Ang Ipasabot sa mga Balita

Pagsumpo sa Kabangisan

Nagatimaan sa anam-anam nga pagdaghan sa kabangisan taliwala sa mga tin-edyer, ang basahong American Health mitaho nga “ang mga away tali sa mga higala, mga kauban sa klase ug sa mga silingan naglangkob sa Num. 1 nga pumapatay sa mga batan-on sa siyudad ug Num. 2 nga pumapatay sa tanang mga batan-on sa Amerika.”

Diha sa usa ka paningkamot nga masumpo ang mabangis nga mga kiling, ang sentro sa tigpanambag sa Boston nagtanyag ug kurso nga nagtugot sa mga estudyante niini sa pag-akto sa mubong dukomentaryong drama bahin sa kabangisan. Niining paagiha, sila “mosugod sa pag-ila sa mga sumbanan nga nalangkit sa kabangisan” ug, matud pa sa direktor sa programa, “makakita niadtong suko nga mga sumbanan diha sa ilang kaugalingon.”

Nahibaloan sa mga estudyante ang sikolohikal nga reaksiyon sa kasuko, sa pagdaghan sa adrenaline nga modaog sa pagpugong sa kaugalingon, ug ang bili sa komunikasyon sa paghupay sa kasuko “sa dili pa moreaksiyon ang lawas sa biokemika nga paagi.” Ilang nahibaloan nga pinaagi sa pagbangon ug mga pangutana ug sa pakigsulti sa kalmado ug sa mahinay, ang mainit nga komprontasyon malikayan.

Ang mga estudyante sa Bibliya dugay nang nahibalo nga ang kabangisan mamunga ug kabangisan ug nga, “ang usa ka tubag, kon malumo, makahupay sa kasuko.” (Proverbio 15:1) Ang Bibliya nagtambag kanato sa pagpalayo, sa pagsugod pa, kon ugaling makaatubang kita ug mabutohon nga komprontasyon. Ang maalamong Haring Solomon misulat: “Ang sinugdanan sa panagbingkil maoy sama sa usa nga magahuwad sa tubig; busa biyai ang panaglalis sa dili pa ang panag-away.”​—Proverbio 17:14.

Usa ka Organisadong Uniberso

Sa kataposan sa Mayo duolan sa 200 ka pisiko, apil ang daghang mga dumadaog sa Nobel prize, nagtigom sa Blois, Pransiya. Ang ilang tibuok-semana nga tigom maoy sa pagsaulog sa ika-25 nga anibersaryo sa diskoberiya sa “CP violation,” usa ka tino nga paglapas sa mga balaod nga gituohan nga makatukod ug hingpit nga pagkaangay tali sa materya ug sa dili-materya.

Apan kining maong teoriya naghatag daghang mga suliran sama sa masulbad niini. Mikutlo kang Propesor Andrei Linde sa Sobyet, ang International Herald Tribune mitaho: “Ang daw-sumpaki,” siya miingon, “mao nga kining pagkaangay nakapatunghag mahapsay nga uniberso.” Sa gipangutana kon kining “CP violation” dunay katuyoan sa uniberso, ang Pranses nga kosmotologo si Jean Audouze miingon: “May mga panahong sa hunahuna ko nga oo, may mga panahong wala. Ang uniberso dili uniporme. Ug ang uniberso organisado. Ug kining duha ka butang katingalahan. Ang uniberso dili maoy usa ka butang nga sulagmang nahitabo.”

Dili usab aksidente ni sulagma nga mitungha ang uniberso. Ang Genesis 1:1 nag-ingon: “Sa sinugdan gibuhat sa Diyos ang mga langit ug ang yuta.” Ang uniberso mahapsay tungod kay si Jehova, ang Maglalalang, “maoy Diyos, dili sa kagubot,” kondili ang Usa kansang mga buhat “hingpit.”​—1 Corinto 14:33; Deuteronomio 32:4; itandi ang Isaias 40:26; 42:5.

Homoseksuwalidad ug ang Katolisismo

Ang papa masubsob nga nag-ingon nga ang opisyal nga baroganan sa Katolikong Iglesya sa batasan sa homoseksuwal mao nga kini sa moral maoy daotan. Siya misaysay, “ang unang katilingbang Kristohanon dayag nga dili matugoton.” Dili tanang Katolikong mga obispo ug mga pari miuyon.

Sayo sa 1989, ang Pranses nga obispong si Jacques Gaillot miangkon nga siya sa yano nagpalanog lamang sa mga pulong ni Jesus sa dihang siya misulat nga ang “mga homoseksuwal maoy nag-una kanato sa gingharian sa Diyos.”

Apan, wala hisgoti ni Obispong Gaillot, nga naghisgot si Jesus sa naghinulsol nga mga babayeng bigaon​—dili sa nagapadayon nga pampam​—nga maoy nagapanulod sa Gingharian sa Diyos nga una kay sa gahig ulo nga Hudiyohanong mga lider sa iyang panahon.​—Mateo 21:28-32.

Sa susama, ang Katsilang pari nga si José Ramón Carrasco dili pa dugay misulat diha sa peryodikong El País sa Madrid nga “wala gayod hukmi ni Jesu-Kristo ang mga homoseksuwal. . . . Sa dihang mihisgot siya bahin sa gugma, siya mihisgot bahin sa gugma sa silingan ug dili siya espisipiko kon ang silingan ba lalaki o babaye, o unsang pamarog, porma o paagi sa iyang paghigugma.”

Ang asoy sa Bibliya, hinunoa, nagpakita nga si Jesus wala maghisgot sa homoseksuwal nga mga relasyon. Diha sa sambingay sa Maayong Samarianhon, iyang gipatin-aw kon unsa gayoy kahulogan sa paghigugma sa silingan, nga mao, sa pagpakitag dili-mahakogong interes sa kaayohan sa uban.​—Lucas 10:29-37.

Ang Bibliya nag-ingon mahitungod sa mga tigbuhat sa mga homoseksuwalidad: “Ayaw kamo pagpalimbong; walay mga imoral, o mga tigsimbag mga diyosdiyos, o mga mananapaw, o mga homoseksuwal . . . ang makapanunod sa gingharian sa Diyos.”​—1 Corinto 6:9-11, Revised Standard Version, Katolikong edisyon.