Edukasyon nga May Usa ka Katuyoan
“Hatagi ug kahibalo ang usa nga matarong ug mouswag ang iyang kinaadman.”—PROVERBIO 9:9.
1. Unsay gidahom ni Jehova sa iyang mga alagad mahitungod sa kahibalo?
SI Jehova maoy “usa ka Diyos sa kahibalo.” (1 Samuel 2:3) Ginaedukar niya ang iyang mga alagad. Gitagna ni Moises nga ang mga katawhan sa iyang panahon magaingon bahin sa Israel: “Sa pagkamatuod gayod kining dakong nasod maoy usa ka makinaadmanon ug masinabutong katawhan.” (Deuteronomio 4:6) Ang matuod nga mga Kristohanon kinahanglan nga samang makinaadmanon. Kinahanglan nga sila labing maayong mga tumutuon sa Pulong sa Diyos. Sa pagpakita sa katuyoan nianang pagtuona, si apostol Pablo misulat: “Kami . . . wala mohunong sa pag-ampo alang kaninyo ug sa paghangyo nga unta mapuno kamo sa tukmang kahibalo sa iyang kabubut-on diha sa tanang kaalam ug espirituhanong pagpanabot, aron kamo magkinabuhi nga takos kang Jehova sa katuyoan nga sa hingpit kahimut-an niya samtang kamo magapadayon sa pagpamunga sa tanang maayong buhat ug motubo sa tukmang kahibalo sa Diyos.”—Colosas 1:9, 10.
2. (a) Unsay gikinahanglan aron mabatonan ang tukmang kahibalo sa Diyos? (b) Giunsa pag-atubang sa Nagamandong Lawas sa mga Saksi ni Jehova kining butanga?
2 Ang pagtuon uban sa tumong nga mao ang pagbatog tukmang kahibalo sa Diyos ug sa iyang mga katuyoan nanginahanglan sa labing menos kinagamyang edukasyon. Apan daghang tawong nakadangat sa kahibalo sa kamatuoran sa Pulong sa Diyos nagpuyo diha sa mga nasod diin gamay ra o kaha wala silay kahigayonan sa pagdawat ug hustong sekular nga edukasyon. Sila anaa sa alaot nga kahimtang. Sa pagpukgo sa maong suliran, ang Nagamandong Lawas sa mga Saksi ni Jehova sa daghang katuigan na karon nagpahimangno nga, kon gikinahanglan, ang mga klase sa pagbasa ug pagsulat kinahanglang maorganisar sa mga kongregasyon. Kapig 30 ka tuig kanhi, ang Brazilianong mantalaan nga Diário de Mogi mipatik ug usa ka artikulo nga nag-ulohang “Mga Saksi ni Jehova Nagapakigbugno Batok sa Iliterasiya.” Kana miingon: “Usa ka may-katakos nga instruktor mosugod . . . sa kamapailobon sa pagtudlo sa uban sa pagbasa ug pagsulat. . . . Ang mga tumutuon, tungod sa mga kahimtang mismo nga nagtukmod kanila isip mga ministro sa Diyos, kinahanglan nga magpauswag sa ilang kahibalo sa pinulongan aron makahatag ug mga diskurso.” Busa libolibong tawo sa tibuok kalibotan nahimong makugihong mga estudyante sa Pulong sa Diyos. Sila nagbaton sa maong paninugdang edukasyon nga may hamiling katuyoan sa hunahuna.
Mga Kahanas nga Gikinahanglan Aron Mahimong Epektibong mga Ministro
3, 4. (a) Nganong ang tinuod nga mga Kristohanon interesado sa edukasyon? (b) Unsa ang kahimtang sa Israel, ug unsang paninugdang edukasyon ang kinahanglanon sulod sa atong mga kongregasyon karong adlawa?
3 Interesado sa edukasyon ang tinuod nga mga Kristohanon, dili lamang tungod kay gusto nilang maedukar, kondili aron mahimong labi pang epektibong mga alagad ni Jehova. Gihatag ni Kristo sa tanang Kristohanon ang sugo sa “paghimog mga tinun-an sa katawhan sa tanang nasod, . . . nga magatudlo kanila sa pagbantay sa tanang butang nga akong gisugo.” (Mateo 28:19, 20) Aron sa pagtudlo sa uban, kinahanglan nga sila mismo unang makakat-on, ug nanginahanglan kinig maayong mga paagi sa pagtuon. Kinahanglan nga sila may katakos sa pagtugkad sa Kasulatan. (Buhat 17:11) Aron sa pagtuman sa ilang gisugo nga buluhaton, kinahanglan usab nga sila larinong mobasa.—Tan-awa ang Habakkuk 2:2; 1 Timoteo 4:13.
4 Sumala sa nakita nato sa miaging artikulo, adunay maayong katarongan sa pagtuo nga, sa katibuk-an, bisan mga bata sa karaang Israel mahibalong mobasa ug mosulat. (Maghuhukom 8:14; Isaias 10:19) Ang Kristohanong mga ministro karong adlawa kinahanglang mosulat ug hapsayng mga nota samtang sila magasangyaw sa balay-balay. Sila nagasulat ug mga sulat, nagakuhag mga nota panahon sa mga tigom, ug nagasulat sa mga komento sa ilang tun-anang materyal. Kining tanan nanginahanglan ug mabasang sinulatan. Ang pagtipig ug mga rekord sulod sa Kristohanong kongregasyon sa labing menos nanginahanglan ug paninugdang kahibalo sa aritmetika.
Mga Bentaha sa Tukma nga Pagtungha
5. (a) Unsa ang sinugdanan sa pulong “school” o “tunghaan”? (b) Unsang kahigayonan ang angay pahimuslan sa mga batan-on?
5 Makaiikag, ang pulong “school” o “tunghaan” nagagikan sa Gregong pulong nga skho·leʹ, nga sa sinugdan nagkahulogang “walay buhat” o paggamit sa panahong walay buhat alang sa usa ka ugdang nga buluhaton, sama sa pagtuon. Kini sa ulahi nagkahulogan sa dapit diin pagahimoon ang maong pagtuon. Kini nagpaila nga, sa usa ka panahon, pribilehiyadong matang lamang—sa Gresya ug sa kadaghanan sa ubang kayutaan—ang nagkalingaw sa pagtuon. Ang mamumuo nga matang sa katibuk-an nagpabilin nga walay alamag. Karong adlawa, diha sa kadaghanang nasod ang mga bata ug mga batan-on gihatagag panahon sa pagtuon. Ang mga batan-ong Saksi kinahanglan gayong mopalit sa kahigayonan aron mahimong may-kahibalo ug may-katakos nga mga alagad ni Jehova.—Efeso 5:15, 16.
6, 7. (a) Unsa ang pipila sa mga bentaha sa hustong pagtungha? (b) Sa unsang mga paagi ang pagkat-on ug langyawng pinulongan mahimong puslanon? (c) Unsa ang kahimtang karong adlawa taliwala sa daghang batan-on inigkahuman nila sa pagtungha?
6 Ang paninugdang kahibalo sa kasaysayan, geograpiya, siyensiya, ug uban pa makapahimo sa batan-ong mga Saksi nga timbang nga mga ministro. Ang ilang pagtungha magatudlo kanila dili lamang sa daghang ulohan kondili sa proseso usab sa pagtuon. Ang tinuod nga mga Kristohanon dili mohunong sa pagkakat-on ug sa pagtuon inigbiya nila sa eskuylahan. Hinuon, ang ilang makuha gikan sa ilang pagtuon magdepende pag-ayo sa ilang pagkahibalo kon unsaon pagtuon. Ang sekular ug diha-sa-kongregasyon nga pagtuon makatabang nila sa pag-ugmad sa ilang mga katakos sa panghunahuna. (Proverbio 5:1, 2) Inigbasa nila labaw pa nilang mabatonan ang katakos sa pag-ila kon unsay hinungdanon, kon unsay angay inota ug sag-ulohon.
7 Pananglitan, ang pagkakat-on ug langyawng pinulongan, dili lang mougmad sa katakos sa pangutok sa mga batan-on kondili maghimo usab nilang mas puslanon diha sa organisasyon ni Jehova. Sa pipila sa mga sangang-buhatan sa Watch Tower Society, nadiskobrehan sa pila ka batan-ong igsoon nga may bentaha ang pagkamakasulti o pagkamakabasa nga larino sa Iningles. Dugang pa, ang tanang Kristohanong ministro angay maningkamot nga mahimong maayong molitok sa ilang kaugalingong pinulongan. Ang maayong balita sa Gingharian takos ipahayag diha sa tin-aw, husto-sa-gramarya nga paagi. Ang kamatuoran nagpakita nga sa kalibotan karong adlawa, daghang batan-on sa dihang makahuman sa pag-eskuyla maglisod gihapon sa pagsulat ug pagsulti sa tukmang paagi ug bisan sa pagsolbar sa kinayanohang aritmetika; ug sila nagbaton sa labing gamayng kahibalo bahin sa kasaysayan ug geograpiya.
Igong Edukasyon
8. Unsang mga kasulatan ang nahiangay sa ulohan sa sekular nga edukasyon ug sa katakos sa usa ka tawo sa pagbuhi sa iyang kaugalingon?
8 Busa, maorag haom karon ang paghisgot sa tinamdan sa Kristohanon bahin sa sekular nga edukasyon. Unsang mga prinsipyo sa Bibliya ang angayan sa maong ulohan? Una, sa kadaghanang nasod ang angay nga pagpasakop kang “Cesar” nag-obligar sa Kristohanong mga ginikanan sa pagpaeskuyla sa ilang mga anak. (Marcos 12:17; Tito 3:1) Mahitungod sa batan-ong mga Saksi, diha sa ilang asaynment sa eskuylahan kinahanglan nga hinumdoman nila ang Colosas 3:23, nga nagaingon: “Bisan unsa ang inyong ginabuhat, buhata kana nga tibuok kalag ingon nga ngadto kang Jehova, ug dili ngadto sa mga tawo.” Ang ikaduhang prinsipyong nalangkit mao nga ang mga Kristohanon kinahanglang makabuhi sa ilang kaugalingon, bisan pag sila bug-os-panahong payunir nga mga ministro. (2 Tesalonica 3:10-12) Kon minyo, ang usa ka lalaki kinahanglang makatagana sa tukma alang sa iyang asawa ug mga anak nga basin ipakatawo, uban ang diyutayng kapin nga ikapanghatag sa mga kabos ug sa pagsuportar sa lokal ug tibuok-kalibotang buluhaton sa pagwali.—Efeso 4:28; 1 Timoteo 5:8.
9, 10. (a) Unsa ang morag kiling diha sa daghang nasod? (b) Unsa ang mahimong isipon sa usa ka payunir nga ministro ingong igong suweldo?
9 Unsa ka dakong edukasyon ang kinahanglanon sa usa ka batan-ong Kristohanon sa pagtahod niining mga prinsipyoha sa Bibliya ug sa pagtuman sa iyang Kristohanong mga katungdanan? Magkadaiya kini gikan sa usa ka nasod ngadto sa laing nasod. Sa katibuk-an, hinuon, morag kasagaran nga kiling diha sa daghang nasod mao nga ang gidak-on sa pag-eskuyla nga kinahanglanon aron makasapig desenteng mga suweldo karon maoy mas taas kay sa miaging pila ka tuig. Ang mga taho nga nadawat gikan sa mga sangang-buhatan sa Watch Tower Society sa lainlaing mga bahin sa kalibotan nagpaila nga sa daghang dapit lisod mangitag mga trabahong may desenteng mga suweldo inigkatapos lamang sa kinagamyang edukasyon nga giobligar sa balaod o sa pila ka nasod bisan sa pagkahuman ug hayskul.
10 Unsay ipasabot sa “desenteng mga suweldo”? Wala kini magpasabot sa mga trabahong dagkog suweldo. Ang Webster’s Dictionary nagbatbat sa “decent” o desente niining konstektoha ingong “igo, husto.” Pananglitan, unsa ang “igo” alang sa mga buot mahimong payunir nga mga ministro sa maayong balita? Kana sila sagad nanginahanglan ug inoras nga trabaho aron dili “makapabug-at kaayo” sa ilang mga igsoon o sa ilang pamilya. (1 Tesalonica 2:9) Ang ilang mga suweldo matawag “igo,” o “husto,” kon ang ilang kinitaan magtugot kanila sa pagkinabuhing desente samtang magbilin ug igong panahon ug kusog aron sa pagtuman sa ilang Kristohanong ministeryo.
11. Nganong ang pila ka batan-on mihunong sa payunir nga pag-alagad, ug unsang pangutana ang gipatungha?
11 Kasagaran unsa man ang kahimtang karong adlawa? Gikataho nga sa pila ka nasod daghag maayog-tuyong mga batan-on mihunong sa pag-eskuyla pagkatapos makakompleto sa kinagamyang pag-eskuyla nga gibaod aron mahimong mga payunir. Sila walay kahanas sa panarbaho o sekular nga mga kuwalipikasyon. Kon sila wala tabangi sa pinansiyal sa ilang mga ginikanan, kinahanglang sila mangitag inoras nga trabaho. Ang uban kinahanglang modawat ug mga trabaho nga nanginahanglan sa ilang pagtrabahog daghang oras aron makasapi ug igo aron mabuhi. Kay nahago sa lawas, mihunong sila sa payunir nga ministeryo. Unsay ilang mahimo aron makabuhi sa pinansiyal sa ilang kaugalingon ug makabalik sa payunir nga pag-alagad?
Usa ka Timbang nga Hunahuna Bahin sa Edukasyon
12. (a) Kon bahin sa edukasyon, unsang duha ka hinobrang panghunahuna ang pagalikayan sa usa ka Kristohanon? (b) Alang sa nagpahinungod nga mga alagad ni Jehova ug ilang mga anak, unsang katuyoan ang pagaalagaran sa edukasyon?
12 Makatabang ang usa ka timbang nga hunahuna bahin sa edukasyon. Alang sa daghang batan-on sa kalibotan, ang edukasyon maoy usa ka ilhanan sa dungog, butang nga makatabang nila sa pag-asenso, ang yawi ngadto sa mauswagon, materyalistikanhong paagi sa kinabuhi. Alang sa uban, ang pag-eskuyla maoy usa ka buluhaton nga taposon sa labing madali. Ang bisan hain sa maong mga hunahuna dili angay sa tinuod nga mga Kristohanon. Nan, unsay matawag nga “usa ka timbang nga hunahuna”? Ang mga Kristohanon kinahanglang mag-isip sa edukasyon ingong usa ka paagi nga gamiton sa pagkab-ot sa gitinguhang resulta. Niining kataposang mga adlaw, ang ilang katuyoan mao ang pag-alagad kang Jehova sa labing dako ug sa labing epektibo nga maarangan. Kon, diha sa nasod nga imong gipuy-an, ang kinagamyan o bisan hayskul nga edukasyon mopahinabo lamang nga sila makakitag mga trabaho nga motaganag kulang nga kinitaan aron sa pagbuhi sa ilang kaugalingon ingong mga payunir, nan ang dugang nga edukasyon o pagbansay mahimong palandongon. Kini pagahimoon uban sa tinong tumong nga mao ang bug-os-panahong pag-alagad.
13. (a) Giunsa sa usa ka igsoong babaye sa Pilipinas ang pagpadayon sa iyang payunir nga pag-alagad samtang nagatuman sa iyang pamilyahanong mga katungdanan? (b) Unsang pasidaan ang tukma sa panahon?
13 Ang uban nanguhag nagabansay nga mga kurso nga nagbukas ug kahigayonan sa trabaho nga nakapaarang nila sa pagsulod o pagbalik sa bug-os-panahong pag-alagad. Usa ka igsoong babaye sa Pilipinas mao ang nagbuhi sa pamilya, apan gusto niyang mopayunir. Ang sangang-buhatan mitaho: “Siya nakahimo niini tungod kay nadawat niya ang dugang edukasyon nga nagpakuwalipikar kaniya ingong certified public accountant.” Ang taho sa samang sangang-buhatan miingon: “Kami dunay daghan nga nagatungha ug sa samang panahon nakahikay sa ilang mga eskedyul aron sa pagpayunir. Sa kasagaran sila nahimong mas maayong mga magmamantala kay sila mas makugihon sa pagtuon, basta sila dili mahimong sobra ka ambisyoso sa kalibotanong mga pangagpas.” Ang kataposang komento kinahanglang maghatag kanatog hinungdan sa pagpalandong. Ang katuyoan sa pakaping pag-eskuyla, kon kini maorag kinahanglanon, kinahanglang dili hikalimtan o mausob ngadto sa usa ka materyalistikanhong tumong.
14, 15. (a) Unsang sekular nga edukasyon ang nadawat sa pila ka igsoong may katungdanan, apan unsay nakabawi niini? (b) Nganong walay pagahimoong estriktong mga lagda kon bahin sa edukasyon?
14 Sa pila ka nasod, ang mga tunghaan sa hayskul nagtaganag pagbansayng vocational nga makaandam sa usa ka batan-ong Kristohanon alang sa usa ka kahanas sa panarbaho o trabahong panginabuhi sa panahon sa graduwasyon. Bisan pag dili kini mao ang kahimtang, sa pila ka kayutaan ang pila ka masingkamotong batan-on nga may paninugdan lamang nga ineskuylahan makakitag inoras nga trabaho nga makapaarang nila sa pagkasapi ug igo aron sa pagpayunir. Busa walay estriktong mga balaod ang pagahimoon nga pabor o kontra sa dugang edukasyon.
15 Daghan nga karon nagaalagad sa responsableng mga katungdanan ingong nagapanaw nga mga magtatan-aw, diha sa hedkuwarter sa Sosyedad, o sa usa sa mga sangang-buhatan nagbaton lamang ug paninugdang edukasyon. Sila matinumanong mga payunir, wala gayod mohunong sa pagtuon, nagdawat ug pagbansay, ug gisaligan sa mas dagkong mga responsabilidad. Sila wala magbasol. Sa laing bahin, pipila sa ilang mga kaedad mipalabi sa pagkuhag edukasyon sa unibersidad ug nanghunong sa ilang espirituwal nga pag-uswag, nagpailalom sa nagadaot-sa-pagtuo nga mga pilosopiya ug “kaalam niining kalibotana.”—1 Corinto 1:19-21; 3:19, 20; Colosas 2:8.
Pag-ihap sa Bili
16. (a) Kinsay magahukom kon kaha maayo ang dugang edukasyon, ug unsay angay nga magpatigbabaw sa hunahuna? (b) Unsay angay nga pagatagdon?
16 Kinsa ang magahukom kon kaha ang usa ka batan-ong Kristohanon kinahanglang mokuhag dugang edukasyon o pagbansay? Ang prinsipyo sa pagkaulo sa Bibliya malangkit dinhi. (1 Corinto 11:3; Efeso 6:1) Pinasukad niini ang mga ginikanan seguradong buot magagiya sa ilang mga anak sa pagpilig usa ka kahanas sa panarbaho o trabahong panginabuhian ug niana sa gidak-on sa edukasyon nga kinahanglanon. Sa daghang nasod ang mga pagpili sa edukasyon ug trabaho sa pangabuhi kinahanglang himoon nga sayo sa panahon sa pagtungha sa hayskul. Kana ang panahong ang Kristohanong mga ginikanan ug mga batan-on kinahanglang mangita sa pagtultol ni Jehova sa paghimog maalamong pagpili, uban sa intereses sa Gingharian nga nagpatigbabaw sa hunahuna. Ang mga batan-on adunay lainlaing mga hilig ug mga tinamdan. Ang maalamong mga ginikanan magatagad niini. Ang tanang minatarong nga trabaho maoy madungganon, mahimong kana pakusog nga trabaho o de-opisina. Bisan pag ang kalibotan tingali magbayaw sa trabahong de-opisina ug magatamay sa pagbudlay pinaagi sa mga kamot sa usa, ang Bibliya wala gayod magtamay niana. (Buhat 18:3) Busa sa dihang ang mga ginikanan ug batan-ong mga Kristohanon karong adlawa, human sa mainampingon ug mainampoong pagtimbang sa mga bentaha ug mga disbentaha, magahukom nga pabor o kontra sa pag-eskuyla sa pagkatapos sa hayskul, ang uban sa kongregasyon dili angay magatamay kanila.
17. Unsang pagpili ang ginahimo sa pila ka Saksing mga ginikanan alang sa ilang mga anak?
17 Kon ang Kristohanong mga ginikanan sa pagkaresponsable magahukom sa pagtaganag dugang edukasyon sa ilang mga anak sa pagkatapos sa hayskul, ila kanang katungod. Ang yugto sa maong mga pagtuon magkadaiya sumala sa tipo sa kahanas sa panarbaho o trabaho sa pangabuhi nga palabihon. Tungod sa pinansiyal nga mga hinungdan ug aron makasulod dayon ang ilang mga anak sa bug-os-panahong pag-alagad, gipili sa daghang Kristohanong mga ginikanan alang kanila ang mubog-tagal nga mga kurso sa pag-eskuyla diha sa vocational o teknikal nga mga eskuylahan. Sa pila ka kaso ang mga batan-on kinahanglang mag-aprentis sa usa ka kahanas sa panarbaho apan sa kanunay uban sa tumong nga mao ang tibuok-kinabuhing pag-alagad kang Jehova.
18. Kon kuhaon ang dugang mga kurso, unsay angay pagahinumdoman?
18 Kon mokuhag dugang mga kurso, ang motibo kinahanglan dili ang pagkahimong hawod diha sa eskuylahan o paningkamot alang sa iladong kalibotanong karera. Ang mga kurso kinahanglan nga pilion pag-ayo. Gipasiugda niining magasina ang mga kapeligrohan sa hataas nga edukasyon, ug kana makataronganon, kay ang dagkong hataas nga edukasyon maoy batok sa “maayong pagtulon-an” sa Bibliya. (Tito 2:1; 1 Timoteo 6:20, 21) Dugang pa, sukad sa katuigan sa 1960, daghang tunghaan sa hataas nga edukasyon nahimong sanayanan sa kamalapason ug imoralidad. “Ang matinumanon ug maalamong ulipon” sa kusganon wala magdasig nga mosulod nianang matanga sa palibot. (Mateo 24:12, 45) Hinuon, pagaangkonon nga karong mga adlawa mahibalag sa mga batan-on ang maong samang mga kapeligrohan diha sa mga hayskul ug teknikal nga mga kolehiyo ug bisan sa dapit-trabahoan.—1 Juan 5:19.a
19. (a) Unsang mga panagana ang pagahimoon niadtong mohukom sa pagkuhag dugang mga kurso? (b) Sa unsang paagi gipahimuslan pag-ayo sa pipila ang ilang edukasyon?
19 Kon mahukman ang dugang edukasyon, maayong himoon kini sa usa ka batan-ong Saksi, kon posible, samtang nagapuyo sa balay, sa ingon makapadayon sa normal nga Kristohanong mga batasan sa pagtuon, pagtambong sa tigom, ug sa buluhatong pagsangyaw. Sa sinugdan kinahanglan usab nga himoon ang tukmang pagbarog bahin sa mga prinsipyo sa Bibliya. Angay hinumdoman nga si Daniel ug iyang tulo ka Hebreohanong kauban maoy mga binihag nga nadistiyero sa gipugos sila sa pagkuhag abanteng mga pagtuon sa Babilonya, apan padayon nilang gihuptan ang integridad. (Daniel, kapitulo 1) Samtang giuna ang espirituwal nga intereses, ang batan-ong mga Saksi sa ubay-ubayng kanasoran nagkuhag mga kurso aron sa pagsangkap sa ilang kaugalingon alang sa inoras nga trabaho ingong accountants, hanas nga mga trabahante, mga magtutudlo, mga maghuhubad, mga interpreter, o sa ubang mga trabaho sa pangabuhi nga magsuportar nga igo kanila sa ilang pangunang karera sa pagkapayunir. (Mateo 6:33) Ubay-ubay nianang mga batan-ona sa ulahi nahimong mga nagapanawng magtatan-aw o mga boluntaryo sa Bethel.
Usa ka Nahiusa, Edukadong Katawhan
20. Unsang kalibotanong pagkainila ang walay dapit sa katawhan ni Jehova?
20 Taliwala sa katawhan ni Jehova, kon kaha ang trabahong pangabuhi sa usa ka tawo maoy de-opisina, pakusog, pag-uma, o mga pag-alagad sa uban, ang tanan kinahanglan nga makugihong mga estudyante sa Bibliya ug may-katakos nga mga magtutudlo. Ang mga kahanas nga mabatonan sa tanan diha sa pagbasa, pagtuon, ug pagtudlo lagmit magwagtang sa kalainan nga ginahimo sa kalibotan tali sa pakusog ug de-opisinang mga trabahante. Kini mosangpot sa panaghiusa ug sa mutuwal nga pagtahod nga ilabinang dayag taliwala sa boluntaryong mga trabahante sa mga balayng Bethel ug sa mga dapit sa konstruksiyon sa Watch Tower Society, diin ang espirituhanong mga hiyas maoy labing bililhon ug gikinahanglan sa tanan. Dinhi, ang sinating mga kawani sa opisina nagatrabahong malipayon kauban sa hanas nga mga trabahante, nga gipasundayag sa tanan ang mapabilhon nga gugma sa usag usa.—Juan 13:34, 35; Filipos 2:1-4.
21. Kinahanglang unsa ang tumong sa batan-ong mga Kristohanon?
21 Mga ginikanan, giyahi ang inyong mga anak padulong sa tumong nga mahimong mapuslanong mga sakop sa bag-ong kalibotan nga kapunongan! Batan-ong mga Kristohanon, gamita ang inyong mga kahigayonan sa edukasyon ingong paagi sa pagsangkap kaninyo aron sa paghupot nga mas bug-os pa sa inyong mga pribilehiyo sa pag-alagad kang Jehova! Ingong mga tinudloan, hinaot kamong tanan mapamatud-an nga nasangkapan-pag-ayong mga sakop sa teokratikanhong kapunongan karon ug sa walay kataposan diha sa gisaad sa Diyos nga “bag-ong yuta.”—2 Pedro 3:13; Isaias 50:4; 54:13; 1 Corinto 2:13.
[Footnote]
a Tan-awa usab ang The Watchtower sa Septiyembre 1, 1975, mga panid 542-4.
Tigia ang Imong Memorya
◻ Nganong ang tinuod nga mga Kristohanon interesado sa edukasyon?
◻ Unsang hinobrang mga panghunahuna bahin sa edukasyon ang pagalikayan sa tinuod nga mga Kristohanon?
◻ Unsang mga kapeligrohan sa dugang edukasyon ang pagatagdon, ug unsang mga panagana ang pagahimoon?
◻ Unsang kalibotanong pagkainila ang walay dapit sa katawhan ni Jehova?
[Hulagway sa panid 16]
Pinaagi sa makugihong pagtuon, ang batan-ong mga Kristohanon mahimong labi pang puslanong mga sakop sa bag-ong kalibotan nga kapunongan
[Hulagway sa panid 19]
Ang dugang edukasyon, kon palabihon, angay itukmod sa tinguha nga labaw pang maalagaran si Jehova