Usa ka Video nga Nagpatin-aw sa Usa ka Hinungdanong Uso sa Pagpanambal
Ang mga abogado ug mga doktor nagahatag ug labawng pagtagad sa mga opinyon may labot sa moral ug sa mga katungod sa mga pasyente. Nakapadayag kinig bag-ong mga terapiya ug metodo nga makahatag ug kaayohan sa mga Saksi ni Jehova. (Buhat 15:28, 29) Kana ang gihisgotan sa video nga Transfusion-Alternative Health Care—Meeting Patient Needs and Rights. Tan-awa ang maong video, ug unya repasoha kon unsay imong nakat-onan.—Matikdi: Tungod kay ang video adunay daklit nga mga esena sa pag-opera, ang mga ginikanan maoy magpaigo kon ila bang patan-awon ang ilang gagmayng mga bata.
(1) Nganong gitimbangtimbang pag-usab sa pipila ka doktor ang mga pag-abonog dugo? (2) Paghatag ug tulo ka pananglitan sa komplikadong mga operasyon nga puwedeng himoon bisag dili abonohag dugo. (3) Pipila ang mga doktor ug siruhano sa tibuok kalibotan ang nagpahayag nga andam silang motambal sa mga pasyente nga dili moabonog dugo? Nganong sila andam sa paghimo niana? (4) Unsay gipadayag sa bag-ong mga pagtuon sa ospital bahin sa paggamit ug dugo? (5) Unsang medikal nga mga kapeligrohan ang nalangkit sa mga pag-abonog dugo? (6) Unsang konklusyon ang nakab-ot sa daghang eksperto bahin sa mga kaayohan sa mga alternatibo sa abono? (7) Unsay magpahinabo ug anemya o kakulag-dugo? Asa kutob ang mga tawo mahimong may anemya ug bisan pa niana dili sila madaot? Unsay puwedeng himoon sa pagsumpo niana? (8) Sa unsang paagi mapalihok ang lawas sa pasyente aron mogamag pulang mga selula? (9) Unsang mga teknik ang gigamit aron diyutay rang dugo ang mausik panahon sa operasyon? (10) Epektibo ba ang mga alternatibo sa abono alang sa mga bata o sa mga tawong nalangkit sa mga emerhensiyang nameligro ang ilang kinabuhi? (11) Unsay usa sa pangunang moral nga mga prinsipyo sa maayong pag-atiman sa panglawas? (12) Nganong hinungdanon nga ang mga Kristohanon mohimog abanteng desisyon bahin sa walay-dugo nga pagtambal? Sa unsang paagi mahimo nato kini?
Ang pagdawat sa pipila ka pagtambal nga gihisgotan diha sa video maoy butang nga pribadong desisyonan sumala sa tagsatagsa ka konsensiya nga nabansay sa Bibliya. Nakadesisyon ka na ba kon unsang mga alternatibo sa abono ang gusto nimong dawaton alang sa imong kaugalingon ug sa imong mga anak? Ang dili-Saksi nga mga membro sa pamilya angay usab nga masayod sa imong mga desisyon ug sa mga katarongan niana.—Tan-awa ang “Mga Pangutana Gikan sa mga Magbabasa” diha sa Hunyo 15, 2004, ug Oktubre 15, 2000, nga mga gula sa Ang Bantayanang Torre.