Nahibalo Ka ba sa Imong mga Kapilian?
Nagkadaghan ang ospital sa tibuok kalibotan nga nag-opera nga walay pag-abonog dugo. Bug-os ka bang nahibalo sa mga kapilian sa pagtambal nga wala maggamit ug dugo? Kinahanglang mahibalo ka niini aron makahimog maalamong desisyon maylabot sa pagtambal ug sa operasyon. Tan-awa ang video nga No Blood—Medicine Meets the Challenge. Human niana, repasoha nga mainampoon ang imong nakat-onan pinaagi sa pagkonsiderar sa mga pangutana sa ubos.—Matikdi: Tungod kay ang video dunay daklit nga mga esena sa pag-opera, ang mga ginikanan nay mag-igo kon ila bang patan-awon ang ilang mga anak.
(1) Unsay pangunang rason kon nganong dili magpaabonog dugo ang mga Saksi ni Jehova? (2) Kon maylabot sa pagpatambal, unsay tinguha sa mga Saksi ni Jehova? (3) Unsay katungod sa usa ka pasyente? (4) Nganong makataronganon ug pagpakitag pagkamahunahunaon sa panglawas ang pagpilig mga kapuli sa dugo? (5) Kon daghang dugo ang nawala, unsang duha ka butang ang himoon dayon sa mga doktor? (6) Unsa ang upat ka prinsipyo sa mga pamaagi sa pagtambal nga kapuli sa pag-abonog dugo? (7) Unsay mahimo sa mga doktor aron (a) mamenosan ang pagdugo, (b) masalbar ang pulang mga selula sa dugo, (c) modaghan ang dugo, ug (d) ikapasig-uli ang dugo? (8) Unsa ang (a) hemodilution ug (b) cell salvage? (9) Unsay angay nimong mahibaloan bahin sa bisan unsang kapuli sa dugo? (10) Mahimo ba ang lisod ug komplikadong mga operasyon bisan walay pag-abonog dugo? (11) Unsang mga kaugmaran ang ginahimo sa mga doktor ug mga eksperto sa medisina?
Ang pagdawat sa pipila ka pagtambal nga gihisgotan sa video maoy personal nga desisyon sumala sa tanlag nga nabansay sa Bibliya. Nakadesisyon ka na ba kon unsang pamaagi sa pagtambal ang buot nimong dawaton ug sa imong mga anak? Imo na bang napil-apan ang imong DPA kard? Alang sa bug-os nga kasayoran, repasoha pag-ayo ang “Mga Pangutana Gikan sa mga Magbabasa” sa Hunyo 15, 2004, ug Oktubre 15, 2000 nga Bantayanang Torre. Dayon gamita ang mga work sheet diha sa pasukip sa Enero 2007 nga Atong Ministeryo sa Gingharian, nga nag-ulohang “Unsay Angay Nakong Desisyon Bahin sa mga Tipik sa Dugo ug sa Pagtambal nga Gamiton ang Kaugalingon Nakong Dugo?,” sa pagpilig mga pagtambal nga imong dawaton. Human niana, paneguroa nga tukma kanang makopya diha sa imong DPA kard. Ang imong gipili nga morepresentar kanimo sa doktor ug ang dili-Saksi nga mga membro sa pamilya angayng bug-os masayod sa imong mga desisyon.