Nahibalo Ka ba sa Imong mga Kapilian?
Nagkadaghan na ang ospital sa tibuok kalibotan nga nagahimog mga operasyon nga walay pag-abonog dugo. Bug-os ka bang nahibalo sa imong mga kapilian sa pagtambal nga wala maggamit ug dugo? Kinahanglan mahibalo ka niana aron makahimo kag maalamong desisyon maylabot sa pagtambal ug sa operasyon. Tan-awa ang video nga No Blood—Medicine Meets the Challenge. Human niana, repasoha nga mainampoon ang imong nakat-onan uban sa mga pangutana sa ubos.—Matikdi: Tungod kay ang video dunay daklit nga mga esena sa pag-opera, ang mga ginikanan nay mag-igo kon ila bang patan-awon ang ilang gagmayng mga bata.
(1) Unsa ang pangunang rason kon nganong dili magpaabonog dugo ang mga Saksi ni Jehova? (2) Kon maylabot sa pagpatambal, unsay tinguha sa mga Saksi ni Jehova? (3) Unsay pangunang katungod sa mga pasyente? (4) Nganong makataronganon ug pagpakitag pagkamahunahunaon sa kaugalingong panglawas ang pagpili ug mga kapuli sa pag-abonog dugo? (5) Kon daghang dugo ang mawala, unsa ang duha ka butang nga angay dayong buhaton sa mga doktor? (6) Unsa ang upat ka prinsipyo sa mga pamaagi sa pagtambal nga kapuli sa pag-abonog dugo? (7) Unsay mahimo sa mga doktor aron (a) mamenosan ang dugo nga mawala, (b) masalbar ang pulang mga selula sa dugo, (c) modaghan ang dugo, ug (d) mapulihan ang dugo nga nawala? (8) Hubita ang mga pamaagi nga sama sa (a) hemodilution ug (b) cell salvage. (9) Unsay angay nimong mahibaloan bahin sa bisan unsang kapuli sa pag-abonog dugo? (10) Mahimo ba ang lisod ug komplikadong mga operasyon bisan walay pag-abonog dugo? (11) Unsang positibong mga kausaban ang ginahimo sa mga doktor ug mga eksperto sa medisina?
Ang pagdawat sa pipila ka pagtambal nga gihisgotan sa video maoy kaugalingon na natong desisyon sumala sa atong tanlag nga nabansay sa Bibliya. Nakadesisyon ka na ba kon unsang pamaagi sa pagtambal ang buot nimong dawaton ug sa imong mga anak? Imo na bang napil-apan ang imong DPA nga kard? Alang sa bug-os nga kasayoran niining bahina, tan-awa ang “Mga Pangutana Gikan sa mga Magbabasa” sa Hunyo 15, 2004, ug Oktubre 15, 2000 nga mga isyu sa Bantayanang Torre. Dayon gamita ang mga work sheet diha sa pasukip sa Enero 2007 nga Atong Ministeryo sa Gingharian, nga nag-ulohang “Unsay Angay Nakong Desisyon Bahin sa mga Tipik sa Dugo ug sa Pagtambal nga Gamiton ang Kaugalingon Nakong Dugo?,” sa pagpilig mga pagtambal nga imong dawaton. Human niana, paneguroa nga makopya kana nga tukma diha sa imong DPA nga kard. Ang imong gipili nga morepresentar kanimo sa doktor ug ang dili-Saksi nga mga membro sa pamilya angay gayong masayod sa imong mga desisyon.
[Kahon sa panid 3]
• Nakapili ka na bag matang sa pagtambal ug mga pamaagi nga imong dawaton alang kanimo ug sa imong mga anak?
• Naghupot ka ba ug napil-apan na nga DPA kard sa tanang panahon?