Ikaw Ba Naglanganlangan?
Naglanganlangan sa unsa? Sa pagpil-ap sa kard nga DPA (durable power of attorney) nga gitagana alang sa tanang bawtismadong mga Saksi. Hinungdanon gayod ang pagdesisyon nga abante ug pagsulat sa mga pamaagi sa pagpanambal nga atong dawaton panahon sa emerhensiya, sanglit ‘wala man kita masayod kon unsay dangatan sa atong kinabuhi ugma.’ (Sant. 4:14; Buh. 15:28, 29) Aron matabangan ka, gihimo ang video nga Transfusion-Alternative Health Care—Meeting Patient Needs and Rights. Tan-awa kini, ug mainampoong sublia ang imong nakat-onan sa tabang sa mga pangutana sa ubos.—Matikdi: Tungod kay ang video dunay daklit nga mga esena sa pag-opera, ang mga ginikanan nay mag-igo kon ila bang patan-awon ang ilang gagmayng mga bata.
(1) Nganong gitimbangtimbang pag-usab sa pipila ka doktor ang mga pag-abonog dugo? (2) Paghatag ug tulo ka pananglitan sa komplikadong mga operasyon nga walay pag-abonog dugo. (3) Unsa ka daghang doktor ug siruhano sa tibuok kalibotan ang nagpahayag nga andam silang motambal nga dili moabonog dugo? Nganong buot man nila kining himoon? (4) Unsay gipadayag sa bag-ong mga pagtuon sa ospital bahin sa paggamit ug dugo? (5) Unsang mga kapeligrohan ang nalangkit sa pag-abonog dugo? (6) Unsay konklusyon sa daghang eksperto bahin sa mga kaayohan sa paggamit ug mga kapuli sa dugo? (7) Unsay hinungdan sa anemia o kakulag pulang dugo? Hangtod kanus-a nga kini maagwanta? Unsay mahimo aron masumpo kana? (8) Unsay himoon aron makagamag pulang selula ang lawas sa pasyente? (9) Unsang mga teknik ang gigamit aron diyutay rang dugo ang mausik panahon sa operasyon? (10) Epektibo ba ang kapuli sa dugo alang sa mga bata o sa mga tawong nameligro na ang kinabuhi? (11) Unsa ang usa sa pangunang mga prinsipyo sa maayong pag-atiman sa panglawas? (12) Nganong hinungdanon nga ang mga Kristohanon mohimog abanteng desisyon bahin sa pagtambal nga wala gamitig dugo? Unsaon nato kini paghimo?
Ang pagdawat sa pipila ka pagtambal nga gihisgotan sa video maoy kaugalingon na natong desisyon sumala sa atong tagsatagsa ka konsensiya nga nabansay sa Bibliya. Nakadesisyon ka na ba kon unsang pamaagi sa pagpanambal ang buot nimong dawaton ug sa imong mga anak? Alang sa bug-os nga kasayoran niining bahina, tan-awa ang “Mga Pangutana Gikan sa mga Magbabasa” sa Hunyo 15, 2004, ug sa Oktubre 15, 2000 nga mga isyu sa Bantayanang Torre ug ang pasukip nga “Unsay Angay Nakong Desisyon Bahin sa mga Tipik sa Dugo ug sa Pagtambal nga Gamiton ang Kaugalingon Nakong Dugo?” sa Enero 2007 nga isyu sa Atong Ministeryo sa Gingharian. Ang imong gipili nga morepresentar kanimo sa doktor ug ang dili-Saksi nga mga membro sa pamilya angayng masayod sa imong mga desisyon.