Gikan sa Among mga Magbabasa
Kaso sa Korte Dili ko maglangay sa pagpahayag sa akong pagpabili sa artikulong “Mga Kristohanon Nag-atubang na Usab sa Hataas nga Korte sa Jerusalem.” (Nobyembre 8, 1994) Makadaghan nako kining nabasa ug nalipay sa nahitabo. Tungod kay si Ariel Feldman mibarog nga malig-on dapig sa kon unsay matarong, usa ka kahibulongang pamatuod ang nahatag.
A. I. B., Brazil
Mga Bateriya Nagtrabaho ako uban sa mga bateriya ingong panginabuhi ug buot magpasalamat kaninyo sa balita sa “Pagpaniid sa Kalibotan” nga “Peligrosong mga Bateriya.” (Agosto 22, 1994) Apan dihay usa ka hinungdanong detalye nga wala malakip diha sa mga instruksiyon bahin sa pagpaandar ginamit ang jumper nga gihatag sa magasing Snow Country, nga mao, nga ang itom nga kable kinahanglang mao ang kataposang koneksiyon nga himoon.
P. R., Canada
Salamat sa sugyot alang sa kahilwas.—ED.
Pagmata! Nagdalag Paghupay Nabasa nako ang artikulong “Mga Magasin nga Nagahatag ug Praktikal nga Paghupay” (Enero 8, 1995), ug ako usab milampos sa pagtanyag ug daang mga isyu sa Pagmata! Kasagaran ang mga tawo mapasalamaton sa bisan unsang tabang nga mabatonan maylabot sa ilang mga suliran. Usa ka babaye mitug-an kanako nga ang iyang anak lalaki adunay Attention Deficit Hyperactivity Disorder. Akong gipahimutang ang isyung “Pagsabot sa Lisod Pitolon nga Kabataan” (Nobyembre 22, 1994) uban kaniya, ug siya nangayog laing 30 ka kopya aron ipaambit sa iyang mga higala!
D. Q., Tinipong Bansa
Human mabasa ang artikulong “Mga Magasin nga Nagahatag ug Praktikal nga Paghupay,” akong gipangita ang akong daandaang mga magasin sa pagsusi kon makakaplag akog pipila nga akong ikahatag ngadto sa mga propesyonal. Hangtod karon naduaw na nako ang usa ka sentro nga nag-atiman sa mga bata, duha ka punerarya, usa ka bilanggoan sa mga batan-on, usa ka publikong tunghaan, ug ang hunta sa edukasyon sa lungsod. Dali ra kong nahutdan ug mga magasin!
D. R., Tinipong Bansa
Pagkatagsaanon Salamat sa artikulong “Ang Hunahuna sa Bibliya: Sa Dihang ang Pagkatagsaanon Maoy Usa ka Gasa.” (Pebrero 8, 1995) Sa akong gipuy-an, ang kaminyoon usa ka dakong butang; ang Kristohanong mga igsoong lalaki ug babaye modasig kanimo sa pagminyo. Wala gayod ako maghunahuna mahitungod sa kaminyoon hangtod nga nag-edad akog 30. Unya misugod ako pagbati sa panginahanglan sa usa ka kauban. Mapasalamaton ako kang Jehova tungod sa pagtagana niining artikuloha sa panahon nga gibati nakong dili na ako makaagwanta.
E. M. A., Tinipong Bansa
Duha ka tuig kanhi nahimo akong payunir, usa ka bug-os-panahong ebanghelisador, ug sa paglabay sa panahon dugang ug dugang pang naamgohan nako kon unsa ka makapatagbaw ang pagalagad kang Jehova nga “walay kababagan.” Mihukom ako nga magpabiling tagsaanon—ang artikulo miabot sa tukma gayod nga panahon.
G. V., Italya
Mga Uso Sa inyong artikulo nga “Mga Batan-on Nangutana . . . Mga Uso—Angay ba Akong Mosunod Niini?” (Disyembre 8, 1994), inyong gihisgotan ang pagpapatik. Natingala ako nga wala ninyo hisgoti ang sugo sa Levitico 19:28: “Dili kamo magbutang ug patik sa inyong mga kaugalingon.”
L. D., Tinipong Bansa
Kining mga pulonga sa pagkatinuod naghatag ug usa ka sukod sa pagsabot sa panghunahuna sa Diyos bahin niining butanga. Siyempre, ang mga Kristohanon dili ilalom sa Moisesnong Kasugoan. (Colosas 2:14) Apan, ang mga indibiduwal maayong magbutang sa hunahuna niining tekstoha sa dihang mohukom kon unsay buhaton niining bahina. Ang gitaho nga mga riyesgo sa panglawas ug ang hunahunaon sa uban sa pagpapatik maoy dugang nga mga puntos nga kinahanglang timbangtimbangon pag-ayo sa usa ka Kristohanon.—ED.
Unom ka bulan kanhi misunod ako sa uso ug nakabaton ug patik sa akong kiting. Matag panahon nga tan-awon nako ang akong kiting, napahinumdoman ako sa akong desisyon. Mahibulong lamang ako kon unsang mga pagduhaduha ang mahimong batonan sa uban karon bahin sa akong kinaiya. Nabalaka usab ako kon ako makapandol sa uban diha sa kongregasyon. Magmahunahunaon na ako pag-ayo sa sunod nga higayon nga ang usa ka bag-ong uso mahimong popular.
S. C., Tinipong Bansa