Magpatambal ba ang mga Saksi ni Jehova?

Oo, ang mga Saksi ni Jehova motomar ug tambal ug magpatambal. Bisan tuod atimanon namo ang among lawas ug huptan ang maayong panglawas, usahay kami “magkinahanglag doktor.” (Lucas 5:31, Maayong Balita Biblia) Gani, sama sa unang-siglong Kristohanon nga si Lucas, may mga Saksi ni Jehova nga doktor.—Colosas 4:14.

Apan, ang pipila ka paagi sa pagtambal nahisupak sa mga prinsipyo sa Bibliya busa gidumilian namo kini. Pananglitan, dili mi magpaabonog dugo kay ang Bibliya nagdili sa pagpasulod ug dugo sa lawas. (Buhat 15:20) Gidili usab sa Bibliya ang mga paagi sa pagtambal nga nalangkit sa espiritismo.—Galacia 5:19-21.

Hinuon, kadaghanan sa mga paagi sa pagtambal dili supak sa mga prinsipyo sa Bibliya. Busa, nagdepende kini sa matag usa. Ang usa ka Saksi mahimong modawat sa usa ka matang sa tambal o pagtambal, samtang ang laing Saksi dili modawat niana.—Galacia 6:5.