Nagbarog Diha sa Ganghaan sa Mas Dakong Buluhaton

“WALAY espiritu sa panag-indigay. Ang tanan buot nga molampos ang tanan,” matod ni Richard ug Lusia, nga naghubit sa ilang mga isigkaestudyante sa ika-105ng klase sa Watchtower Bible School of Gilead. “Kaming tanan managlahi kaayo, apan alang kanamo, ang matag estudyante maoy bililhon.” Usa ka klasmet, si Lowell, miuyon, nga midugang: “Ang among kalainan nakapadani kanamo sa usag usa.”

Ang klase, nga migraduwar sa Septiyembre 12, 1998, tinuod gayod nga nagkalainlain. Pipila sa mga estudyante nakapayunir sa mga dapit diin adunay dakong panginahanglan sa mga magmamantala sa Gingharian; ang uban matinumanong nag-alagad nga mas duol sa ilang panimalay. Dunay pipila, sama ni Mats ug Rose-Marie, nga kinahanglang maningkamot sulod sa daghang oras ug magkugi pag-ayo aron sa pagpauswag sa ilang Iningles una pa sila mitungha. Daghan sa mga estudyante ang kanunayng naghunahuna bahin sa misyonaryong pag-alagad sukad sa pagkabata. Ang usa ka magtiayon miaplay ug 12 ka beses; pagkamalipayon nila sa pagkadawat ug imbitasyon alang sa ika-105ng klase!

Ang 20 ka semana sa bug-os nga pagbansay dali ra kaayong milabay. Wala lang hiamgohi sa mga estudyante, ila nang gisumiter ang ilang kataposang sinulat nga pasulit, nakahatag na sa ilang kataposang binaba nga taho, ug miabot na ang adlaw sa graduwasyon.

Ang tsirman sa programa, si Albert Schroeder, membro sa Nagamandong Lawas sa mga Saksi ni Jehova, nagpahinumdom sa klase nga sila “nagbarog diha sa ganghaan sa mas dakong buluhaton sa natad sa edukasyon sa Bibliya,” nga nagsunod sa kapin sa 7,000 ka uban pa nga miuna kanila sa pagtungha sa Gilead. Siya miingon nga sa panahon sa ting-init, ang mga estudyante nakatagamtam sa talagsaong oportunidad nga makauban ang karaang mga misyonaryo sa dihang miduaw kini sa tibuok-kalibotang hedkuwarter duyog sa internasyonal nga mga kombensiyon.

Dayon gipailaila ni Brader Schroeder si Max Larson sa Bethel Operations Committee. Siya naghan-ay sa temang “Edukasyon nga Motultol sa Kinabuhing Walay Kataposan.” Si Brader Larson mikutlo sa Proverbio 1:​5, nga nag-ingon: “Ang tawong maalamon mamati ug modawat ug dugang nga instruksiyon, ug ang tawo sa pagsabot mao ang usa nga makabaton ug mahanasong pagtultol.” Ang kahanas gikinahanglan aron mahimong epektibong misyonaryo. Ang hanas nga mga tawo mobarog atubangan sa mga hari. (Proverbio 22:29) Human mahatagag instruksiyon sulod sa lima ka bulan, ang mga estudyante nasangkapan na pag-ayo sa paghawas sa labing bantogang mga Hari, si Jehova nga Diyos ug si Kristo Jesus.

Si David Olson sa Departamento sa Pag-alagad maoy sunod nga midiskurso sa ulohang “Tabang sa Paglipay sa Kasingkasing ni Jehova.” Siya nangutana: “Unsay arang mahimo sa dili-hingpit nga mga tawo sa paglipay sa kasingkasing sa Diyos?” Ang tubag? Makaalagad sila kaniya nga matinumanon, maunongon, ug may kangaya. Buot ni Jehova nga malipay ang iyang katawhan sa ilang pag-alagad kaniya. Sa dihang atong tumanon ang kabubut-on sa Diyos uban ang kangaya, atong gilipay ang iyang kasingkasing. (Proverbio 27:11) Gibasa ni Brader Olson ang usa ka sulat gikan sa misyonaryong magtiayon nga migraduwar sa ika-104 nga klase sa Gilead. Nalipay ba sila sa ilang bag-ong asaynment? “Kami adunay mga 140 ka magmamantala,” sila misulat mahitungod sa ilang kongregasyon, “nga may aberids nga tumatambong sa tigom nga 250 ngadto sa 300. Ang pag-alagad sa kanataran mao ang labing maayong bahin. Matag usa kanamo adunay upat ka ginatun-an, ug ang pipila nagtambongan na sa mga tigom.”

Si Lyman Swingle, sa Nagamandong Lawas, mihisgot sa ulohang “Usa ka Panahon sa Paghunahuna ug Pag-ihap sa Inyong mga Panalangin.” Ang pagbansay sa Gilead nagpahinabog daghang panalangin. Nakatabang kini sa mga estudyante nga mouswag sa kahibalo, molambo ang pagpabili sa organisasyon ni Jehova, ug maugmad ang hinungdanong mga hiyas, sama sa pagkamapainubsanon. “Maoy makapaubos nga kasinatian ang pag-anhi dinhi ug paggugol ug panahon sa pagpamatig instruksiyon,” matod ni Brader Swingle, nga midugang: “Mobiya kamo dinhi nga mas labi pang nasangkapan sa pagbayaw kang Jehova.”

“Pagkadako sa Inyong Kangaya​—Busa Nganong Mabalaka?” mao ang ulohan sa pakigpulong ni Daniel Sydlik, membro usab sa Nagamandong Lawas. Sa dihang motungha ang mga suliran, pangitaa ang giya gikan sa Kasulatan, siya miawhag. Nga naggamit sa pinili nga mga bersikulo sa ika-6 nga kapitulo sa Mateo, giilustrar ni Brader Sydlik kon sa unsang paagi kini himoon. Ang kakulang sa pagtuo makapabalaka kanato maylabot sa ordinaryong mga butang, sama sa pagkaon ug besti. Hinunoa, nasayod si Jehova kon unsay atong gikinahanglan. (Mateo 6:​25, 30) Ang pagkabalaka makadugang lamang sa mga kalisdanan nga dala sa matag adlaw. (Mateo 6:34) Sa laing bahin, kinahanglan ang mga pagplano. (Itandi ang Lucas 14:28.) “Ang gidili ni Jesus maoy, dili ang maalamong pagpalandong alang sa umaabot, kondili ang di-maalamong pagkabalaka labot niini,” mipatin-aw si Brader Sydlik. “Ang paglihok maoy usa sa labing maayong mga tambal sa kahingawa. Sa dihang kita mahingawa, makaayo kanato ang pagsugod ug hisgot bahin sa kamatuoran.”

Panamilit nga Tambag Gikan sa mga Instruktor

Misunod ang mga pakigpulong sa tulo ka membro sa pakultad sa Gilead. Si Karl Adams maoy unang misulti, sa ulohang “Unsay Imong Ibayad Kang Jehova?” Ang iyang pakigpulong gibase sa ika-116 nga Salmo, nga mahimong giawit ni Jesus sa gabii una pa sa iyang kamatayon. (Mateo 26:​30, potnot) Unsay misantop sa hunahuna ni Jesus samtang giawit niya ang mga pulong: “Unsa man ang akong ibayad kang Jehova tungod sa tanan niyang mga kaayo kanako”? (Salmo 116:12) Tingali iyang gipalandong ang hingpit nga lawas nga giandam ni Jehova alang kaniya. (Hebreohanon 10:5) Pagkasunod nga adlaw, iyang itanyag kanang lawasa ingong halad, nga nagpamatuod sa kalalom sa iyang gugma. Ang mga estudyante sa ika-105ng klase nakatagamtam sa pagkamaayo ni Jehova sa milabayng lima ka bulan. Karon ilang ipakita ang ilang paghigugma sa Diyos pinaagi sa paghago diha sa ilang misyonaryong mga asaynment.

Si Mark Noumair, ang ikaduhang instruktor sa Gilead nga nagpakigpulong, nagtambag sa mga estudyante nga “Magpadayon sa Pagbuhat Kon Unsay Matarong.” Si Jose, human siya ibaligya ingong usa ka ulipon sa Ehipto, nag-agwanta ug 13 ka tuig sa dili-makataronganong pagtratar. Iya bang gitugotan ang kasaypanan sa uban nga mopahunong kaniya sa pag-alagad sa Diyos? Wala, nagpadayon siya sa paghimog matarong. Dayon, sa tinudlong panahon sa Diyos, giluwas si Jose gikan sa iyang mga kalisdanan. Sa kalit lang, nausab ang iyang kahimtang gikan sa pagpuyo diha sa usa ka bilanggoan ngadto sa pagpuyo diha sa usa ka palasyo. (Genesis, mga kapitulo 37–​50) Gipangutana sa instruktor ang iyang mga estudyante: “Kon ang inyong mga gidahom wala makab-ot diha sa inyong misyonaryong asaynment, moundang ba kamo? Magpadaog ba kamo sa kawalay-paglaom? O molahutay ba kamo, sama ni Jose?”

Sa kataposan, ang tigrehistro sa Tunghaang Gilead, si Wallace Liverance, nagdumala sa masadya nga panaghisgot uban sa mga membro sa klase bahin sa temang “Imantala ang Hari ug ang Gingharian.” Ang pipila sa mga estudyante miasoy sa ilang mga kasinatian samtang nagsangyaw sa balay ug balay, sa tindahan ug tindahan, ug sa kadalanan. Ang uban miasoy kon sa unsang paagi sila nagsangyaw ngadto sa mga tawong nagsultig laing pinulongan. Gipakita sa uban pa kon unsaon pagsangyaw ngadto sa mga tawo nga may lahing relihiyosong mga kagikan. Ang tanan nga migraduwar naikag nga makigbahin sa bug-os sa ministeryo diha sa misyonaryong natad.

Malipayon nga Karaang mga Misyonaryo

Ang misunod nga bahin, nga may ulohang “Ang Mangayaong mga Resulta nga Nagsumikad sa Misyonaryong Pag-alagad,” gihatag ni Robert Wallen ug gilangkoban ug mga interbiyo sa upat ka igsoong lalaki nga mga membro sa kawani sa hedkuwarter nga di pa dugayng nakabaton ug makapalig-ong pagpakig-uban sa may-kasinatiang mga misyonaryo. Kadto nga mga misyonaryo dihadihang midawat nga dili sayon alang kanila ang pagkat-on ug bag-ong pinulongan, ang pagpasibo ngadto sa laing kultura, o ang pagpahiangay ngadto sa lahing klima. Dayon anaa ang sagubangonon nga kasakit sa kamingaw sa pamilya. Usahay, mitungha ang mga suliran sa panglawas. Apan latas niining tanan, ang mga misyonaryo padayong naghupot ug positibong tinamdan, ug ang ilang pagkamalahutayon gipanalanginan. Ang pipila nakatabang sa daghang tawo nga makabaton ug kahibalo bahin kang Jehova. Ang uban nakaamot sa nagkadaiyang mga paagi ngadto sa kinatibuk-ang pag-uswag sa buluhaton sa Gingharian diha sa mga nasod diin sila giasayn.

Ang kataposang midiskurso mao si Carey Barber, membro sa Nagamandong Lawas. Iyang gisubli ang dagkong mga punto sa “Iya sa Diyos nga Dalan sa Kinabuhi” nga programa sa kombensiyon. “Unsay epekto sa programa sa kombensiyon diha sa inyong relasyon kang Jehova?” gipangutana niya ang iyang mamiminaw. Gitandi sa mamumulong ang bulahang mga sangpotanan sa pagsunod sa dalan sa Diyos sukwahi sa malaglagong kataposan niadtong nagsunod sa dalan sa kalibotan. Nga nagtumong sa kalapasan ni Moises sa Meriba, siya mipasidaan: “Bisan pag human nga ang usa ka tawo matinumanong nag-alagad sa daghang tuig, si Jehova dili magbalewala sa bisan gamayng pagsupak sa Iyang matarong nga mga balaod.” (Numeros 20:​2–​13) Hinaot nga ang tanang alagad sa Diyos bisan diin padayong manghawid ug hugot diha sa ilang bililhong mga pribilehiyo sa pag-alagad!

Miabot na ang panahon alang sa mga estudyante sa pagdawat sa ilang mga diploma. Dayon, ang hawas sa klase mibasa sa sulat sa pagpasalamat alang sa pagbansay nga nadawat sa mga estudyante. Human ang paniklop nga awit ug kinasingkasing nga pag-ampo, ang programa sa graduwasyon natapos na. Apan, alang sa ika-105ng klase, mao lamang kini ang sinugdanan, tungod kay ang bag-ong mga misyonaryo “nagbarog diha sa ganghaan sa mas dakong buluhaton.”

Ilang Gipili ang Bug-os-Panahong Pag-alagad

“Sa dihang batan-on pa ako, wala akoy plano nga magpayunir,” matod ni Ben, graduwado sa ika-105ng klase. “Abi nakog kadto lamang may linaing mga katakos ug maayong mga kahimtang ang makapayunir,” siya midugang. “Apan natun-an kong higugmaon ang pag-alagad sa kanataran. Dayon usa ka adlaw niana misantop sa akong hunahuna nga ang pagkahimong payunir nagkahulogan lamang ug mas dakong pagpakigbahin diha sa ministeryo. Mao kadtong tungora nga akong naamgohan nga mahimo akong makapayunir.”

“Ang bug-os-panahong mga alagad kanunayng gitamod pag-ayo diha sa among panimalay,” misugilon si Lusia. Iyang nahinumdoman ang bul-og sa kaukyab nga mokuyanap sa iyang kongregasyon sa matag higayon nga ang mga misyonaryo moduaw. “Sa dihang nagdako ako,” siya miingon, “gisabot na nga ang bug-os-panahong pag-alagad nalakip gayod diha sa akong mga plano.”

Ang inahan ni Theodis namatay sa dihang 15 anyos siya. “Niadtong panahona, ang kongregasyon nagpaluyo gayod kanako,” matod niya, “busa akong gipangutana ang akong kaugalingon, ‘Unsay arang kong mahimo sa pagpakita sa akong pagpabili?’” Mitultol kini kaniya nga mosulod sa bug-os-panahong pag-alagad ug karon sa misyonaryong buluhaton.

[Kahon sa panid 23]

Estadistika sa Klase

Gidaghanon sa mga nasod nga gihawasan: 9

Gidaghanon sa mga nasod nga gipadalhan: 17

Gidaghanon sa mga estudyante: 48

Gidaghanon sa mga magtiayon: 24

Aberids nga edad: 33

Aberids nga katuigan sa kamatuoran: 16

Aberids nga katuigan sa bug-os-panahong ministeryo: 12

[Kahon sa panid 24]

Ika-105ng Migraduwar nga Klase sa Watchtower Bible School of Gilead

Sa listahan sa ubos, ang mga laray ginumerohan gikan sa atubangan ngadto sa likod, ug ang mga ngalan gilista gikan sa wala ngadto sa tuo sa matag laray

(1) Sampson, M.; Brown, I.; Heggli, G.; Abuyen, E.; Desbois, M.; Pourthié, P. (2) Kassam, G.; Lindberg, R.; Dapuzzo, A.; Taylor, C.; LeFevre, K.; Walker, S. (3) Baker, L.; Pellas, M.; Woggon, E.; Böhne, C.; Asplund, J.; Haile, J. (4) Pourthié, T.; Whittaker, J.; Palmer, L.; Norton, S.; Gering, M.; Haile, W. (5) Walker, J.; Böhne, A.; Groenveld, C.; Washington, M.; Whittaker, D.; Abuyen, J. (6) Gering, W.; Washington, K.; Pellas, M.; Desbois, R.; Heggli, T.; Asplund, Å. (7) Woggon, B.; LeFevre, R.; Taylor, L.; Brown, T.; Groenveld, R.; Palmer, R. (8) Norton, P.; Sampson, T.; Baker, C.; Lindberg, M.; Kassam, M.; Dapuzzo, M.