Ang Kinamaayohang Paagi sa Pagtambal—Unsa man Kana?
“Ang pasyente nga magpatambal nga walay pag-abonog dugo, sa pagkatinuod, makapahimulos sa kinamaayohang paagi sa operasyon.” Kanay giingon ni Dr. Michael Rose, usa ka medikal direktor ug anestesiologo. Unsang mga pamaagi ug mga kapuli sa pag-abonog dugo ang mahimong nalakip sa ‘pagtambal nga walay pag-abonog dugo’? Angay kang mahibalo aron makahimo kag maalamong mga desisyon nga nalangkit sa pagpatambal ug pagpaopera. Tan-awa ang video nga No Blood—Medicine Meets the Challenge. Pagkahuman, susiha kon imong bang nasabtan ang video pinaagi sa mosunod nga mga pangutana.—Matikdi: Kini nga video adunay mugbong mga esena sa pag-opera, mao nga ang mga ginikanan lay mag-igo kon ila bang tan-awon ang video uban ang ilang gagmayng mga anak.
(1) Unsa ang pangunang rason kon nganong dili magpaabonog dugo ang mga Saksi ni Jehova? (2) Kon pagpatambal ang hisgotan, unsay gitinguha sa mga Saksi ni Jehova? (3) Unsay pangunang katungod sa mga pasyente? (4) Nganong makataronganon ug pagpakitag pagkamahunahunaon bahin sa pag-atiman sa kaugalingong panglawas ang pagpili ug mga kapuli sa pag-abonog dugo? (5) Kon daghang dugo ang mawala, unsa ang duha ka butang nga buhaton dayon sa mga doktor? (6) Unsa ang upat ka prinsipyo sa mga pamaagi sa kapuli sa pag-abonog dugo? (7) Unsay himoon sa mga doktor aron (a) mamenosan ang dugo nga mawala, (b) masalbar ang pulang mga selula sa dugo, (c) modaghan ang dugo, ug (d) mapulihan ang dugo nga nawala? (8) Hubita ang mga pamaagi nga nailhang (a) hemodilution ug (b) cell salvage. (9) Unsay angay nimong mahibaloan bahin sa bisan unsang kapuli sa pag-abonog dugo? (10) Mahimo ba ang lisod ug komplikadong mga operasyon nga dili moabonog dugo? (11) Unsang positibong mga kaugmaran ang nagakahitabo taliwala sa mga doktor?
Ang pagdawat sa pipila ka pagtambal nga gipakita sa video angayng desisyonan sa matag usa sumala sa iyang tanlag nga nabansay sa Bibliya. Nakadesisyon ka na ba kon unsang mga kapuli sa pag-abonog dugo ang andam nimong dawaton alang sa imong kaugalingon ug sa imong mga anak? Ang dili-Saksing mga membro sa pamilya kinahanglang mahibalo gayod sa imong mga desisyon ug sa imong mga katarongan alang niana.—Tan-awa ang “Mga Pangutana Gikan sa mga Magbabasa” sa Hunyo 15, 2004, ug Oktubre 15, 2000, nga mga gula sa Ang Bantayanang Torre.