Tan-awa Gayod ang Video nga No Blood—Medicine Meets the Challenge
Unsa ka daghan ang imong nahibaloan bahin sa mga impormasyon nga mabatonan sa natad sa way-dugo nga pagtambal? Nahibalo ka ba kon unsa ang pipila sa mga kapuli sa pag-abonog dugo ug kon sa unsang paagi kini nagaobra? Tan-awa kini nga video, ug sukda ang imong kahibalo pinaagi sa mosunod nga mga pangutana.—Matikdi: Sanglit ang video naglakip ug mugbong mga esena panahon sa operasyon, kinahanglang magmatngon ang mga ginikanan sa dihang tan-awon ang video uban sa gagmayng mga bata.
(1) Unsa ang pangunang rason kon nganong modumili ang mga Saksi ni Jehova sa mga pag-abonog dugo, ug asa makaplagan ang maong prinsipyo diha sa Bibliya? (2) Kon maylabot sa medikal nga pag-atiman, unsay atong gitinguha? (3) Unsa ang pasukaranang katungod nga gihuptan sa mga pasyente? (4) Nganong makataronganon ug mahinungdanon ang pagsalikway sa mga pag-abonog dugo? (5) Kon mahitabo ang grabeng pagdugo, unsa ang duha ka pangunang dinaliang butang nga buhaton sa mga doktor? (6) Unsang mga risgo sa panglawas ang nalangkit sa mga pag-abonog dugo? (7) Unsa ang pipila ka himan nga magamit sa mga siruhano aron mamenosan ang pagdugo panahon sa operasyon? (8) Unsang impormasyona ang gusto mong masayran bahin sa bisan unsang kapuli sa pag-abonog dugo? (9) Mahimo ba ang seryoso ug komplikado nga mga operasyon nga walay mga pag-abonog dugo? (10) Unsay andam buhaton sa nagkadaghang mga doktor alang sa mga Saksi ni Jehova, ug unsa sa ngadtongadto ang mahimong sukdanan sa pag-atiman sa tanang pasyente?
Walay duhaduha nga makatabang ang pagtan-aw sa video nga No Blood uban sa tanang estudyante sa Bibliya, di-Saksi nga mga kapikas o mga paryente, isigkatrabahante, magtutudlo, ug mga kauban sa tunghaan nga mangutana bahin sa atong baroganan maylabot sa dugo. Ang pagdawat sa bisan unsang mga pagtambal nga gipakita diha sa video maoy iya sa matanlagon nga panghukom sa indibiduwal.—Tan-awa ang “Mga Pangutana Gikan sa mga Magbabasa” sa Hunyo 15 ug Oktubre 15, 2000, nga mga gula sa Ang Bantayanang Torre.