MALKIAS

[Akong Hari si Jehova].

1. Usa ka Levihanon nga naggikan kang Gersom ug katigulangan sa Levihanong maghohoni nga si Asap.​—1Cr 6:39-43.

2. Kaliwat ni Aaron ug pangulo sa ika-5 sa 24 ka dibisyon sa mga saserdote nga giorganisar ni David.​—1Cr 24:​1, 9.

3. Usa ka saserdote ug amahan ni Pasur.​—1Cr 9:12; Neh 11:12; Jer 21:1; 38:1.

4. Ang “anak nga lalaki sa hari” nga tag-iya sa atabay nga gihulogan kang Jeremias. (Jer 38:6) Niining bahina, ang ekspresyong “anak nga lalaki sa hari” tingali nagkahulogan nga, dili kay siya usa ka kaliwat sa hari, kondili siya suod nga nalangkit sa panimalay sa hari o usa ka opisyal nga harianon ug kaliwat.​—Tan-awa ang JERAMEEL Num. 3.

5. Usa ka Israelinhon “sa mga anak ni Paros” nga lakip niadtong nangasawa ug langyawng mga asawa apan nagpapahawa kanila sa adlaw ni Esdras.​—Esd 10:​25, 44.

6. Laing Israelinhon “sa mga anak ni Paros” nga lakip niadtong nagpapahawa sa ilang langyawng mga asawa. (Esd 10:​25, 44) Sa Gregong Septuagint mabasa dinhi ang “Hasabias” inay nga “Malkias.”

7. Usa ka tawo sa Israel “sa mga anak ni Harim” nga lakip niadtong nagpapahawa sa langyawng mga asawa ug mga anak sa panahon ni Esdras.​—Esd 10:​31, 44.

8. Usa ka Israelinhon, ang “anak nga lalaki ni Harim.” Duyog kang Hasub, iyang giayo ang usa ka bahin sa paril sa Jerusalem ug ang Torre sa mga Hudno human mobalik gikan sa pagkadestiyero sa Babilonya. (Neh 3:11) Lagmit siya mao ra usab ang Num. 7.

9. Anak nga lalaki ni Rekab ug prinsipe sa distrito sa Bet-hakerem nga nag-ayo sa Ganghaan sa mga Tapok sa Abo sa panahon sa pagkagobernador ni Nehemias.​—Neh 3:14.

10. Membro sa kapunongan sa mga mananalsal ug bulawan nga nag-ayo sa usa ka bahin sa paril sa Jerusalem sa adlaw ni Nehemias.​—Neh 3:31.

11. Usa ka saserdote nga nagtindog dapit sa walang kamot sa magkokopya nga si Esdras sa dihang siya nagbasa sa Balaod atubangan sa mga Israelinhon diha sa natukod pag-usab nga Jerusalem.​—Neh 8:4.

12. Usa sa mga saserdote, o katigulangan sa usa, nga nagpamatuod pinaagi sa timbre sa “kasaligang kontrata” sa panahon sa pagkagobernador ni Nehemias.​—Neh 9:38–​10:3.

13. Usa ka saserdote nga nakigbahin sa mga seremonyas sa inagurasyon sa natukod pag-usab nga paril sa Jerusalem ubos sa pagdumala ni Nehemias. (Neh 12:40-42) Lagmit siya mao ra usab ang Num. 11.