TANGKOB

[Heb., ʽash; sas (tangkob sa besti); Gr., ses].

Usa ka insekto nga upat ug pako nga kaamgid sa alibangbang apan lahi niini kay ang antena sa tangkob kasagaran balhiboon ug ang tumoy niini dili linginon. Kon dili maglupad, ang mga pako sa tangkob dili motindog sama sa mga pako sa alibangbang. Hinunoa, kini tiklopon ibabaw sa likod sa insekto o kaha ipabitay diha sa ilang kilid. Dugang pa, ang mga tangkob kasagarang mogula sa gabii. Ang insekto nga gihisgotan diha sa Kasulatan dayag nga mao ang tangkob sa besti (Tineola bisselliella), ilabina sa dihang ulod pa kini ug kusog mangutkot. (Job 13:28; Sal 39:11; Isa 50:9; 51:8; Os 5:12; Mat 6:​19, 20; Luc 12:33; itandi ang San 5:2.) Ang pagkasayon dugmokon sa usa ka tangkob maoy usa ka paglarawan nga gigamit ni Elipaz maylabot sa kahuyang sa may-kamatayong tawo.​—Job 4:​17, 19, 20.

Ang baye nga mga tangkob sa besti mangitlog diha sa mga panapton nga delana o sa seda o sa mga panapton nga ginama sa mga balhibo sa hayop, ug ikatag kini aron ang mogula nga mga hantatawo dakog lugar nga kasuroysuroyan ug daghag makaon. Ayha pa mokaon ang mga hantatawo kon sila makatago na sa ilang mga “balay” o bayanan nga gihimo ginamit ang makuhang mga lanotlanot. Dinhi niini nga “balay” sila magpuyo samtang mokaon.​—Job 27:18.