KEREN-HAPUK

[lagmit, Sungay sa Itom nga Pintal (sa Mata) [nga mao, sudlanan sa galamiton sa pangpaanyag]].

Ang ikatulo ug kamanghoran sa mga anak nga babaye ni Job human sa iyang dakong pagsulay ug pag-antos ug sa pagpanalangin ni Jehova kaniya. (Job 42:12-14) Kining ngalana lagmit nagkahulogang maanindot nga mga mata, o tingali sa katibuk-an nagpaila sa iyang hilabihang kaanyag, sanglit “sa tibuok yuta walay mga babaye nga nakaplagan nga sama kaanyag sa mga anak nga babaye ni Job.” (Job 42:15) Ang asul-puti nga metalikong substansiya nga antimony magpatunghag sidlak itom nga bulok nga gigamit sa mga babayeng taga-Sidlakan sa mga adlaw sa Bibliya aron sa pagtina sa ilang pilok ug tingali sa ilang mga kilay, o gigamit kini sa pagkolor sa mga kilid sa ilang tabontabon, sa ingon makapahimo sa mga mata nga dako tan-awon ug magilakon.​—Tan-awa ang 2Ha 9:30; Jer 4:30.