Ang Diyos ba Adunay Buhaton sa Inhustisya?

“DILI kana makataronganon.” Ang estudyante klaro nga nasuko, puno sa kaligotgot human nakaeksperyensiya sa dayag nga pagkawalay hustisya. “Kon tinuod dunay Diyos,” siya mipadayon, “nganong iyang gitugotan ang inhustisya?” Ikaw ba mosimpatiya niining batan-ong babaye? Tingali. Apan ikaw ba usab makatubag sa iyang pagtutol?

Sa bata pa, ikaw tingali mibati nga gitugotan ka sa imong mga ginikanan nga maltratohon ka sa pagkadili-makataronganon. Apan kana nga inhustisya dili pamatuod nga sila wala maglungtad, dili ba? Sa susama, ang pagtugot sa Diyos sa inhustisya dili pamatuod nga siya wala-maglungtad.

Ang batan-ong estudyante mitubag, hinunoa, nga lahi kini nga butang. Siya miingon nga ang dili-hingpit nga tawhanong amahan tingali may pagkadili makataronganon usab. O tungod kay wala mahibalo sa tanang mga kamatuoran, tingali dili siya makaila ug inhustisya inigkakita niana. Dugang pa, tungod sa tawhanong mga limitasyon, tingali siya walay gahom sa pagbuhat ug bisan unsa mahitungod sa mga inhustisya nga iyang nakita. Walay usa niini, siya nangatarongan, ang mahimong ipadapat diha sa usa ka matarong nga Diyos nga nasayod sa tanan ug makagagahom sa tanan.

Ikaw tingali mibati usab nga ang pagtugot sa inhustisya sa yano dili mobagay sa mga hiyas sa Diyos. Bisan pa, dili ba kaha nga diha sa iyang kinatayoktokang kaalam, ang Diyos dunay katuohan nga rason sa pagtugot sa inhustisya alang sa usa ka yugto sa panahon?

Ang mga magsusulat sa Bibliya nagaisip sa Diyos nga “usa ka mahigugmaon sa pagkamatarong ug sa hustisya.” “Ang tanan niyang mga dalan hustisya. Usa ka Diyos sa pagkamatarong nga kaniya walay inhustisya,” misulat si Moises.​—Salmo 33:5; Deuteronomio 32:4; Job 37:23.

Gawas sa paglantaw kang Jehova ingong usa ka matarong nga Diyos nga dili malipay sa inhustisya, ang mga magsusulat sa Bibliya miuyon nga moabot ra ang adlaw nga iyang wagtangon kini. Si Isaias, pananglitan, mitagna niining kahimtanga: “Tan-awa! Usa ka kari magahari diha sa pagkamatarong; ug ang mga prinsipe, sila magamando sa hustisya. Ug diha sa kamingawan ang hustisya magapuyo, ug diha sa kapatagan ang pagkamatarong magapuyo.” (Isaias 32:1, 16) Apan kanus-a? Ug kon maoy tuyo sa Diyos nga wad-an ang kalibotan ug inhustisya, nganong iya pa kining gitugotan?

Inhustisya—Nganong Gitugotan?

Dihay panahon nga walay inhustisya ang naglungtad sa uniberso. Nagsugod lamang kadto sukad sa pag-alsa ni Adan ug Eva ubos sa pagpiit ni Satanas nga Yawa nga nailhan sa katawhan ang inhustisya. Si Satanas wala dayon laglaga sa panahon sa rebelyon. Alang sa iyang kaugalingon maayong katuyoan, gitugotan sa Diyos ang yugto sa panahon nga buhaton sa tawo ang mga inhustisya, ug kini maoy alang sa katuyoan sa pagsulay niadtong debotado Kaniya, kon sila magpabilin bang matinumanon Kaniya. Ang ilang pagpili nga mahimong mga maghuhupot sa integridad maoy paglimod sa katakos ni Satanas sa pagpatalikod sa tanang tawhanong kalalangan batok sa Diyos. Uban sa nabayaw nga pagkasoberano sa Diyos, ang mga buhat ni Satanas pagalaglagon, ug ang tanang mga inhustisya wagtangon.

Kasamtangan, kon nagapamugos pa ang Diyos sa pagpugong sa mga tawo sa pakiglabot nga walay-katarong, iyang ginakuhaan sila sa kagawasan sa pagpili. Gawas pa, pinaagi sa pagtugot sa mga tawo sa pagbati sa dili-maayong mga sangpotanan sa sayop nga mga aksiyon sa uban, gipakita sa Diyos kon unsa ka makadaot kadto kang Adan ug Eva sa dili-makataronganong pag-alsa batok sa mga sugo sa Diyos, gipulihan kini sa ilang kaugalingon daot nga mga sukdanan. Pinaagi sa pagtugot sa katawhan sa pag-ani sa gipugas niini, gitabangan sa Diyos ang matinud-anong mga tawo sa pagkaamgo sa pagkalabaw sa pagbuhat sa mga butang sa iyang paagi.​—Jeremias 10:23; Galacia 6:7.

Dugang pa, ang mga buhat sa hustisya o inhustisya nga ginahimo sa mga tawo nagahatag mabutyagong pamatuod. Kining mga buhata naghatag sa Diyos ug tukmang basehanan sa paghukom kon kinsa ang takos sa kinabuhi sa yuta diha sa usa ka bag-ong kalibotan sa dihang ang bug-os nga hustisya mapasig-uli. Nagasugyot niana, atong mabasa: “Karon mahitungod sa daotan, kon siya motalikod gikan sa tanan niyang mga sala nga iyang nahimo ug magabantay sa tanan nakong mga kabalaoran ug magapakanaog ug hustisya ug pagkamatarong, siya sa pagkamatuod mabuhi.”​—Ezekiel 18:21.

Kanus-a Matapos ang Inhustisya?

Ang pakiglabot ni Jehova nga Diyos sa katawhan sa tanang panahon makataronganon ug gitiman-an sa mahigugmaong-kalulot. Nagailustrar niana, sa dihang ang matinumanong alagad sa Diyos nga si Abraham wala makasabot kon nganong may butang nahitabo, siya miingon sa Diyos: “Halayo kanimo ang pagbuhat niana nga patyon mo ang tawong matarong uban sa daotan! Kana halayo kanimo. Dili ba ang Maghuhukom sa tibuok nga yuta magabuhat sa matarong?” (Genesis 18:25) Sa pag-abot ni Kristo, ang mga hiyas sa Diyos nga hustisya ug mahigugmaong-kalulot napadako. Ang kahikayan sa halad lukat pinaagi ni Kristo Jesus maoy nagbukas sa dalan alang sa tanan, sa mga Hudiyo ug sa dili mga Hudiyo, nga makabaton ug kinabuhing dayon. Kini ang nag-agak kang apostol Pedro sa pag-ingon: “Sa pagkamatuod naila ko nga ang Diyos walay pinalabi, hinunoa nga sa matag-usa ka nasod iyang pagakahimut-an ang tawo nga magakahadlok kaniya ug magabuhat sa matarong.”​—Buhat 10:34, 35.

Ang mga Saksi ni Jehova aktibo sa pagwali nga ang Mesiyanikong Hari sa Diyos nagsugod na sa pagmando ug nga duol na ang panahon sa dihang ang hustisya ipasig-uli sa atong yuta sa hingpit nga sukod.a Kini matuman sa dihang laglagon sa Hari ang presente daotan nga kalibotan ug pukanon ang gahom sa dili-makitang diyos niini, si Satanas nga Yawa. Ang Bibliya nagpakita nga kini mahitabo sa dili madugay diha sa “gubat sa dakong adlaw sa Diyos nga Labing Makagagahom,” nga sa katibuk-an gitawag Armageddon.​—Pinadayag 16:14, 16.

“Ang Diyos matarong sa dihang ipahamtang niya ang iyang kasuko,” busa ang Armageddon maoy usa ka matarong nga gubat. (Roma 3:5) Human niana, si Kristo Jesus ug ang iyang kaubang mga magmamando, sama sa mga apostoles, mohari gikan sa langit sulod sa usa ka libo ka tuig. (Pinadayag 20:4) Milyonmilyon sa mga tawo nga nag-antos sa mga inhustisya sa miagi pagabanhawon ngadto sa usa ka matarong nga sistema sa yuta, ang orihinal nga puy-anan sa tawo, aron sa pagtagamtam sa hingpit nga hustisya sa unang higayon sa ilang mga kinabuhi.

“Nagpasabot ba kana nga Walay Hustisya ang Diyos?”

Si apostol Pablo nangutana niana mahitungod sa usa sa mga pakiglabot sa Diyos. Ang tubag? “Dili gayod,” misulat si Pablo. Gipaamgid ang mga tawo sa usa ka yutang kolonon nga gihulma sa magkokolon ingong mga sudlanan nga takos sa kasuko o sa kaluoy, si Pablo misaysay: “Bisan pa nga andam ang Diyos sa pagpakita sa iyang kasuko ug sa pagpaila sa iyang gahom, sa mapailobon gayod giantos niya ang ang mga tawo nga nakapasuko kaniya, bisan pa nga takos sila nga pagalaglagon. Iyang giantos sila alang sa ubang mga tawo, diin ngadto kanila siya gustong mopakitag kaluoy, diin ngadto kanila siya gustong mopaila sa katugob sa iyang himaya.”​—Roma 9:14, 20-24, The Jerusalem Bible.

Sama sa batan-ong estudyante nga gihisgotan sa sinugdan, tingali may mga panahon nga malisdan ka sa pagsabot kon nganong gitugotan sa Diyos ang inhustisya sa katibuk-an o sa pipila ka butang nga sayop. Apan kinsa man kita​—mga hinulma lang sa iyang mga kamot​—sa pagkuwestiyon sa iyang pailob ug kaalam sa pagbuhat niini? Si Jehova nga Diyos miingon kang Job: “Imo bang kawangon ang akong hustisya? Hukman mo ba ako nga daotan aron ikaw pakamatarongon?”​—Job 40:8.

Dili gayod kita gusto nga mahimong sad-an sa pagbuhat niana. Hinunoa, gusto kitang malipay sa pagkasayod nga bisag ang inhustisya ania gihapon kanato, ang Diyos sa hustisya sa dili madugay magakuha niini gikan sa tibuok yuta.

[Mga Footnote]

[Hulagway sa panid 23]

Ang pagtugot sa inhustisya dili gayod magamit sa pagpamatuod nga wala maglungtad ang Diyos

Ang Diyos ba ang sad-an sa pagdumili sa hubog nga drayber sa paggamit sa mga hiyas sa sentido kumon, pagpugong sa kaugalingon, ug konsiderasyon?

Duol na ang panahon sa dihang ang bug-os nga hustisya ipasig-uli sa atong yuta