Ang Hunahuna sa Bibliya

Unsay Daotan sa Pagbirigbirig?

“Nganong hunahunaon man nato ang pagbirigbirig ingong mamaniobrahon o malimbongon o daotan? dili kini tinuod! Kini maoy usa ka dula! ug kini dula nga walay mapildi tungod kay imong gilipay ang ubang tawo.”​—Susan Rabin, direktor sa School of Flirting, New York City.

DAGHANG tawo naglantaw sa pagbirigbirig ingong normal, inosente, ug kinahanglanon pa gani sa pagmugna ug pagpatunhay sa tawhanong mga relasyon. Sa Kasadpang mga nasod, dili pa dugay nga mikaylap ang mga libro, mga artikulo sa magasin, ug espesyal nga mga kurso nga nagtudlo ug mga pangompas, mga postura, mga pasiklap, ug mga pagtutok nga hinungdanon sa “arte sa pagbirigbirig.”

Unsa man ang pagbirigbirig? Adunay daghang kahulogan ug mga interpretasyon. Usa ka diksiyonaryo naghubit niini ingong usa ka “makundaton o makapadani sa sekso” nga linihokan. Laing diksiyonaryo naghubit sa pagbirigbirig ingong “pagkundat nga walay seryosong tuyo.” Busa, morag sa katibuk-an maoy dalawatong ideya nga ang tigbirigbirig mao ang usa nga magpasundayag ug romantikong interes nga walay tuyo nga magminyo. Angay bang isipon ang pagbirigbirig nga dili-makadaot? Unsay hunahuna sa Bibliya sa pagbirigbirig?a

Bisan kon ang pagbirigbirig wala hisgoti nga espesipiko sa Kasulatan, kita makatino sa panglantaw sa Diyos. Sa unsang paagi? Pinaagi sa pagsusi sa mga prinsipyo sa Bibliya nga may kalabotan sa maong butang. Sa ingon maugmad nato ang atong ‘kagahom sa pag-ila aron mailhan ang husto ug ang sayop.’ (Hebreohanon 5:14) Una, atong susihon kon ang pagbirigbirig angay ba nga lihok alang sa mga tawong minyo.

Kon ang Usa Minyo

Natural lamang alang sa mga magtiayon nga magpinarayeganay sa pribado. (Itandi ang Genesis 26:8.) Apan ang pagpamarayeg ngadto sa mga indibiduwal gawas sa kaminyoon maoy supak sa mga prinsipyo sa Diyos. Gituyo ni Jehova nga ang mga magtiayon magpahimulos ug suod ug masaligon nga relasyon. (Genesis 2:​24; Efeso 5:​21-33) Giisip niya ang kaminyoon ingong sagrado, permanenteng panaghiusa. Ang Malaquias 2:​16 nag-ingon bahin sa Diyos: “Siya nagadumot sa pagdiborsiyo.”b

Ang pagbirigbirig ba sa usa ka minyong tawo uyon sa panglantaw sa Diyos sa kaminyoon? Labing menos, ang minyong tigbirigbirig nagpakita ug kawalay-pagtahod sa pagkasagrado sa kahikayan sa Diyos sa kaminyoon. Unya, ang Efeso 5:​33 nagsugo usab sa Kristohanong bana sa “paghigugma sa iyang asawa sama sa iyang kaugalingon” ug sa asawa sa “pagbaton ug halalom nga pagtahod sa iyang bana.” Ang pagbirigbirig ba, nga makapaaghat ug pangabugho, nagpakita ug gugma o pagtahod sa kapikas sa usa?

Ang labawng makapahinuklog mao ang kamatuoran nga ang pagbirigbirig mahimong motultol sa panapaw, usa ka sala nga sa walay lipudlipod gitunglo ug gihubit ingong maluibon ni Jehova. (Exodo 20:​14; Levitico 20:​10; Malaquias 2:​14, 15; Marcos 10:​17-19) Sa pagkamatuod, giisip ni Jehova ang panapaw nga seryoso kaayo nga iyang gitugotan ang mga biktima sa pagkadili-maunongon sa kaminyoon nga makabulag. (Mateo 5:32) Nan, angay ba natong hunahunaon nga si Jehova mouyon sa peligroso kaayong lingawlingaw sama sa pagbirigbirig? Ang Diyos dili mouyon niana maingon nga ang usa ka mahigugmaong ginikanan dili mouyon nga ang iyang gamay nga bata magdula sa usa ka hait nga kutsilyo.

Mahitungod sa panapaw ang Bibliya nagpasidaan: “Makabutang ba ang usa ka tawo ug kalayo diha sa iyang sabakan ug bisan pa ang iyang mga sapot dili masunog? O makalakaw ba ang usa ka tawo ibabaw sa mainit nga baga ug dili mapaso ang iyang mga tiil? Susama usab kang bisan kinsa nga nakigrelasyon sa asawa sa iyang isigkatawo, walay usang nanghilabot kaniya ang makagawas sa silot.” (Proverbio 6:​27-29) Hinunoa, bisan pag wala mabuhat ang panapaw, ang minyong tawo nga nagbirigbirig naghatag ug higayon sa dugang kapeligrohan​—pagkalangkit sa gitawag ug “emosyonal nga relasyon.”

Emosyonal nga mga Relasyon

Ang pipila ka tawo nakaugmad ug mga relasyon gawas sa ilang kaminyoon diin ang romantikong mga pagbati motubo, bisan pag walay seksuwal nga kontak. Apan, si Jesus nagpasidaan: “Ang matag usa nga padayong nagatan-aw sa usa ka babaye aron magbaton ug maulagong kaibog kaniya nakahimo na ug pagpanapaw uban kaniya diha sa iyang kasingkasing.” (Mateo 5:28) Nganong mitutol si Jesus sa maulagong kaibog nga nagpabilin sa kasingkasing?

Ang usa ka hinungdan mao nga “nagagula gikan sa kasingkasing ang . . . mga pagpanapaw.” (Mateo 15:19) Bisan pa niana, ang maong relasyon makadaot bisan pag dili kana molambo hangtod sa punto diin hapit nang mahitabo ang panapaw. Sa unsang paagi? Misaysay ang usa ka libro bahin niining ulohana: “Ang bisan unsang kalihokan o relasyon nga makahurot ug daghan kaayong panahon ug kusog gikan sa kinabuhi uban sa imong kapikas maoy usa ka matang sa pagkadili-maunongon.” Oo, ang emosyonal nga relasyon maghikaw sa kapikas ug panahon, pagtagad, ug pagbati. Pinasukad sa sugo ni Jesus nga atong tagdon ang uban ingon sa pagtagad nga buot nato, ang minyong tigbirigbirig maayong mosukna sa iyang kaugalingon, ‘Unsa kaha ang akong bation kon ang akong kapikas mogawi niining paagiha sa lain?’​—Proverbio 5:​15-23; Mateo 7:12.

Kon ang usa ka tawo nakaumol ug usa ka dili-angayng emosyonal nga bugkos sama niini, unsay iyang buhaton? Ang minyong tawo nga may dili-hustong emosyonal nga kalambigitan maoy sama sa usa ka drayber nga nakatulog samtang nagmaneho. Kinahanglan siyang makaamgo sa iyang situwasyon ug mohimog dinalian, mahukmanong aksiyon sa dili pa magusbat ang iyang kaminyoon ug iyang relasyon uban sa Diyos. Giilustrar ni Jesus ang panginahanglan alang sa dinaliang aksiyon sa dihang siya miingon nga bisan ang usa ka butang nga sama ka bililhon sa mata kinahanglang lusokon o putlon ang kamot kon kini makadaot sa maayong baroganan sa usa atubangan sa Diyos.​—Mateo 5:29, 30.

Mao nga maalamon gayod nga limitehan kon asa ug kon unsa ka subsob nga ikaw makigkita sa maong tawo. Sa pagkatinuod, likayi nga mahilain uban sa maong tawo, ug kon diha sa trabahoan, limitehi ang matang sa panagkabildohay. Basin gikinahanglan pa gani nga hunongon ang tanang pakigkontak sa maong tawo. Human niana, ang estriktong pagpugong sa kaugalingon kinahanglang ipadapat may kalabotan sa mga mata, mga hunahuna, mga pagbati, ug linihokan sa usa. (Genesis 39:​7-12; Salmo 19:​14; Proverbio 4:​23; 1 Tesalonica 4:​4-6) Si Job, nga usa ka minyong tawo, nagpakita ug maayo kaayong panig-ingnan sa dihang siya miingon: “Ako nakigsaad sa akong mga mata. Nan unsaon ko man sa pagsud-ong sa usa ka ulay?”​—Job 31:1.

Dayag, peligroso ug dili-kasulatanhon alang sa usa ka minyong tawo nga malangkit sa pagbirigbirig. Apan, unsay hunahuna sa Bibliya bahin sa pagbirigbirig tali sa mga tawong dili minyo? Kini ba pagaisipong normal, dili-makadaot, o kinahanglanon sa pagtukod ug mga relasyon uban sa kaatbang nga sekso? Aduna bay tinuod nga kadaot nga moresulta gikan niini?

Komosta ang mga Dili-Minyo?

Walay daotan sa duha ka dili minyong mga tawo nga magpakitag romantikong pagbati sa usag usa, kon sila nagaplano na nga magminyo ug nga sila maglikay sa hugaw nga panggawi. (Galacia 5:​19-21) Ang maong pagbati mahitabo tingali panahon sa sayong mga yugto sa pagpangulitawo sa dihang gamay lamang ang purohan nga mahitabo ang kaminyoon. Kini dili gayod sayop kon maayo ang katuyoan. Ang maong lihok dili gayod pagbirigbirig.

Apan, komosta kon ang dili minyong mga tawo magpakita ug romantikong mga lihok sa usag usa alang lamang sa paglingawlingaw? Morag dili kini makadaot, sanglit sila dili-minyo. Apan, hunahunaa ang kalagmitan nga mahitabong emosyonal nga kadaot. Kon ang linihokan sa tigbirigbirig isipon nga tininuod, kini mahimong moresulta sa hilabihang kasakit ug kaguol sa kasingkasing. Pagkatinuod ang mga pulong sa Proverbio 13:​12: “Ang paglaom nga nalangan nakapasakit sa kasingkasing, apan ang pangandoy nga matuman maoy usa ka kahoy sa kinabuhi”! Bisan pag ang duha ka tawo moingon nga adunay pagsinabtanay nga ang matag-usa walay seryosong interes sa usag usa​—ang bisan kinsa kanila makatino kaha kon unsa gayod ang gihunahuna o gibati sa usa? Ang Bibliya nagtubag: “Ang kasingkasing labaw nga malimbongon sa bisan unsa ug desperado. Kinsay makasusi niini?”​—Jeremias 17:​9; itandi ang Filipos 2:4.

Palandonga, usab, ang kapeligrohan sa pakighilawas, uban sa posible niining mga sangpotanan sa sakit o pagmabdos gawas sa kaminyoon. Ang pakighilawas gidili sa Kasulatan, ug kadtong sa tinuyo nagbuhat niana mawad-an ug pabor sa Diyos. Maalamong nagpasidaan si apostol Pablo sa mga Kristohanon nga aron makasukol sa tentasyon, kinahanglang ilang “patyon” ang ilang “mga sangkap sa lawas . . . may kalabotan sa pakighilawas” ug likayan ang “mahakogong kaibog sa seksuwal nga gana,” nga motultol sa pakighilawas. (Colosas 3:​5; 1 Tesalonica 4:​3-5) Sa Efeso 5:​3, siya nagtambag kanato nga ang pakighilawas “dili gani pagahisgotan,” nga mao, sa paagi nga mapukaw ang daotang tinguha. Ang pagbirigbirig sukwahi niining tambaga. Gidili pa gani sa Diyos ang dili-maayong panaghisgot bahin sa sekso.

Ang mga prinsipyo sa Bibliya nagbutyag nga ang pagbirigbirig mapintason alang sa isigkatawo ug walay-pagtahod kang Jehova, ang Tigmugna sa kaminyoon. Ang panglantaw sa Bibliya sa dili-hustong pagbirigbirig dayag nga mahigugmaon ug makataronganon, kay kini nanalipod sa mga tawo gikan sa kadaot. Busa ang mga mahigugmaon sa Diyos molikay gikan sa dili-angayng pagbirigbirig ug tagdon ang kaatbang nga sekso uban sa kaputli ug pagtahod.​—1 Timoteo 2:​9, 10; 5:​1, 2.

[Mga footnote]

[Picture Credit Line sa panid 20]

© The Curtis Publishing Company