Dili mga Tigbaligya sa Pulong sa Diyos

“GINABALIGYA namo ang among ministeryo alang sa salapi.” Kadto maoy mga pulong sa kanhi “ministro sa pag-ampo sa telepono” nga giinterbiyu sa usa ka masusihong taho mahitungod sa Amerikanhong mga ebanghelista sa telebisyon sa ulahing bahin sa 1991.

Kining programaha nagtumong sa tulo ka pundok nga nagaebanghelyo sa telebisyon sa Tinipong Bansa. Kana nagyagyag nga ang mga tawo gihukhokan ug mga tinagpulo ka milyon nga dolyares kada tuig pinaagi lamang niining tulo. Ang usa ka “pundok” gihulad ingong usa ka “walay-kasama nga pabrika alang sa mga amot.” Ang tanan nalambiggit diha sa ubay-ubayng mga panglimbong. Kini ba nakapakurat kanimo?

Ang Relihiyon Ubos sa Pagsusi

Dili lamang ang ebanghelismo sa telebisyon apan bisan ang ortodokso, kasarangang mga relihiyon masuhiron nang ginausisa sa mga kagamhanan, pribadong tigbantay nga mga ahensiya, ug sa mga tawo sa linangkob. Sa pila ka mga kaso ang mga aksiyon sa simbahan sa mga negosyo, gigastosan sa relihiyon nga mga intereses sa politika, ug ang maluhong pagkinabuhi sa dagkog suweldo nga klerigo nakapabangon ug mga pangutana labot sa maayong pamatasan.

Sa unsang paagi ang pila ka relihiyosong mga pangulo makakab-ot sa halangdong paghubit sa Kristohanong ministeryo nga gihatag ni apostol Pablo mga 2,000 ka tuig sa miagi? Siya nagsulat: “Dili kami tigbaligya sa pulong sa Diyos ingon sa daghang mga tawo, apan tungod sa kasinsero, oo, ingong pinadala gikan sa Diyos, ubos sa panglantaw sa Diyos, diha kang Kristo, kami nanagsulti.” (2 Corinto 2:17) Kinsa ang sibo sa maong hularan karong adlawa?

Sa pagtabang kanimo sa pagtimbangtimbang sa mga butang, atong tan-awon pag-ayo kon sa unsang paagi ang Kristohanong ministeryo ni Pablo ug sa iyang mga kauban gigastosan. Sa unsang mga paagi kadto nalahi gikan sa uban sa iyang adlaw?

Nagapanawng mga Magwawali sa Unang Siglo

Ingong usa ka nagapanawng magwawali, si Pablo dili tagsaon. Niadtong adlawa daghan ang nagpanaw sa kadalanan sa pagpalambo sa ilang mga panglantaw mahitungod sa relihiyon ug pilosopiya. Ang magsusulat sa Bibliya nga si Lucas naghisgot sa “pipila ka mga Hudiyo nga nanagsuroy nga nagapagula ug mga demonyo.” (Buhat 19:13) Sa dihang si Jesu-Kristo nagsaway sa mga Pariseo, siya nagkanayon: “Inyong gilataslatas ang kadagatan ug kayutaan sa paghimog usa ka kinabig.” (Mateo 23:15) Si Jesus mismo usa ka nagapanawng ministro. Iyang gibansay ang iyang mga apostol sa pag-awat kaniya pinaagi sa pagwali dili lamang diha sa Judea ug Samaria apan “ngadto sa labing kinalay-ang bahin sa yuta.”​—Buhat 1:8.

Sa panahon sa ilang mga panaw, ang mga sumusunod ni Jesus nakahibalag sa dili-Hudiyo nga mga magwawali. Sa Atenas, si Pablo nakalalis sa mga pilosopong Epicureo ug Stoico. (Buhat 17:18) Sa tibuok Empiryo sa Roma, ang mga Cynico nagbatasan sa pagpangdani pinaagi sa pakigpulong. Ang mga magsisimba ni Isis ug Serapis nagpalapad sa ilang impluwensiya ibabaw sa mga babaye ug mga ulipon pinaagi sa mga saad sa relihiyoso ug sosyal nga panagkasama uban sa mga tawong may kagawasan. Ang sidlakanhong mga kulto sa pertilidad nagtaganag sinugdanan alang sa ubay-ubayng misteryong mga relihiyon sa Grego-Romanong kalibotan. Ang saad sa pagbayad sa sala ug ang tinguha sa pag-ambit sa balaang mga tinago nakadani ug mga sumusunod sa bakak nga mga diyos nga si Demeter, Dionysus, ug Cybele.

Sa Unsang Paagi Gigastosan?

Ugaling, ang pagpanaw gastoso kaayo. Gawas sa kargamento, buhis, ug pamasahe sa sakayan, ang mga biyahedor nanginahanglan ug pagkaon, sak-anan, kahoy-pangsugnod, sinina, ug tambal. Ang mga magwawali, magtutudlo, pilosopo, ug mga mistiko nagtagana niining mga panginahanglana sa lima ka pangunang paagi. Sila (1) nagpabayad sa ilang pagpanudlo; (2) nagtrabaho sa ubos nga mga buluhaton ug kahanas; (3) nagdawat sa mga pag-abi-abi ug maayong-kabubut-on nga mga amot; (4) nakig-uban sa adunahang mga tigpaluyo, sa subsob ingong mga magtutudlo; ug (5) nagpakilimos. Sa pag-andam sa iyang kaugalingon alang sa pagsalikway, ang iladong Cynicong makililimos nga si Diogenes nangayo pa nganig amot sa walay kinabuhing mga estatwa.

Si Pablo nakaila sa pila ka mga magwawali nga nangangkon nga Kristohanong mga ministro apan, sama sa pila ka Gregong mga pilosopo, nakighigala sa mga adunahan ug nangawat gikan sa mga timawa. Iyang gibadlong ang kongregasyon sa Corinto, nga nag-ingon: “Kamo nagaantos tungod sa . . . kang bisan kinsa nga nagahurot sa inyong nabatonan, bisag kinsa nga moilog sa inyoha.” (2 Corinto 11:20) Si Jesu-Kristo wala gayod mang-ilog sa bisag unsa, ug ni si Pablo ug iyang isigka-magbubuhat. Apan ang mga hakog nga mga ebanghelisador sa Corinto maoy “mga bakak nga apostol, limbongang mga mamumuo,” ug mga ministro ni Satanas.​—2 Corinto 11:13-15.

Ang instruksiyon ni Jesus sa iyang mga sumusunod wala mag-apil sa pagpanudlo nga magpabayad. “Nakadawat kamo nga walay bayad, busa panghatag kamo nga walay bayad,” siya nagtambag. (Mateo 10:8) Bisan tuod ang pagpakilimos maoy sagad, kana gitamay niadtong mga adlawa. Sa usa sa iyang mga ilustrasyon, si Jesus naghulagway sa usa ka alagad ingong nagsulti, “Ako naulaw nga magpakilimos.” (Lucas 16:3) Busa, wala gayod kitay makaplagan diha sa asoy sa Bibliya nga ang matinumanong mga sumusunod ni Jesus nagpangayo ug salapi o mga butang. Sila nagkinabuhi pinaagi sa prinsipyo: “Kon ang usa dili gustong motrabaho, ayaw ninyo siya pakan-a.”​—2 Tesalonica 3:10.

Gidasig ni Jesus ang iyang mga sumusunod sa pagtagana sa ilang mga panginahanglanon sa duha ka mga paagi. Una, sila makahimo, sama sa gisulti ni Pablo, “sa pagkinabuhi pinaagi sa maayong balita.” Sa unsang paagi? Pinaagi sa pagdawat sa pag-abiabi nga gihatag sa kinabubut-on. (1 Corinto 9:14; Lucas 10:7) Ikaduha, sila makatagana alang sa ilang kaugalingon sa materyal.​—Lucas 22:36.

Mga Prinsipyo nga Gipadapat ni Pablo

Sa unsang paagi gipadapat ni Pablo ang nag-unang mga prinsipyo? Hinuon, mahitungod sa ikaduhang misyonaryong panaw sa apostol, si Lucas nagsulat: “Kami naglawig gikan sa Troas ug mitadlas ngadto sa Samotracia, apan sa sunod nga adlaw ngadto sa Neapolis, ug gikan didto ngadto sa Filipos, usa ka kolonya, nga mao ang pangunang siyudad sa distrito sa Macedonia. Nagpabilin kami dinhing siyudara, nga giabtan ug pipila ka adlaw.” Ang tanang galastohan sa pagbiyahe, pagkaon, ug sak-anan nga nalangkit giatiman nila sa personal.​—Buhat 16:11, 12.

Sa ngadtongadto, usa ka babaye nga ginganlag Lydia midawat “sa mga butang nga gisulti ni Pablo. Karon sa dihang siya ug iyang panimalay nabawtismohan, siya mihangyo: ‘Kon maoy inyong paghunahuna nga ako tinuod nga magtutuo kang Jehova nan, ari kamo abut sa akong balay.’ Ug siya dili gayod pabalibad kanamo.” (Buhat 16:13-15) Tingali sa labing menos sa bahin tungod sa kamaabiabihon ni Lydia, si Pablo nakasulat ngadto sa isigka-magtutuo sa Filipos: “Gipasalamatan ko ang akong Diyos diha sa tanan kong paghandum kaninyo; sa tanan kong pagpangamuyo alang kaninyong tanan, ako sa kanunay magaampo uban sa kalipay, nga mapasalamaton tungod sa inyong pakig-uban sa pagpakaylap sa Maayong Balita sukad pa sa sinugdan nga adlaw hangtud karon.”​—Filipos 1:3-5.

Si Lucas naghisgot sa daghang higayon nga ang mga tawo nag-abi-abi sa nagapanawng Kristohanong mga magbubuhat. (Buhat 16:33, 34; 17:7; 21:7, 8, 16; 28:2, 7, 10, 14) Sa iyang dinasig nga mga sulat, si Pablo miila ug nagpasalamat alang sa kamaabiabihon ug mga gasa nga iyang nadawat. (Roma 16:23; 2 Corinto 11:9; Galacia 4:13, 14; Filipos 4:15-18) Bisan pa, siya o iyang mga kaubanan wala magpasabot nga kinahanglan silang hatagan ug mga gasa o pinansiyal nga tabang. Ang mga Saksi ni Jehova makasulti nga kining maayong tinamdan sa gihapon makaplagan taliwala sa ilang nagapanawng mga magtatan-aw.

Wala Magsalig sa Kamaabiabihon

Si Pablo wala magsalig sa kamaabiabihon. Siya nakakat-on ug kahanas nga nagkinahanglan ug kuging pagtrabaho ug dugayng mga oras apan mubo rag suhol. Sa dihang miabot ang apostol sa Corinto ingong usa ka misyonaryo, “iyang nahibalag ang usa ka Hudiyo nga ginganlag Aquila . . . ug iyang asawa nga si Priscilla. . . . Busa siya miadto kanila ug kay siya sama ra man kanilag pangita siya mipuyo sa ilang balay, ug sila nagpamuhat, kay sila mga magtotolda.”​—Buhat 18:1-3.

Sa ulahi, sa Efeso, si Pablo sa gihapon nagkugi sa pagtrabaho. (Itandi ang Buhat 20:34; 1 Corinto 4:11, 12.) Mahimong siya nag-espesyalisar sa paghimog cilicium, ang sapnot, balhibo-sa-kanding nga materyal sa tolda nga gikan sa iyang lungsod nga namat-an. Atong mahanduraw si Pablo nga naglingkod sa usa ka bangkito, nga nagduko sa iyang bangko-gam-anan, nga nagtabas ug nagtahi hangtod sa lalom nga kagabhion. Kay malagmit ang saba sa talyer menos ra, nga nagpasayon sa pagsulti samtang nagtrabaho, si Pablo tingali may kahigayonan sa pagpanaksi ngadto sa tag-iya sa talyer, sa iyang mga trabahante, mga ulipon, mga kustomer, ug mga higala.​—Itandi ang 1 Tesalonica 2:9.

Ang misyonaryo nga si Pablo nagdumili sa pagnegosyo sa iyang ministeryo o sa bisan unsang paagi naghatag katarongan nga siya nagagamit sa Pulong sa Diyos alang sa pinansiyal nga ganansiya. Iyang giingnan ang mga taga-Tesalonica: “Kay kamo nasayod na sa unsang paagi kinahanglan inyo kaming pagaawaton, tungod kay kami wala magbagdoy sa taliwala ninyo, ni magakaon sa pagkaon nga iya ni bisan kinsa nga wala namo bayri. Hinunoa, kami naghago ug nagkugi magabii ug maadlaw aron kami dili makasamok kang bisan kinsa kaninyo. Dili nga kami walay katungod niini, kondili aron nga sa among paggawi sa ingon among ikahatag kaninyo ang panig-ingnan nga inyong pagasundon.​—2 Tesalonica 3:7-9.

Ika-Kaluhaang-Siglo nga mga Mag-aawat

Karong adlawa ang mga Saksi ni Jehova nagsunod sa maayong panig-ingnan ni Pablo. Ang mga ansiano ug ministeryal nga mga alagad walay suweldo o bisan amot gikan sa mga kongregasyon nga ilang gialagaran. Inay sila nagtagana alang sa ilang mga pamilya sama sa uban, kadaghanan kanila pinaagi sa pagpanarbaho. Ang bug-os panahon nga payunir nga mga ministro usab nagtagana alang sa ilang kaugalingon, kadaghanan nagtrabahong igo lamang aron matagan-an ang pangunang mga kinahanglanon. Kada tuig ang pila ka mga Saksi nagbiyahe sa ilang kaugalingong gasto sa pagwali sa halayong mga dapit nga tagsa rang masangyawan sa maayong balita. Kon ang lokal nga mga pamilya modapit kanila sa pagsalo sa pagkaon o pag-ipon sa puloy-an, giapresyar nila kini apan wala mag-abuso sa maong kamaabiabihon.

Ang tanang pagwali ug pagtudlo nga gihimo sa mga Saksi ni Jehova maoy boluntaryo, ug wala gayod sila maningil alang sa ilang ministeryo. Hinuon, ang kasarangang mga amot alang sa ilang tibuok-kalibotan nga buluhaton sa pagwali gidawat ug gipadala sa Watch Tower Society alang nianang katuyoana. (Mateo 24:14) Ang ministeryo sa mga Saksi dili negosyo sa tanang paagi. Sama kang Pablo ang kada usa kanila makasulti nga matinud-anon: “Nga walay bayad malipayon kong giwali ang maayong balita sa Diyos kaninyo.” (2 Corinto 11:7) Ang mga Saksi ni Jehova dili “mga tigbaligya sa pulong sa Diyos.”

[Kahon sa panid 27]

SA UNSANG PAAGI ANG PILA NAGHATAG AMOT SA BULUHATONG PAGWALI-SA-GINGHARIAN

◻ MGA KONTRIBUSYON ALANG SA TIBUOK KALIBOTANG BULUHATON: Daghan ang mopinig o mobadyet ug kantidad nga ilang ikahulog sa mga kahon sa kontribusyon nga gitiman-an: “Mga Amot Alang sa Tibuok Kalibotan nga Buluhaton sa Sosyedad​—Mateo 24:14.” Sa matag bulan ang mga kongregasyon magpadala niining mga kantidara sa pangunang-buhatan sa Brooklyn, New York, o sa pinakaduol nga sangang buhatan.

◻ MGA GASA: Ang boluntaryong mga donasyon nga salapi ikapadalang direkta sa Watch Tower Bible and Tract Society of the Philippines, P.O. Box 2044, 1099 Manila, o ngadto sa lokal nga sangang buhatan sa Sosyedad. Ang alahas o ubang mahalong butang ikadonar usab. Ang mubong sulat nga magapahayag nga kana maoy laktod nga donasyon angay magauban sa maong mga amot.

◻ KONDISYONAL-DONASYONG KAHIKAYAN: Ang kuwarta ikahatag ngadto sa Watch Tower Society nga huptang sinalig hangtod sa kamatayon sa nagdonar, uban ang probisyon nga enkaso sa personal nga panginahanglan, kini iuli sa nagdonar.

◻ SEGURO: Ang Watch Tower Society kanganlan nga manununod sa usa ka polisa sa seguro o life-insurance o sa plano sa pagretiro/pensiyon. Ang Sosyedad angay pahibaloon sa maong kahikayan.

◻ MGA KUWENTA SA BANGKO: Mga kuwenta sa bangko, mga sertipiko sa deposito, o kuwenta sa usa alang sa pagretiro mahimong ikabutang in trust for o gihimong payable on death to Watch Tower Society, nahasubay sa lokal nga latid sa bangko. Ang Sosyedad dapat pahibaloon sa maong mga kahikayan.

◻ STOCKS AND BONDS: Ang mga stock ug bond mahimong ikadonar sa Watch Tower Society pinaagi sa dihadiha nga gasa o ubos sa usa ka kahikayan nga ang kitaon padayon nga madawat sa nagdonar.

◻ BALAY UG YUTA: Ang arang ikabaligya nga balay ug yuta mahimong ikadonar sa Watch Tower Society pinaagi sa dihadiha nga gasa o magbilin ug luna alang sa nagdonar samtang buhi, nga siya makapadayon sa pagpuyo dinha sa sulod sa iyang pagkinabuhi. Ang usa angay nga mokontak una sa Sosyedad una pa dokumentohan ang bisan unsang balay ug yuta ngadto sa Sosyedad.

◻ WILLS AND TRUSTS: Ang mga kabtangan o salapi mahimong ikabilin sa Watch Tower Bible and Tract Society of Pennsylvania pinaagi sa usa ka legal nga pagkahimo nga testamento, o ang Sosyedad mahimong kanganlan ingong manununod sa usa ka kasabotan sa trust. Ang usa ka trust nga usa ka relihiyosong organisasyon ang makabenepisyo mahimong may tinong bentaha bahin sa buluhisan. Usa ka kopya sa testamento o kasabotan sa trust kinahanglan ipadala sa Sosyedad.

Alang sa dugang impormasyon mahitungod ning mga butanga, pagsulat sa Watch Tower Bible and Tract Society of the Philippines, P.O. Box 2044, 1099 Manila, o sa labing duol nga sangang-buhatan sa Sosyedad.

[Kahon sa panid 29]

BUOT NIYANG MOTABANG

ANG onse-anyos nga si Tiffany usa ka nagtunghang bata sa Baton Rouge, Louisiana, T.B.A. Ning bag-o pa, kining bata nga Saksi ni Jehova nag-andam ug usa ka mubong sinulat mahitungod sa tema nga “Edukasyon sa Amerika.” Ingong sangpotanan, ang iyang Saksing mga ginikanan nakadawat niining sulat gikan sa prinsipal sa tunghaan:

“Sulod sa semana sa Edukasyon sa Amerika, usa ka talagsaong mubong sinulat alang sa matag grado gibasa sa intercom. Ako nahimuot sa paggamit sa mubong sinulat ni Tiffany karong buntaga. Siya sa pagkatinuod usa ka tagsaong batang babaye. Siya maugdang, may pagsalig-sa-kaugalingon, utokan, ug matinahuron. Talagsa ra akong makakita ug usa ka grade six nga may daghan kaayo niining mga hiyasa. Si Tiffany maoy usa ka bahandi sa among tunghaan.”

Si Tiffany nakadaog sa unang ganti sa bangga sa pagsulat ug mubong sinulat. Pagkatapos niadto siya nagsulat sa Watch Tower Society ug nag-ingon: “Lagmit ako nakadaog lamang sa bangga tungod sa publikasyon nga Mga Pangutana nga Gisukna sa mga Batan-on​—Mga Tubag nga Mosaler. . . . Akong gigamit ang mga kapitulo mahitungod sa edukasyon. . . . Daghang salamat kaninyo sa pagpatik niining mapuslanon ug makapadasig nga libro. Alang sa akong nakadaog nga mubong sinulat, nakadaog ako ug pito ka dolyar. Ginaamot nako kining 7 ka dolyar ug dugang pang 13, alang sa katibuk-ang 20 dolyares ngadto sa tibuok-kalibotang buluhaton sa pagwali. . . . Kon modako na ako, naglaom usab ako sa pagboluntaryo alang sa pag-alagad sa Bethel.”

[Hulagway sa panid 26]

Usahay, si Pablo nakabaton ug iyang pangabuhian pinaagi sa paghimo ug tolda