“Sa Balay-Balay”

“SA MATAG adlaw sa templo ug sa balay-balay sila nagpadayon nga walay paghunong sa pagtudlo ug sa pagmantala sa maayong balita mahitungod kang Kristo, si Jesus.” (Buhat 5:42) Kasagarang gamiton sa mga Saksi ni Jehova kining tekstoha ug ang Buhat 20:20 aron sa pagpamatuod sa pasikaranang Kasulatanhon sa ilang ganghaan-sa-ganghaan nga buluhaton sa pagwali. Bisan pa niana, sa Alemanya gihagit sa pila ka kritiko sa mga Saksi ni Jehova ang paagi sa paghubad sa New World Translation niining mga bersikuloha, nga miangkon nga gituis niini ang orihinal nga Grego.

Ang maong mga pangangkon balido ba? Dili gayod. Sa usa ka butang, labing menos unom ka laing Alemang mga hubad sa Bibliya naghubad niining mga bersikuloha sa samang paagi. Apil kanila mao ang rebisadong Zürcher Bibel ug ang “Bag-ong mga Testamento” ni Rupert Storr, Franz Sigge, ug Jakob Schäfer. Uyon ang daghang Ingles nga bersiyon.

Ang Alemang eskolar nga si Hans Bruns nagpakamatarong sa iyang hubad, “sa balay-balay,” sa Buhat 5:42, nga miingon: “Sumala sa orihinal nga teksto, mopatim-aw nga sila nangadto sa balay ug balay.” Oo, ang kat’ oiʹkon, ang orihinal nga pamulong niining tekstoha, wala gamita sa diwang adverbial (“diha sa balay”) kondili sa diwang distributive, nga sa literal nagkahulogan “sumala sa balay.” (Ang porma nga plural, kat’ oiʹkous, nga nagkahulogan “sumala sa mga balay,” makita diha sa Buhat 20:20.) Ang ubang mga eskolar, sama ni Heinz Schürmann nagpaluyo sa maapod-aporong hubad sa maong mga pamulong. Si Horst Balz ug Gerhard Schneider, mga publikador sa usa ka diksiyonaryo sa kahubitan sa Bag-ong Testamento, nag-ingon nga kining pamulonga mahubad nga “balay sunod sa balay.” Ang ubay-ubayng Ingles nga mga reperensiyang basahon nagpatin-aw nga susama sa maong bersikulo.

Nan, sa makausa pa ang New World Translation nakabarog sa mga pag-atake sa mga kritiko. Labawng hinungdanon, matin-aw nga adunay lig-ong Biblikanhong pasikaranan sa balay-balay nga ministeryo. (Itandi ang Mateo 10:11-14; 24:14.) Ang mga Saksi ni Jehova may pribilehiyo sa pagsundog sa ilang unang-siglo nga mga katumbas niining bahina.