Mga Pangutana Gikan sa mga Magbabasa
◼ Unsa “ang maayo” nga dili mabuhat ni apostol Pablo, sumala sa iyang gihisgotan sa Roma 7:19?
Sa panguna, si Pablo nagtumong sa pagkawala niyay katakos sa pagtuman sa tanang maayong butang gilaraw diha sa Moisesnong Kasugoan. Kana imposible alang kang Pablo ug sa tanan nga uban, apil kita, tungod sa pagkadili-hingpit ug pagkamakasasala. Apan dili kinahanglang mawad-ag paglaom. Ang halad ni Kristo nagbukas sa dalan alang sa kapasayloan sa Diyos ug sa usa ka maayong baroganan uban Kaniya.
Ang Roma 7:19 mabasa: “Kay dili ako mobuhat sa maayo nga gitinguha ko, kondili ang akong ginabuhat mao ang daotan nga wala ko tinguhaa.” Ang konteksto nagpakita nga si Pablo sa panguna naghisgot mahitungod sa “maayo” sa diwa sa kon unsay gibaod diha sa Kasugoan. Sa bersikulo 7 siya miingon: “Ang Kasugoan mao ba ang sala? Palayo kana! Sa pagkatinuod kon dili pa ang Kasugoan dili unta ako makailag sala; ug, pananglitan, dili unta ako makailag pangibog kon ang Kasugoan wala pa mag-ingon: ‘Dili ka magkaibog.’” Oo, ang Kasugoan nagtin-aw nga sanglit dili sila makatuman niana sa bug-os, ang tanang tawo makasasala.
Si Pablo nagpadayon sa paghisgot nga siya “buhi kaniadto nga bulag sa kasugoan.” Kanus-a ba kana matuod? Aw, sa dihang siya didto pa sa mga bat-ang ni Abraham una itagana ni Jehova ang Kasugoan. (Roma 7:9; itandi ang Hebreohanon 7:9, 10.) Bisan pag si Abraham dili hingpit, ang Kasugoan wala pa ikahatag, mao nga siya wala mapahinumdomi sa iyang pagkamakasasala pinaagi sa pagkapakyas sa pagsunod sa daghang mga sugo niini. Nagkahulogan ba kana nga sa dihang gihatag na ang Kasugoan ug gipadayag ang tawhanong kadili-hingpit, kadto nagpatunghag daotang sangpotanan? Dili. Si Pablo mipadayon: “Busa, sa bahin niini, ang Kasugoan balaan, ug ang sugo balaan ug matarong ug maayo.”—Roma 7:12.
Matikdi nga si Pablo nagbatbat sa Kasugoan ingong “balaan” ug “maayo.” Sa mosunod nga mga bersikulo, iyang gipatin-aw nga “ang maayo”—ang Kasugoan—nagtin-aw nga siya usa ka makasasala, ug ang maong sala naghimo niyang takos sa kamatayon. Si Pablo misulat: “Dili ako mobuhat sa maayo nga gitinguha ko, apan akong ginabuhat ang daotan nga wala ko tinguhaa. Kon, karon, maoy ginabuhat ko ang wala ko tinguhaa, dili na ako ang nagabuhat niini, kondili ang sala nga nagapuyo sa sulod nako.”—Roma 7:13-20.
Nan, niining kontekstoha si Pablo wala maghisgot sa pagkamaayo sa katibuk-an, o sa malulutong mga binuhatan lamang. (Itandi ang Buhat 9:36; Roma 13:3.) Siya nagtumong ilabina sa pagbuhat (o dili pagbuhat) sa mga butang nga nahiuyon sa maayong Kasugoan sa Diyos. Sa nangagi siya madasigong nagtuman sa Hudiyonhong relihiyon ug—kon itandi sa uban—maoy “walay ikasaway.” Ugaling, bisan pag sa iyang hunahuna siya binuotang nagpaulipon sa maong maayong Kasugoan, siya wala gihapon makasunod niana sa bug-os. (Filipos 3:4-6) Ang Kasugoan nagsumbalik-silaw sa hingpit nga mga sukdanan sa Diyos, nga nagpakita sa apostol nga diha sa iyang unod siya ulipon gihapon sa kasugoan sa sala ug sa ingon nahukman sa kamatayon. Bisan pa niana, si Pablo nakapasalamat nga pinaagi sa halad ni Kristo siya gipahayag nga matarong—nga giluwas gikan sa kasugoan sa sala ug sa angayan niining sangpotanan, ang silot sa kamatayon.—Roma 7:25.
Ang mga Kristohanon karong adlawa dili na ilalom sa Moisesnong Kasugoan, kay kadto gilansang sa kahoy sa pagsakit. (Roma 7:4-6; Colosas 2:14) Apan maayo nga atong ilhon nga dili kadto mabug-at nga kodigo nga ato lamang hikalimtan. Dili, sa pasukaranan ang Kasugoan maayo. Busa kita may katarongan sa pagbasa sa mga basahon sa Bibliya nga nasudlan sa Kasugoan ug pagkat-on kon unsay gibaod niadto sa Israel. Ang mga Saksi ni Jehova sa tibuok yuta magbuhat niana sa dili na madugay, nga magasunod sa ilang senemanang pagbasa sa Bibliya.
Samtang atong basahon ang Kasugoan, angay nga atong palandongon ang mga prinsipyo nga nagpaluyo sa nagkalainlaing mga kalagdaan niini ug bahin sa mga kaayohan nga naangkon sa katawhan sa Diyos samtang gisulayan nila ang pagsunod sa maong maayong mga sugo. Angay natong ilhon, usab, nga kita dili hingpit ug busa dili makasunod sa bug-os sa maayo nga atong makat-onan gikan sa Pulong sa Diyos. Apan samtang nakigbugno batok sa kasugoan sa sala, kita mahimong maglipay tungod sa kalaoman nga maluwas pinaagi sa pagpadapat sa halad ni Kristo nganhi kanato.