Tabang nga Daling Makaplagan
1. Sa unsang paagi maluya ang espirituwalidad sa usa?
1 Si Anna, usa ka sister nga may dili-magtutuong bana ug puliki kaayo sa iyang trabaho, naglisod sa pagtambong nga regular sa Kristohanong mga tigom, pagpakigbahin sa ministeryo, ug pagtuon sa Pulong sa Diyos. Bisan tuod iya gihapong gihigugma si Jehova, siya dili na aktibo. Maayo na lang kay gitabangan siya sa mahingawaong mga ansiyano.
2. Sa unsang paagi ang tanang Kristohanon mahimong tabang nga daling makaplagan?
2 Ang pagdawat sa espirituwal nga tabang nga gitanyag sa Kristohanong kongregasyon nagpakita nga kita nagasalig kang Jehova mismo. Agig pagsundog sa mahigugmaong pag-atiman ni Jesu-Kristo, ang mga ansiyano sa kongregasyon mangitag mga kahigayonan sa pagdasig ug paghatag ug praktikal nga tabang niadtong nalisdan sa pagtuman sa ilang espirituwal nga mga kaakohan. (1 Tes. 5:14) Usahay, ang usa ka mabinationg pulong sa pagdasig pinasukad sa Kasulatan mao ray gikinahanglan. Ang pagpaningkamot sa pagpaluyo niadtong anaa sa temporaryong huyang nga kahimtang maoy obligasyon sa tanang Kristohanon, dili kay sa mga ansiyano ra. Walay duhaduha nga ang matag usa kanato nakasinati na sa gahom sa mabinationg “pulong nga gisulti sa hustong panahon.”—Prov. 25:11; Isa. 35:3, 4.
3, 4. Unsay nalangkit sa pagtabang sa uban, ug sa unsang paagi atong mahimo kana?
3 Manguna sa Pagtabang: Ang pagpakitag mahigugmaong interes niadtong nagkinahanglan ug tabang nagpasabot nga kita mao ang manguna sa pagpakitag pagbati alang sa isigkaingon ug magmasinsero. Sa dihang nahibaloan ni Jonatan nga si David anaa sa malisod nga kahimtang, siya “mitindog ug miadto kang David sa Hores, aron mapalig-on niya ang iyang kamot.” (1 Sam. 23:15, 16) Tabangi ang uban sa mabinationg paagi. Ang mga pulong nga gitukmod sa tiunay nga kahingawa mopatunghag kinamaayohang mga resulta. Dugang pa, si Jesus tin-awng nag-ilustrar nga nalangkit ang makugihon, mapuslanon nga paningkamot sa pagpasig-uli sa espirituwal nga igsoong lalaki o babaye. (Luc. 15:4) Ang tim-os nga tinguha sa pagtabang sa laing tawo magtukmod kanato sa paglahutay bisan pag siya dili dayon mosanong.
4 Makapadasig gayod kon manguna kita sa pagdapit sa uban, sama sa atong mga kauban sa pagtuon sa libro, sa pag-uban kanato sa ministeryo! Samtang tabangan nato ang isigkaalagad ni Jehova sa pagpakigbahin sa ministeryo, hinaot gamiton nato ang maong kahigayonan sa pagdasig kaniya. Ang malipayong mga panahon nga magkauban sa pag-alagad kang Jehova makapadasig gayod ilabina niadtong buot maulian sa ilang pagkatimbang sa espirituwal.
5. Sa pipila ka kahimtang, unsang tabang ang mahimo sa mga ansiyano?
5 Usa ka Mahigugmaong Kahikayan: Kadtong dugaydugay na nga wala makigbahin sa pagsangyaw o makig-uban sa kongregasyon tingali nagkinahanglag dugang tabang sa pagpalig-on sa ilang pagtuo. Ang personal nga pagtuon sa Bibliya ginamit ang usa ka publikasyon sama sa Simbaha ang Bugtong Matuod nga Diyos, Pakigsuod Kang Jehova, o Unsay Tinuod nga Gitudlo sa Bibliya? lagmit mao ray gikinahanglan. Tungod kay bawtismado na siya, kasagaran ang pagtuon dili angayng dugayon. Ang Komite sa Pag-alagad sa Kongregasyon angayng magmaalisto sa pagmatikod kon kinsay makabenepisyo gikan niini nga kahikayan.—Tan-awa ang “Pangutana” sa Nobyembre 1998 ug Nobyembre 2000 nga mga gula sa Atong Ministeryo sa Gingharian.
6. Sa unsang paagi ang espirituwalidad sa usa ka sister nalig-on pag-usab?
6 Malipayong gidawat ni Anna, nga gihisgotan ganina, ang tabang sa mga ansiyano nga dumalahan siyag pagtuon sa Bibliya uban sa usa ka sister nga hamtong sa espirituwal. Human sa upat lang ka sesyon sa pagtuon, siya nasuod na pag-usab kang Jehova. Siya nagtambongan na usab sa mga tigom sa kongregasyon ug nagtinguha na usab sa pagdayeg kang Jehova diha sa publiko. Gitabangan usab siya sa hamtong nga sister diha sa ministeryo pinaagi sa pagpauban kaniya ngadto sa uban pang mga estudyante sa Bibliya hangtod nga si Anna may igo nang kalig-on sa pagpamalaybalay. Ang usa ka mabinationg tabang mao ray iyang gikinahanglan aron mapasig-uli ang iyang espirituwal nga kalihokan!
7. Unsang mga kaayohan ang moresulta sa pagpalig-on sa uban sa espirituwal?
7 Ang pagpalig-on niadtong nanginahanglan magdalag mga panalangin sa tanan. Ang gitabangan makapahimulos sa kalipay sa pagpakigsuod kang Jehova ug sa pagpakigbahin sa mga kalihokan sa Iyang organisasyon. Ang mga ansiyano malipay sa pagkakita sa maong espirituwal nga pag-uswag. (Luc. 15:5, 6) Ang tanan diha sa kongregasyon magkahiusa sa pagpasundayag ug mahigugmaong kahingawa alang sa usag usa. (Col. 3:12-14) Kita aduna gayoy maayong mga katarongan sa pagsundog kang Jehova, ang tabang nga daling makaplagan!—Efe. 5:1.