Ang Pagdayb sa Gannet

Ang mga gannet maoy dagkong langgam nga modayb sa dagat sa gikusgon nga moabot ug 190 kilometros kada oras. Dihang ang gannet moigo sa dagat, ang puwersa molabaw ug 20 ka pilo sa puwersa sa grabidad. Nganong ang mga gannet dili maunsa niining makapahingangha nga pagdayb bisag balikbalik pa nila ning himoon?

Hunahunaa: Dihang hapit nang moigo sa tubig ang gannet, ituy-od niini ang iyang mga pako palikod sa iyang lawas maong matul-id kini samag arrow. Itak-op sab niini ang membrane sa iyang mga mata aron maproteksiyonan kini ug paburoton niini ang mga organ nga naa sa iyang liog ug dughan nga magsilbing airbag aron dili ni maapektohan sa puwersa sa pagdayb.

Dihang ang gannet moigo na sa dagat, ang sungo, ulo, ug liog niini mopormag cone. Pinaagi niini, ang presyur sa tubig dili lang moigo sa usa ka muscle kondili sa tanang lig-on nga muscle sa liog sa gannet. Unya iadyas dayon sa gannet ang panan-aw niini aron makakita ni ilalom sa tubig.

Unsa ka lalom modayb ang gannet? Tungod sa kakusog sa pagdayb niini, moabot ni sa giladmong mga 11 metros (36 piye), pero makasalom pa nig mas lalom pinaagi sa paglangoy gamit ang mga pako niini ug mga tiil nga sama nianang sa itik. Gani, naay mga gannet nga nakit-ang midayb ug mas lawom pa sa 25 metros (82 piye). Human sa pagdayb niini, ang gannet dili maglisod sa pagtunga, ug andam na pod nga molupad.

Tan-awa ang pagdayb sa mga gannet

Ang mga researcher nagdisenyo ug robot nga mga gannet nga motabang sa search-and-rescue operation. Kini nga mga robot gidisenyo nga molupad, modayb sa tubig, ug molupad ug balik. Pero dihang gitestingan ni nga mga robot, ang usa niini kadaghan nabungkag tungod sa sobra ka kusog nga pagdayb niini sa tubig. Busa ang mga researcher mihinapos nga ang ilang gidisenyo nga robot “dili makatupong sa kahawod sa pagdayb sa gannet.”

Unsay imong hunahuna? Ang katakos ba sa gannet sa pagdayb mitungha pinaagig ebolusyon? O kini ba gidisenyo?