Mihunong Sila Aron Motabang

Si Bob nagdrayb sa iyang van sa gikusgong 100 kilometros kada oras sa panahon nga tugnaw ug kusog kaayo ang hangin sa Alberta, Canada. Samtang nagdrayb, mibutog kalit ang ligid sa luyo sa iyang van. Wala mahibalo si Bob sa nahitabo, maong mipadayon ra siyag drayb ug lima ka kilometros padulong sa iyang balay.

Sa sulat nga iyang gipadala sa lokal nga Kingdom Hall sa mga Saksi ni Jehova, giestorya ni Bob ang sunod nga nahitabo. “Samtang nagdrayb ko, naay lima ka batan-on sa usa ka sakyanan nga mipaduol nako ug giablihan nila ang ilang bentana,” siya misulat. “Giingnan ko nila nga na-flat ang akong ligid. Mipadaplin mi ug mihunong, ug giingnan ko nga sila ray moilis sa ligid. Wa gani ko kahibalo kon naa ba koy reserbang ligid ug jack. Samtang naglingkod ko sa akong wheelchair daplin sa dalan, ilang gisuong ang ilalom sa van ug nakakitag reserbang ligid ug jack, ug ilang giilisan ang ligid. Tugnaw kaayo tong panahona kay nag-snow ug kusog ang hangin. Bisag pormal silag sinina, giilisan gihapon nila ang ligid, ug nakapadayon ko sa pagbiyahe. Dili nako to mahimo kon ako ra.

“Salamat sa lima ka batan-ong Saksi nga mitabang nako. Nagbiyahe sila adtong panahona kay manangyaw sila. Ila gyong gipadapat ang ilang gisangyaw. Kon wala ko nila tabangi, malisdan ug matanggong gyod ko adto, maong mapasalamaton kaayo ko nila. Kinsay magtuo nga naay batan-ong mga anghel sa kalsada niadtong adlawa?”