34:8; Juan 17:3) Apan dili kinahanglang mag-inusara ka sa pagbuhat niana.

Ang Diyos nagkuha sa “usa ka katawhan alang sa iyang ngalan.” (Buhat 15:14) Kapin sa tulo ka milyong tawo karong adlawa magarbohong nagadala nianang ngalana ingong mga Saksi ni Jehova. Sila malipay sa pagtabang kanimo nga makakat-on bahin sa maong Diyos. Nahinumdom ka sa mamingawong tigulang lalaki nga gihisgotan sa sinugdan? Sa wala pa siya makahikog, giduaw siya sa mga Saksi ni Jehova. Gitabangan nila siya sa pagpabili nga adunay usa ka buhing Diyos nga nagamahal kaniya. (1 Pedro 5:7) Ang kaguol nailisan sa kalipay sa iyang pagsugod sa pagtuon sa Bibliya.

Makaiikag, ang pagpakig-uban sa matuod nga mga Kristohanon magabukas usab ug kahigayonan sa pagbatog bag-ong mga higala. Kay ang maong mga panaghigala gipasukad man sa mutuwal nga gugma sa Diyos, kini lagmit malungtaron, mapinadayonong mga relasyon. Busa pangitaa ang katawhan ni Jehova. Uban sa ilang tabang ug sa tabang sa Pulong sa Diyos, makatuon ka sa paghanaw sa mga kasakit sa kamingaw.—Mateo 12:48-50; Juan 15:14.