Kang Kinsa Ka Makasalig?—Unsay Giingon sa Bibliya?

Daghan ang madismayar dihang pakyason sila sa mga tawo nga ila untang gisaligan. Nawad-an silag pagsalig sa . . .

• mga lider sa politika nga naghunahuna lang sa ilang kaugalingon imbes sa panginahanglan sa mga tawo.

• media nga nagsultig dili patas ug dili tinuod nga mga balita.

• mga siyentista nga walay pakabana sa kaayohan sa mga tawo.

• mga lider sa relihiyon nga nag-apil-apil sa politika imbes magpokus sa pagtudlo bahin sa Diyos.

Dili sayop nga mag-amping ang mga tawo kon kinsay ilang saligan. Ang Bibliya nagpasidaan:

• “Ayaw saligi ang mga pangulo kay mga tawo lamang sila ug dili makaluwas kanimo.”—Salmo 146:3, Maayong Balita Biblia.

Ang imong masaligan

Gipaila sa Bibliya ang usa nga imo gyong masaligan: Si Jesu-Kristo. Dili lang siya basta usa ka maayong tawo nga nabuhi kaniadto. Gipili sa Diyos si Jesus nga “magahari . . . , ug dili matapos ang iyang Gingharian.” (Lucas 1:32, 33) Si Jesus ang Hari sa Gingharian sa Diyos, usa ka gobyerno nga nagmando na karon sa langit.—Mateo 6:10.

• Aron imong mahibaloan kon nganong makasalig ka kang Jesus, basaha ang mga artikulo nga “Kinsa ang Hari sa Gingharian sa Diyos?” ug “Unsay Himoon sa Gingharian sa Diyos?”