Andam Ka na ba Kon May Emerhensiya?

Ang emerhensiya kalit lang kaayo ug dili mahibal-an. (Sant. 4:14) Busa ang usa nga maalamon mangandam gayod kutob sa mahimo. (Prov. 22:3) Nakadesisyon ka na ba, ug imo na bang nasulat kon unsang mga pamaagi sa pagtambal nga imong dawaton? Makatabang kanimo ang video nga Transfusion-Alternative Health Care—Meeting Patient Needs and Rights, ang ikaduhang video diha sa DVD nga Transfusion-Alternatives—Documentary Series. Samtang imo kining tan-awon, hunahunaa ang mga tubag sa mosunod nga mga pangutana. Tungod kay ang video dunay mubong mga esena sa pag-opera, ang mga ginikanan nay mag-igo kon ila bang patan-awon niini ang ilang gagmayng anak.

(1) Nganong gikonsiderar pag-usab sa mga doktor ang pag-abonog dugo? (2) Paghatag ug tulo ka pananglitan sa komplikadong mga operasyon nga walay pag-abonog dugo. (3) Nganong linibo sa mga doktor ug mga siruhano sa tibuok kalibotan ang andam motambal sa mga pasyente nga walay pag-abonog dugo? (4) Unsay gipadayag sa bag-ong mga pagtuon sa ospital bahin sa paggamit ug dugo? (5) Unsang mga kapeligrohan ang nalangkit sa pag-abonog dugo? (6) Unsay konklusyon sa daghang eksperto bahin sa mga kaayohan sa paggamit ug mga kapuli sa dugo? (7) Unsay hinungdan sa anemia, ug unsay mahimo aron matabang kini? (8) Unsay himoon aron makagamag pulang selula ang lawas sa pasyente? (9) Unsang mga teknik ang ginagamit aron diyutay rang dugo ang mausik panahon sa operasyon? (10) Epektibo ba ang kapuli sa dugo alang sa mga bata o sa mga tawong nameligro na ang kinabuhi? (11) Unsa ang usa sa pangunang mga prinsipyo sa maayong pag-atiman sa panglawas?

Sanglit depende na sa atong tanlag ang pagdawat sa pipila ka paagi sa pagtambal nga gihisgotan sa video, ayaw paghulat ug emerhensiya una ka pa magdesisyon kon unsay imong dawaton o dili. Ang kapitulo 7 sa librong Gugma sa Diyos ug ang kinutlong mga reperensiya niini ingon man ang insert sa Enero 2007 nga Atong Ministeryo sa Gingharian makatabang nimo sa paghimog maalamong desisyon. Dayon, kon ikaw bawtismado, isulat ang imong desisyon sa DPA card, ug dad-a ni kanunay.

[Blurb sa panid 3]

Nakadesisyon ka na ba, ug imo na bang nasulat kon unsang mga pamaagi sa pagtambal nga imong dawaton?