Kon sa Unsang Paagi Mahuptan ang Kangaya Diha sa Bug-os-Panahong Pag-alagad
ANG katumanan sa tagna sa Bibliya tin-awng nagpakita nga kita nagkinabuhi sa kataposang mga adlaw niining dili-motuo-sa-Diyos nga sistema. Kay nakaamgo niini, ang mga alagad ni Jehova nga Diyos naggugol ug panahon kutob sa ilang maarangan sa pagpakaylap sa maayong balita sa iyang Gingharian. Kapin sa 600,000 ka Saksi ni Jehova ang naghikay sa ilang mga kinabuhi aron makapakig-ambit sa bug-os-panahong pag-alagad. Ang pipila kanila maoy bug-os-panahong mga magwawali sa Gingharian nga gitawag ug mga payunir. Ang uban maoy mga boluntaryo sa Bethel sa hedkuwarter sa Watch Tower Society o sa mga sangang buhatan niini. Ang uban pa maoy mga misyonaryo ug nagapanawng mga magtatan-aw.
Ang Bibliya nagpakita nga sa kataposang mga adlaw, adunay “makuyaw nga mga panahong lisod sagubangon.” (2 Timoteo 3:1-5) Ang teksto sa Gregong Bibliya naggamit sa ekspresyon nga mahimong hubaron ug “tinudlong kapanahonan nga mabangis.” Busa, wala gayoy magdahom ug kinabuhi nga walay suliran sa atong adlaw. Alang sa pipila ka Kristohanong mga ministro, ang suliran daw seryoso kaayo nga sila hayan mangutana sa ilang kaugalingon, ‘Makapadayon ba ako sa bug-os-panahong pag-alagad, o kinahanglan ba akong moundang?’
Unsang mga kahimtanga ang magpahinabo tingali sa usa nga timbangtimbangon ang iyang kahimtang ingong payunir, boluntaryo sa Bethel, nagapanawng magtatan-aw o misyonaryo? Tingali naglungtad ang grabeng suliran sa panglawas. Hayan ang tigulang o baldadong paryente nagkinahanglan ug kanunayng pag-atiman. Mahimo usab nga ang magtiayon manganak. Si bisan kinsa nga dili mopadayon sa bug-os-panahong pag-alagad tungod sa maong mga katarongan ug tungod sa Kasulatanhong mga obligasyon dili kinahanglang mobati ug kaulaw sa paghimo sa maong kausaban.
Apan, komosta kon ang usa nagplano nga mohunong sa bug-os-panahong pag-alagad gumikan sa kakulang sa kangaya? Tingali diyutay lang ang nakaplagan sa payunir nga pagsanong diha sa iyang ministeryo ug mangutana, ‘Nganong mopadayon pa sa akong nagsakripisyo-sa-kaugalingong estilo sa kinabuhi sa dihang diyutay lang ang maminaw?’ Tingali ang usa ka boluntaryo sa Bethel dili kaayo malipayon sa iyang asaynment. O mahimong ang nagahasol kanunay nga dili-maayong panglawas, bisan tuod wala magpugong sa payunir nga pag-alagad, sa kataposan nakaiban sa kalipay sa usa ka tawo. Sa unsang paagi mahuptan sa maong mga indibiduwal ang ilang kangaya? Konsiderahon nato kon unsay giingon sa pipila ka eksperyensiyadong mga ministro.
Pagsagubang sa Kahigawad
Si Anny, nga taga-Switzerland, mitambong sa Watchtower Bible School of Gilead niadtong 1950. Nagdahom siya ug misyonaryong asaynment gawas sa Uropa. Sa dihang giasayn siya pag-usab sa trabaho sa Bethel sa Uropa, si Anny nahigawad. Bisan pa niana, gidawat niya ang iyang asaynment sa Translation Department ug nagabuhat gihapon sa maong buluhaton. Sa unsang paagi nabuntog niya ang iyang kahigawad? “Dihay ug adunay daghang buluhaton nga angayng himoon. Ang akong mga pagbati ug mga gusto dili sama ka hinungdanon kay sa buluhaton,” misaysay si Anny.
Kon kita nahigawad sa atong asaynment, tingali maugmad nato ang tinamdan ni Anny. Ang atong personal nga kagustohan dili mao ang labing hinungdanon. Ang labing hinungdanon mao nga ang tanang lainlaing mga responsibilidad nga nalangkit sa pagpakaylap sa mensahe sa Gingharian madumala pag-ayo. Ang Proverbio 14:23 nagtug-an kanato nga “pinaagi sa tanang matang sa pagbuhat adunay usa ka kaayohan.” Bisan unsa mang asaynment ang gihatag kanato, ang pagbuhat niana nga matinumanon makaamot sa kalamposan sa buluhaton sa Gingharian. Ug mahimong adunay dakong katagbawan—oo, kangaya—sa maong hinatag-Diyos nga buluhaton.—Itandi ang 1 Corinto 12:18, 27, 28.
Pakigsinabtanay sa Uban
Ang bug-os-panahong pag-alagad naglangkit ug suod nga pakigkontak sa tanang matang sa mga tawo—diha sa ministeryo sa kanataran, sa Bethel, sa puy-anan sa misyonaryo, o samtang nagaduaw sa sunodsunod nga kongregasyon ingong nagapanawng magtatan-aw. Busa, ang kangaya nagaagad sa dakong sukod sa pakigsinabtanay sa uban. Bisan pa niana, ang ‘mabangis nga kapanahonan’ nga gitagna alang niining kataposang mga adlaw nagpalisod sa tawhanong mga relasyon. Sa unsang paagi ang usa ka ministro makalikay nga dili mawad-an sa iyang kangaya, bisan pag adunay nakapapikal kaniya? Hayan aduna kitay makat-onan gikan kang Wilhelm.
Si Wilhelm nahimong membro sa usa ka pamilyang Bethel sa Uropa niadtong 1947. Human niadto, migugol siyag panahon sa payunir nga buluhaton ug sa pag-alagad ingong nagapanawng magtatan-aw. “Kon ang akong asawa ug ako makakita ug mga butang nga among gihunahuna nga dili husto o nakapabalaka kanamo sa personal, among suginlan si Jehova kon unsay among gibati ug dayon isalig kaniya ang pagsulbad sa mga butang,” misaysay si Wilhelm.—Salmo 37:5.
Hayan ikaw mismo nahasol sa panggawi sa usa ka isigka-Kristohanon nga misulti kanimo sa dili-matinahuron o dili-mahunahunaong paagi. Hinumdomi nga kitang tanan mapandol sa makadaghan sa atong sinultihan. (Santiago 3:2) Busa nganong dili gamiton kining maong kahimtang aron mas mahiduol sa “Tigpatalinghog sa pag-ampo”? (Salmo 65:2) Sultihi si Jehova bahin sa maong butang, ug dayon isalig kana kaniya. Kon buot sa Diyos nga himoon ang mga kausaban, buhaton niya kana. Kadtong nagapuyo sa puy-anan sa misyonaryo nagkinahanglan tingaling magbutang niini sa hunahuna kon ang suliran nga sama niana motungha, kay kini motabang kanila sa paghupot sa ilang kangaya diha sa pag-alagad kang Jehova.
Sa Dihang Dili-Maayo ang Panglawas
Diyutay rang mga tawo ang nakapahimulos kanunay ug maayong panglawas. Bisan kadtong anaa sa gitawag ug labing maayong yugto sa kinabuhi mahimong maapektohan sa depresyon o sakit. Tungod sa dili-maayong panglawas ang pipila kinahanglang mohunong sa bug-os-panahong pag-alagad, apan human niana naghimo sila ug ekselenteng buluhaton ingong mga magmamantala sa Gingharian. Apan, ang uban makapadayon gihapon sa bug-os-panahong pag-alagad bisan pa sa dili-maayong panglawas. Pananglitan, tagda si Hartmut ug Gislind.
Si Hartmut ug Gislind maoy magtiayon nga naggugol na ug 30 ka tuig ingong mga payunir, mga misyonaryo, ug sa nagapanawng buluhaton. Silang duha nag-antos sa pag-atake sa grabeng mga sakit nga usahay nagpaluya kanila sa pisikal ug sa emosyonal. Bisan pa niana, sila nakahimog ekselenteng buluhaton ug nakadasig sa uban nga nakasinati sa samang mga pagsulay. Unsang tambag ang ilang gitanyag? “Lantaw sa umaabot ug dili sa nangagi. Pahimusli pag-ayo ang matag situwasyon. Ang matag adlaw mahimong magdala ug usa ka kahigayonan sa pagdayeg kang Jehova. Gamita kanang maong kahigayonan, ug pahimusli kana.”
Tagda ang kaso ni Hannelore. Gihasol siya sa sugmatsugmat nga balatian sulod sa 30 ka tuig ingong payunir, misyonaryo, sa nagapanawng buluhaton kauban sa iyang bana, ug sa pag-alagad sa Bethel. Si Hannelore miingon: “Gitumong nako ang akong pagtagad sa isyu nga gipatungha ni Satanas—nga ang mga tawo nag-alagad lamang kang Jehova sa dihang ang pagbuhat niana sayon alang kanila. Pinaagi sa paglahutay sa mga pagsulay, makabaton ako ug bahin sa pagpamatuod nga sayop si Satanas.” Mahimo kining usa ka lig-ong panukmod. Hinumdomi nga ang imong personal nga pagkamaunongon kang Jehova sa dihang nailalom sa pagsulay hinungdanon kaniya.—Job 1:8-12; Proverbio 27:11.
Sa dihang naningkamot sa paghimog timbang nga desisyon maylabot sa imong panglawas, tagda ang duha ka bahin sa tagna ni Jesu-Kristo bahin sa konklusyon sa sistema sa mga butang. Si Jesus nagtagna ug mga kamatay sa sunodsunod nga mga dapit. Siya miingon usab: “Kining maayong balita sa gingharian igawali sa tibuok gipuy-ang yuta.” (Mateo 24:3, 14; Lucas 21:11) Nasayod si Jesus nga sa kataposang mga adlaw, ang iyang mga sumusunod makigbisog sa sakit. Apan naamgohan niya nga ang buluhatong pagsangyaw tumanon dili lamang sa mga tawo nga nagpahimulos ug maayong panglawas kondili usab sa mga indibiduwal nga nakasinati ug grabeng balatian. Kon kita makapadayon sa bug-os-panahong pag-alagad bisan pa sa dili-maayong panglawas, si Jehova dili malimot sa gugma nga atong gipakita sa iyang ngalan.—Hebreohanon 6:10.
Paghupot ug Kangaya Bisan pa sa Pagkadili-Matinagdanon sa mga Tawo
Ang atong tinamdan mahimong maapektohan kon sa unsang paagi ang mga tawo mosanong sa buluhatong pagwali sa Gingharian. “Bisan ang mga payunir malisdan pagsugod ug kabildohay uban sa usa ka tagbalay,” miingon ang usa ka eksperyensiyadong ministro. “Kitang tanan kinahanglang manglimbasog aron mahuptan ang atong kangaya.” Oo, ang pagkadili-matinagdanon sa mga tawo makaiban sa atong kangaya diha sa pag-alagad sa kanataran. Busa sa unsang paagi ang usa ka payunir nga kanunayng nasugamak sa kawalay-kaikag makahupot sa iyang kangaya? Ang eksperyensiyadong mga ministro nagtanyag sa mosunod nga mga sugyot nga nasulayan na.
Ang pagkadili-matinagdanon nagpasabot ug usa ka hagit, apan dili kinahanglang magkahulogan kana ug kaparotan. Sa kaugalingon niini, ang kaylap nga kawalay-kaikag dili katarongan nga mohunong sa bug-os-panahong pag-alagad. Mahuptan nato ang atong kangaya atubangan sa pagkadili-matinagdanon kon mogahin kita ug igong panahon alang sa makugihong pagtuon sa Kasulatan. Kini ‘magsangkap kanato alang sa tanang maayong buhat,’ ug kana naglakip sa pagpakigsulti niadtong dili maminaw sa maayong balita. (2 Timoteo 3:16, 17) Bisan pag ang mga tawo dili gustong maminaw sa propetang si Jeremias, wala kadto magpahunong kaniya. (Jeremias 7:27) Sa dihang nagtuon sa Bibliya uban sa tabang sa Kristohanong mga publikasyon, kita makabaton ug dakong kaayohan kon atong matikdan ang mga hunahuna nga makapalig-on sa atong pagtuo ug makatabang kanato sa pagsagubang sa pagkadili-matinagdanon.
Ibutang ta nga ang kawalay-pagtagad usa ka hagit, susihon nato ang atong tinamdan ngadto sa atong gisangyawan. Nganong sila walay-kaikag? Pananglitan, usa ka katarongan sa kaylap nga kawalay-pagtagad sa mga dapit sa Uropa mao ang ngil-ad nga rekord sa bakak nga relihiyon. Ang mga tawo wala na mobati nga ang relihiyon adunay luna sa ilang mga kinabuhi, ni buot nilang malangkit niana. Kinahanglan kitang magmapasiboon, nga makigsulti sa mga tawo bahin sa mga butang nga nag-apektar gayod kanila, sama sa kawalay-trabaho, panglawas, krimen, pagkamatugoton, kalikopan, ug hulga sa gubat.
Sa atong pangbukas nga mga pulong sa tagbalay, mahimo natong hisgotan ang usa ka balita nga gikaikagan sa mga tawo sa maong dapit. Mao kanay gisulayan pagbuhat ni Dietmar sa dihang nagsangyaw siya sa usa ka balangay nga diyutay lang ang iyang kalamposan. Usa ka residente naghisgot nga ang balangay nakasinati ug trahedya sa miaging adlaw. Sa matag pultahan human niadto, si Dietmar nagpahayag ug kinasingkasing nga pahasubo bahin sa trahedya. “Sa kalit lang, ang mga tawo nagsugod sa pagsulti,” siya miingon. “Ang trahedya diha sa hunahuna sa tanan. Diha akoy daghang mabungahong mga kabildohay sa maong adlaw tungod kay nagpakita akog interes sa ilang mga kinabuhi.”
Kinahanglan natong hatagan ang mga tawo ug pamatuod sa Gingharian bisan asa nato sila makaplagan. Ang di-pormal nga pagsangyaw mahimong mabungahon, ug mabansay nato ang atong kaugalingon niining maong kalihokan pinaagi sa paggamit sa mga sugyot nga gitanyag diha sa binase-sa-Bibliya nga mga publikasyon. Ang kangaya mosangpot gikan sa pipila ka mahigalaong mga pulong o sa pagpahimutang ug mga kopya sa mga magasing Bantayanang Torre ug Pagmata! sa tagbalay. Kon nakahimo kita ug mga balikduaw ug nagsugod sa pagdumala ug pagtuon sa Bibliya uban sa usa ka interesadong tawo, mahimong makakuha kitag referral pinaagi sa pagpangutana: “May lain ka pa bang nahibaloan nga buot magtuon sa Bibliya?” Mahimo kining motultol ngadto sa pagtukod ug laing panagtuon sa Bibliya sa balay. Sa bisan unsa pa man, magmapositibo kita, mainampoong magsalig kang Jehova, nga dili tugotan ang pagkadili-matinagdanon nga magbugnaw kanato.
Pagdasig Gikan sa Uban
Si Jürgen ug Christiane nagpayunir ug nakig-ambit sa nagapanawng buluhaton sulod sa kapin sa 30 ka tuig. Kas-a may asaynment sila nga naglakip sa pagsangyaw sa usa ka lugar diin ang kadaghanang tawo dili-matinagdanon ug gahian. Nangandoy gayod si Jürgen ug ang iyang asawa sa pagdasig! Apan, tungod sa usa ka katarongan, ang uban sa kongregasyon wala mosanong sa ilang panginahanglan.
Busa si Jürgen nasayod gikan sa kasinatian nga “ang pipila ka payunir nalisdan. Nagkinahanglan sila ug dugang pagdasig gikan sa mga ansiyano ug sa ubang mga magmamantala.” Giingnan sa Diyos si Moises nga dasigon ug palig-onon si Josue. (Deuteronomio 3:26-28) Ug ang mga Kristohanon kinahanglang mahimong mga tuboran sa pagdasig sa usag usa. (Roma 1:11, 12) Ang mga magmamantala sa Gingharian makadasig niadtong anaa sa bug-os-panahong pag-alagad pinaagi sa makapalig-ong mga pulong ug pinaagi sa pagkuyog kanila diha sa ministeryo matag karon ug unya.
Ang Kangaya ni Jehova—Atong Salipdanan
Ang mga Kristohanon nga naggugol sa kinadak-ang bahin sa ilang kinabuhi ingong mga payunir o mga misyonaryo, nagaalagad sa Bethel, o nagaduaw sa mga kongregasyon diha sa nagapanawng buluhaton nakadiskobre nga ang kadaghanang suliran dili magdugay, apan ang pipila maoy tagdugay. Bisan ang pipila ka suliran nga daw dili gayod mahanaw angayng dili maghikaw kanato sa atong kangaya. Si Ramon, nga nag-alagad sa langyawng asaynment sulod sa kapin sa 45 ka tuig, nagsugyot nga sa dihang ang mga suliran makapaguol kanato, “kita angayng maghunahuna sa daghang panalangin nga atong nabatonan ug mahitungod sa libolibong uban pa nga nag-antos ug mas dagkong kalisdanan.” Sa pagkatinuod, ang mga pag-antos nasinati sa atong kaubang mga magtutuo sa tibuok kalibotan, ug si Jehova tinuod nga may kahangawa kanatong tanan.—1 Pedro 5:6-9.
Busa, kon ang atong personal nga mga kahimtang magtugot kanato sa pagpakig-ambit sa bug-os-panahong pag-alagad ug magpabilin diha niana, huptan nato ang atong kangaya pinaagi sa pagsalig sa atong langitnong Amahan. Siya nagapalig-on sa iyang mga alagad, ug kitang tanan angayng mahinumdom nga ‘ang kangaya ni Jehova mao ang atong salipdanan.’—Nehemias 8:10.
[Kapsiyon sa panid 21]
“Ang akong mga pagbati ug mga gusto dili sama ka hinungdanon kay sa buluhaton”
[Kapsiyon sa panid 22]
‘Among suginlan si Jehova kon unsay among gibati ug dayon isalig kaniya ang mga butang’
[Kapsiyon sa panid 23]
“Pahimusli pag-ayo ang matag situwasyon. Ang matag adlaw mahimong magdala ug usa ka kahigayonan sa pagdayeg kang Jehova”
[Kapsiyon sa panid 23]
“Pinaagi sa paglahutay sa mga pagsulay, makabaton ako ug bahin sa pagpamatuod nga sayop si Satanas”
[Kapsiyon sa panid 24]
“Ang pipila ka payunir nalisdan. Nagkinahanglan sila ug dugang pagdasig gikan sa mga ansiyano ug sa ubang mga magmamantala”
[Kapsiyon sa panid 24]
“Kita angayng maghunahuna sa daghang panalangin nga atong nabatonan”