BALHIBO SA KARNERO

Ang humokon, kuloton nga buhok nga nagtabon sa panit sa mga karnero. Kini aloton ug kasagarang gigamit sa mga Hebreohanon ug sa uban pa sa karaang kapanahonan sa paggama ug besti ug sa pagborda. (Ex 35:4-6, 25; 36:​8, 35, 37; 38:18; 39:1-8, 22-29; Lev 13:47; Pr 31:​13, 22; Eze 34:3) Ang delana nga besti mohatag ug insulasyon sa kainit ug kabugnaw ug kini maoy komportable, nga naghatag ug kainit apan dili kaayo bug-at sul-obon ug mopasuhop sa kaumog apan dili mobatig kabugnaw ang nagsul-ob niini.

Ubos sa Balaod, ang mga Israelinhon gisugo nga ihatag ang “unang inalot nga balhibo” sa ilang mga panon sa karnero ngadto sa mga saserdote. (Deu 18:3-5) Ang katawhan nga dili mga saserdote gidid-an sa ‘pagsul-ob sa sapot nga hinabol sa balhibo sa karnero ug sa lino.’​—Deu 22:11; Lev 19:19; tan-awa ang PANAPTON, TABIL (Ubang mga Gamit).

Ang kahinungdanon sa balhibo sa karnero sa karaang kapanahonan gipakita sa kamatuoran nga ang Moabihanon nga si Haring Mesa mibayad ug “usa ka gatos ka libo ka nating karnero ug usa ka gatos ka libo ka wala-matupihing laking karnero” ngadto sa hari sa Israel ingong tributo. (2Ha 3:4) Ang balhibo sa karnero maoy usa usab ka bililhong baligya.​—Eze 27:​1, 2, 7, 16, 18.

Sanglit sagad puti ang balhibo sa karnero, kini usahay gilangkit sa kaputi ug kaputli. Pananglitan, pinaagi sa manalagnang si Isaias, gipakasama ni Jehova ang gipasaylo nga mga sala ngadto sa puti nga balhibo sa karnero, nga nag-ingon: “Bisan tuod ang inyong mga sala sanag-pula, kini papution sama sa niyebe; bisan tuod kini mapula sama sa lutong-pula nga panapton, kini mahimong sama sa balhibo sa karnero.”​—Isa 1:18-20.

Si Jehova naghatag ug “niyebe sama sa balhibo sa karnero,” nga nagbakbak sa yuta ingon sa usa ka mainit nga bakbak sa puting balhibo sa karnero.​—Sal 147:16.

“Ang Karaan sa mga Adlaw,” si Jehova nga Diyos, gilarawan sa simbolikong paagi diha sa panan-awon ingong adunay buhok sama sa mahinlong balhibo sa karnero. (Dan 7:9) Kini nagpasabot sa hilabihan kataas nga pangedaron ug kaalam, nga gilangkit sa pagkaubanon. (Itandi ang Job 15:​9, 10.) Sa susama, si apostol Juan nakakita ug “usa nga sama sa anak sa tawo” ug nakamatikod nga “ang iyang ulo ug ang iyang buhok maputi ingon sa maputing balhibo sa karnero, ingon sa niyebe.” (Pin 1:12-14) Ang iyang buhok nga gihulagway niining paagiha tingali nagpasabot nga kini nahimong puti diha sa dalan sa pagkamatarong.​—Pr 16:31.