Ikaw Ba Naglanganlangan?

Naglanganlangan sa unsa? Sa pagpil-ap sa DPA (durable power of attorney) card nga gitagana alang sa mga bawtismadong mga Saksi. Sanglit ‘ikaw wala masayod kon unsay dangatan sa imong kinabuhi ugma,’ hinungdanon gayod nga ikaw makahimo nag desisyon ug isulat sa card kon unsang matanga ug pamaagi sa pagtambal ang imong dawaton panahon sa emerhensiya. (Sant. 4:14; Buh. 15:​28, 29) Aron matabangan ka, gihimo ang video nga Transfusion-Alternative Health Care​—Meeting the Patient Needs and Rights. Tan-awa kini, ug dayon uban ang pag-ampo repasoha ang imong nakat-onan pinaagi sa tabang sa mosunod nga mga pangutana.

(1) Nganong gikonsiderar pag-usab sa pipila ka doktor ang pag-abonog dugo? (2) Paghatag ug tulo ka pananglitan sa komplikadong mga operasyon nga gihimo nga walay pag-abonog dugo. (3) Nganong daghang doktor ug siruhano sa tibuok kalibotan ang andam motambal sa mga pasyente nga walay pag-abonog dugo? (4) Unsay gibutyag sa bag-ong medikal nga mga pagtuon bahin sa paggamit ug dugo? (5) Unsa ang mga kapeligrohan sa pag-abonog dugo? (6) Unsay konklusyon sa daghang eksperto bahin sa kaayohan sa paggamit ug mga kapuli sa pag-abonog dugo? (7) Unsay hinungdan sa anemia? Unsa nga kahimtang nga dili pa kini peligroso sa tawo? Unsay himoon aron matabangan ang pasyente? (8) Unsay himoon aron ang lawas sa pasyente makapatungha ug pulang mga selula? (9) Unsa nga mga pamaagi ang gigamit na aron diyutay ra nga dugo ang mausik panahon sa operasyon? (10) Nganong hinungdanon nga ang mga Kristohanon mohimog abanteng desisyon bahin sa walay-dugo nga pagtambal? Unsaon nato kini paghimo?

Ang pagdawat sa pipila ka pagtambal nga gihisgotan sa video maoy personal na nato nga desisyon sumala sa atong tagsatagsa ka konsensiya nga nabansay sa Bibliya. Nakapili ka na ba kon unsang matanga ug mga pamaagi sa pagtambal nga dawaton nimo ug sa imong mga anak? Gisulat mo na ba kini diha sa DPA card? Alang sa detalyadong paghisgot niining butanga, repasoha pag-ayo ang kapitulo 7 sa librong “Gugma sa Diyos” ug ang mga reperensiya nga gihisgotan niini. Tan-awa usab ang insert nga “Unsay Angay Nakong Desisyon Bahin sa mga Tipik sa Dugo ug sa Pagtambal nga Gamiton ang Kaugalingon Nakong Dugo?” sa Enero 2007 nga isyu sa Atong Ministeryo sa Gingharian. Sa kataposan, seguroha nga tukmang masulat ang imong desisyon diha sa imong DPA card. Ang imong gipili nga morepresentar kanimo sa doktor ug ang dili-Saksi nga mga membro sa pamilya kinahanglang bug-os nga masayod sa imong mga desisyon.

[Kahon sa panid 2]

• Nakadesisyon ka na ba kon unsang matanga sa pagtambal ug mga pamaagi nga dawaton nimo ug sa imong mga anak?

• Nagdaladala ka ba ug napil-apan na nga DPA card sa tanang panahon?