LANGAW

[Heb., zevuvʹ, mga langaw].

Usa ka insekto nga duhay-pako sa pamilya nga Musca nga sagad mangitlog diha sa mga butang nga nadunot o mga basura. Ang gagming nga mga balhibo nga milukop sa lawas ug mga tiil sa langaw ingon man ang mga sapin sa pilitpilit nga mga balhibo sa matag tiil niini nagdala ug mga kagaw​—minilyon niini diha sa usa lamang ka langaw sa balay.

“Ang patayng mga langaw mao ang magpalang-og ug magpabulabula sa lana sa tighimog pahumot,” misulat ang magtitigom. Ang pagkadunot sa patayng mga langaw magpabaho sa lana ingon man magpaaslom ug magdaot niini, sama sa diyutayng kabuangan nga modaot sa dungog sa usa nga nailhan tungod sa iyang kaalam ug himaya.​—Ecc 10:1.

Si Isaias naghisgot kang Jehova nga nagtaghoy sa mga langaw sa kinatumyan sa mga kasapaan sa Nilo sa Ehipto ug sa mga putyokan sa yuta sa Asirya aron nga sila mopuyo sa mga pangpang sa bul-oganang mga walog, sa mga giwang sa dagkong mga bato, sa tunokong mga kalibonan, ug sa tanang tubigon nga mga dapit sa Juda. Dayag nga kini pagasabton sa mahulagwayong diwa, ang mga langaw nagpasabot sa kasundalohan sa Ehipto ug ang mga putyokan sa kasundalohan sa mga Asiryanhon.​—Isa 7:​18, 19.

Ang ngalan sa diyos nga gisimba sa mga Filistehanon didto sa Ekron, si “Baal-zebub,” nagkahulogang “Tag-iya sa mga Langaw.” Tungod niini gituohang ang iyang mga magsisimba lagmit nag-ila kaniya nga makakontrolar niini nga mga insekto. Sanglit ang paghatag ug mga orakulo gilangkit man kang Baal-zebub, gituohan sa uban nga kining ngalana lagmit nagkahulogang kini nga diyos naghatag ug mga orakulo pinaagi sa paglupad o paghadyong sa usa ka langaw.​—2Ha 1:​2, 6; tan-awa ang BAAL-ZEBUB.

Ang laing Hebreohanong pulong nga gihubad sa Cebuano ingong langaw mao ang ʽa·rov’. Dili matino kon unsang partikular nga insekto ang gipasabot niini nga orihinal nga Hebreohanong pulong nga makaplagan diha sa Kasulatan maylabot sa ikaupat nga hampak nga midangat sa Ehipto, ang una sa mga hampak diin ang mga Israelinhon sa Gosen wala maapektohi. (Ex 8:​21, 22, 24, 29, 31; Sal 78:45; 105:31) Ang ʽa·rovʹ gihubad sa lainlaing paagi ingong “langaw” (AS, JB, KJ, NW, Ro, RS), “bakukang” (Yg), “mga tagnok” (AT), ug “langaw sa hayop” (LXX).

Ang “langaw” sa Cebuano naglakip sa lainlaing matang sa mga bangaw ug mga lagong. Ang baye nga mga bangaw motusok sa panit sa mga hayop ingon man sa tawo ug dayon mosupsop sa ilang dugo. Sa dihang kini ulod pa, ang mga lagong mopuyo ingong mga parasito diha sa mga lawas sa hayop ug sa tawo; ang matang nga motapot sa mga tawo makaplagan sa mga lugar sa tropiko. Busa, ang usa ka hampak sa mga langaw nagpahinabog dakong pag-antos sa mga Ehiptohanon ug sa ilang kahayopan ug, sa pipila ka kahimtang, nagpahinabo gani ug kamatayon.