Unsay Makatabang Kanato sa Malig-ong Pagbarog sa Pagtuo?
1 Sukad gayod sa sinugdan sa atong pagpakig-uban sa organisasyon ni Jehova, ang atong espirituwal nga pag-uswag napamatud-ang usa ka tinubdan sa kalipay alang kanato! Bisan pa niana, aron magpabiling ‘nakagamot, natukod, ug nalig-on diha sa pagtuo,’ ang padayong espirituwal nga pagtubo gikinahanglan. (Col. 2:6, 7) Samtang kadaghanan miuswag sa espirituwal, ang uban naanod palayo tungod sa pagkapakyas sa ‘pagbarog nga malig-on diha sa pagtuo.’ (1 Cor. 16:13) Atong mapugngan kini nga mahitabo kanato. Sa unsang paagi?
2 Kanunayng Espirituwal nga Kalihokan: Pagtukod ug usa ka maayong espirituwal nga rutina sulod sa organisasyon ni Jehova. Dinhi ang atong espirituwal nga mga panginahanglan dagayang ginaatiman. Ang mga tigom sa kongregasyon, mga asembliya, ug mga kombensiyon mag-aghat kanato ngadto sa mas dakong espirituwal nga pagtubo ug kalig-on, basta padayon kitang magtambongan aron makaanig mga kaayohan. (Heb. 10:24, 25) Ang regular nga rutina sa pagbasag Bibliya, sa mga magasing Bantayanang Torre ug Pagmata!, ug sa mga libro nga naghisgot sa gahing pagkaon sa Pulong sa Diyos mopalalom ug mopalig-on sa atong espirituwal nga mga gamot. (Heb. 5:14) Ang pagpahilunag personal espirituwal nga mga tumong ug makugihong paghago alang niana magpatungha usab ug malungtarong mga kaayohan.—Filip. 3:16.
3 Tabang Gikan sa Hamtong nga mga Tawo: Tinguhaa nga mapauswag ang pagpakig-uban sa hamtong sa espirituwal nga mga tawo diha sa kongregasyon. Sinatia ang mga ansiyano, kay sila ang pangunang mga tawo nga makalig-on kanato. (1 Tes. 2:11, 12) Dawata ang bisan unsang tambag o mga sugyot nga hayan ilang ihatag. (Efe. 4:11-16) Ang ministeryal nga mga alagad interesado usab sa pagtabang sa uban nga mapalig-on diha sa pagtuo, busa duola kining mga igsoona alang sa pagdasig.
4 Nagkinahanglan ka ba ug tabang diha sa ministeryo? Pakigsulti sa mga ansiyano, ug pangayog tabang. Tingali ikaw mahimong ilakip sa programang Mga Payunir Motabang sa Uban. Ikaw ba bag-ong bawtismado? Ang pagtuon sa librong Atong Ministeryo ug pagpadapat kon unsay unod niana mopauswag ngadto sa espirituwal nga pagkahamtong. Ikaw ba usa ka ginikanan? Padayong palig-ona ang espirituwalidad sa imong mga anak.—Efe. 6:4.
5 Pinaagig pagkanakagamot ug napalig-on sa pagtuo, atong mapahimuslan ang suod nga relasyon kang Jehova ug mainitong panag-ubanay sa atong mga igsoon. Kini magpaarang kanato sa pagbarog sa mga atake ni Satanas, ug maglig-on sa atong paglaom sa walay kataposang kaugmaon.—1 Ped. 5:9, 10.