Ang Hunahuna sa Bibliya

Ang Selibasiya Kinahanglanon ba Alang sa Kristohanong mga Ministro?

ANG selibasiya, sa estriktong pagkasulti, maoy kahimtang sa pagkadi-minyo. Bisan pa niana, sumala sa The New Encyclopædia Britannica, ang termino “kasagarang gigamit maylabot sa di-minyong papel sa indibiduwal ingong relihiyosong opisyal, espesyalista, o deboto.” Ang terminong “celibate” nagtumong “niadtong alang kang kinsa ang kahimtang sa pagkadi-minyo maoy resulta sa sagradong panaad o buhat sa pag-ayad o sa pagtuo nga kini maayo alang sa usa ka tawo tungod sa iyang relihiyosong posisyon o sa gibug-aton sa iyang relihiyosong pagkamasiboton.”

May panahon sa miagi, ang pipila ka iladong mga relihiyon misagop sa selibasiya ingong kinahanglanon alang sa ilang mga ministro. Apan, walay laing relihiyon sa Kakristiyanohan diin ang selibasiya nahimong mas iladong ilhanan kay sa Katolisismo. Karong adlawa, adunay di-tiaw nga panaglalis sa selibasiyang Katoliko. Ang The Wilson Quarterly miingon nga ang “daghang pagtuon sa dili pa dugayng mga dekada mihinapos nga ang gipatumang selibasiya, nga kinahanglanon alang sa Katolikong mga pari sukad sa ika-12ng siglo, maoy hinungdan sa mga suliran sa simbahan bahin sa pagrekluta ug pagpatunhay ug mga pari.” Sumala sa sosyologo nga si Richard A. Schoenherr, “ang makapakombinsir nga mga kamatuoran sa kasaysayan ug katilingbanong kausaban misupak sa ideya nga tugotan lamang ang di-minyong mga lalaki diha sa Katolikong kaparian.” Unsay hunahuna sa Bibliya bahin sa selibasiya?

Kaminyoon o Pagkadi-Minyo?

Latas sa kasaysayan ang di-maihap nga debotadong mga lalaki ug babaye, sa daghang nagkalainlaing mga relihiyon, mipili nga dili magminyo. Ngano? Sa daghang kaso tungod kadto kay sila nagtuo nga ang unodnon, materyal nga mga butang maoy “sukaranan sa daotan.” Kini nagpatungha sa pilosopiya nga ang espirituwal nga kaputli maposible lamang pinaagi sa paglikay sa tanang seksuwal nga kalihokan. Apan, kini dili maoy panghunahuna sa Bibliya. Sa Bibliya, ang kaminyoon giisip ingong putli, balaan nga gasa gikan sa Diyos. Ang asoy sa Genesis bahin sa paglalang tin-awng naglarawan sa kaminyoon ingong “maayo” sa mga mata sa Diyos ug tin-awng dili usa ka babag sa putli espirituwal nga relasyon uban sa Diyos.​—Genesis 1:26-28, 31; 2:18, 22-24; tan-awa usab ang Proverbio 5:15-19.

Si apostol Pedro ug ang ubang inuyonang mga alagad sa Diyos nga naghupot ug mga posisyon sa awtoridad diha sa unang Kristohanong kongregasyon maoy minyong mga lalaki. (Mateo 8:14; Buhat 18:2; 21:8, 9; 1 Corinto 9:5) Ang mga pahimangno ni apostol Pablo kang Timoteo bahin sa pagtudlo ug mga magtatan-aw sa kongregasyon, o “mga obispo,” nagtin-aw niini. Siya misulat: “Ang obispo kinahanglang walay ikasaway, bana sa usa ka asawa.” (Italiko amoa; 1 Timoteo 3:2, Revised Standard Version, Katolikong Edisyon) Matikdi nga wala gayod kini magsugyot nga dili angayan sa bisan unsang paagi nga magminyo ang usa ka “obispo.” Yanong gipakita ni Pablo nga ang usa ka “obispo” dili gayod usa ka poligamista; kon minyo, siya aduna lamay usa ka asawa. Sa pagkatinuod, ang Cyclopedia of Biblical, Theological, and Ecclesiastical Literature, ni McClintock ug Strong, mihinapos: “Walay teksto sa B[ag-ong] T[estamento] nga mahubad nga nagdili batok sa pagminyo sa klero ilalom sa mga balaod sa Ebanghelyo.”

Bisan tuod gipabilhag dako ang kaminyoon, ang Bibliya wala gayod magkondenar sa pagkadi-minyo kon kini kinabubut-ong gipili. Ang Bibliya nagrekomendar niana ingong tilinguhaong dalan alang sa pipila. (1 Corinto 7:7, 8) Si Jesu-Kristo miingon nga ang pipila ka lalaki ug babaye tinuyong mopili sa dalan sa pagkadi-minyo. (Mateo 19:12) Ngano? Dili tungod kay dunay butang nga sa kinaiyanhon dili putli bahin sa kaminyoon nga magpugong sa ilang espirituwal nga pag-uswag. Ilang pilion kining dalana aron lamang ilang ikasentro ang ilang mga paningkamot sa pagtuman sa kabubut-on sa Diyos diha sa ilang nasabtan nga dinaliang mga panahon.

Ang Dalan nga Mitultol sa Pinugsanay nga Selibasiya

Apan, ang mga kahimtang nausab sa mga siglo human sa panahon ni Kristo. Sulod sa unang tulo ka siglo sa atong Komong Panahon, “dihay mga minyo ug di-minyong mga ministro,” misaysay si David Rice, usa ka Dominikano nga mibiya sa pagkapari aron magminyo. Dayon, ang nag-angkong mga Kristohanon nagsugod sa pag-impluwensiya sa gihubit sa usa ka relihiyosong magsusulat ingong “kombinasyon sa Grego ug biblikanhong mga ideya” nga nagpatunghag tinuis nga panglantaw sa sekso ug kaminyoon.

Ang pipila, siyempre, nangagpas gihapon sa pagkadi-minyo aron lamang “maangkon ang bug-os nga kagawasan aron ideboto [ang ilang kaugalingon] sa buluhaton sa gingharian sa Diyos.” Apan, ang uban labi pang nadasig tungod sa paganong mga pilosopiya nga ilang gisagop. Nag-ingon ang The New Encyclopædia Britannica: “Ang pagtuo nga ang pagpakigsekso makapahugaw ug dili angay sa pagkabalaan mitungha [diha sa nag-angkong Kristohanon nga iglesya] ingong pangunang pangagda sa pagtuman sa selibasiya.”

Sa ikaupat nga siglo, miingon si Rice, ang iglesya “nagdili sa usa ka minyong pari sa pagpakigsekso sa gabii una pa sa pagsaulog sa Kalawat.” Sa dihang ang iglesya nagpailaila sa adlaw-adlaw nga Kalawat, kini nagkahulogan nga ang mga pari kinahanglang permanenteng maglikay sa pagpakigsekso. Ngadtongadto, ang mga pagminyo sa mga pari bug-os gidili. Busa ang selibasiya nahimong pinugsanay alang ni bisan kinsa nga mahimong usa ka ministro sa iglesya.

Si apostol Pablo nagpasidaan bahin sa mao gayong kaugmaran. Siya misulat: “Ang Espiritu tin-awng nag-ingon nga sulod sa kataposang mga panahon adunay pipila nga mobiya sa pagtuo ug mopili sa pagpaminaw sa malimbongong mga espiritu ug mga doktrina nga maggikan sa mga yawa . . . Sila moingon nga ang kaminyoon gidili.”​—1 Timoteo 4:1, 3, Jerusalem Bible.

“Ang kaalam mapamatud-ang matarong pinaagi sa mga buhat niini,” miingon si Jesu-Kristo. (Mateo 11:19) Ang kabuangan sa pagbiya sa mga sukdanan sa Diyos napamatud-an pinaagi sa mga buhat o mga resulta niini. Ang awtor nga si David Rice miinterbiyo sa daghang pari sa tibuok kalibotan bahin sa ulohan sa pinugsanay nga selibasiya. Ang uban nga iyang gikaestorya miingon: “Pabilin sa pagkapari, buhata kon unsay maayo kutob sa imong maarangan, ug sa mainampingong paagi pahimusli ang pagkaandam makigsekso sa debotada, naibog nga mga babaye.”

Nagkutlo sa Mateo 7:20, si Rice miingon: “‘Pinaagi sa ilang mga bunga inyong mailhan kanang mga tawhana,’ si Jesus miingon.” Dayon mikomento siya bahin sa katalagman nga miresulta gumikan sa gipatuman nga selibasiya: “Ang mga bunga sa pinugsanay nga selibasiya mao kadtong linibong kalalakin-an nga nagkinabuhig dobleng kinabuhi, linibong kababayen-ang may napusgay nga mga kinabuhi, linibong kabataang gisalikway sa ilang ordinadong mga amahan, gawas pa sa mga pari nga gihasol sa konsensiya.”

Ang dungganong kaminyoon maoy panalangin gikan sa Diyos. Ang gipatuman nga selibasiya napamatud-ang makadaot sa espirituwalidad. Ang kinabubut-ong gipili nga pagkadi-minyo, sa laing bahin, bisan tuod dili hinungdanon sa pagkabalaan o kaluwasan, napamatud-ang magantihon ug makapatagbaw sa espirituwal nga dalan sa kinabuhi alang sa pipila.​—Mateo 19:12.

[Picture Credit Line sa panid 16]

Life