Gubat sa Middle East—Unsay Giingon sa Bibliya?

Ang mga tawo sa tibuok kalibotan nabalaka pag-ayo kon unsay mahitabo sa gubat sa United States, Israel, ug Iran. Kini ba nga gubat mas mograbe nga tungod ana daghan pang nasod ang maapektohan? Mapugngan kaha sa mga gobyerno kini nga kagubot ug makab-ot ang kalinaw?

Ang mga tawo nga pamilyar sa mga tagna sa Bibliya maghunahuna tingali kon ang gubat ba sa Middle East mao ang sinugdanan sa gubat sa Armagedon nga gihisgotan sa basahon sa Pinadayag.

Unsay giingon sa Bibliya?

Mapahunong ba sa mga gobyerno ang gubat sa Middle East?

Ang Bibliya nag-ingon: “Ayaw mog salig sa mga prinsipe o sa anak sa tawo, nga dili makaluwas.”—Salmo 146:3.

Wala ta mahibalo kon ang mga gobyerno makapatungha bag kalinaw sa Middle East. Pero ang Bibliya klarong nag-ingon nga walay lider sa politika, gobyerno sa tawo, o grupo sa mga tawo nga makapahunong sa gubat ug makapatunghag tinuod nga kalinaw. Ang Diyos lang ang ‘makapahunong sa mga gubat sa tibuok yuta.’—Salmo 46:9.

• Aron makakat-on ug dugang, basaha ang isyu sa Bantayanang Torre nga nag-ulohang “Gubat—Sa Unsang Paagi ni Matapos?”

Ang gubat ba sa Middle East nagtuman sa tagna sa Bibliya?

Ang Bibliya nag-ingon: “Makadungog mog mga gubat sa lainlaing dapit. . . . Ang nasod makiggubat batok sa nasod ug ang gingharian batok sa gingharian.”—Mateo 24:6, 7.

Ang nahitabo karon sa Middle East nagpamatuod nga naa na ta “sa hinapos sa sistema sa mga butang,” ug kini dugang ebidensiya nga nagkinabuhi na ta “sa kataposang mga adlaw.” (Mateo 24:3; 2 Timoteo 3:1) Ang mga gubat karon nagpakita nga ang Diyos hapit nang molihok aron taposon ang mga gubat ug ang tanang problema nga nagpahinabog grabeng pag-antos sa mga tawo.

• Aron makakat-on ug dugang, basaha ang artikulo nga “Unsa ang Ilhanan sa ‘Kataposang mga Adlaw,’ o ‘Panahon sa Kataposan’?”

Ang gubat ba sa Armagedon magsugod sa Middle East?

Ang Bibliya nag-ingon: “Gitigom sila niini sa dapit nga gitawag sa Hebreohanon ug Armagedon.”—Pinadayag 16:16.

Ang gubat sa Armagedon dili gubat sa mga gobyerno sa tawo nga magsugod sa Middle East. Gubat ni sa Diyos batok sa tanang gobyerno sa tawo nga makaapektar sa tibuok kalibotan.

• Aron makakat-on ug dugang, basaha ang artikulo nga “Unsa ang Gubat sa Armagedon?”

Unsay makatabang nato nga dili sobrang mabalaka sa mga nagakahitabo karon?

Ang Bibliya nag-ingon: “Ayawg kabalaka sa bisan unsa, apan sa tanang butang ipahibalo sa Diyos ang inyong mga hangyo pinaagi sa pag-ampo ug pangamuyo uban ang pagpasalamat.”—Filipos 4:6.

Gidapit ta ni Jehovaa nga Diyos nga moampo kaniya. Gimahal ta sa Diyos maong maminaw gyod siya sa atong mga pag-ampo ug tabangan ta niya nga dili mabug-atan sa atong mga kabalaka. (1 Pedro 5:7) Ang usa ka paagi nga iya nang gihimo mao ang pagtabang nato nga masabtan kon nganong naay mga gubat. Pero dili lang kana. Gitudloan pod ta niya kon sa unsang paagi matapos ang mga gubat, ug kon unsay iyang himoon aron ang atong mga pag-antos mapulihag kalipay ug kalinaw.—Pinadayag 21:3, 4.

• Aron makakat-on ug dugang kon sa unsang paagi ang Diyos nagtaganag tabang, basaha ang artikulo nga “Makahupay ba Nako ang Bibliya?.”