Epektibong Pagpanambag

ANG Kristohanong mga ansiyano kinahanglang “makatambag pinaagi sa makapahimsog nga pagtulon-an.” (Tito 1:9) Usahay kini kinahanglang himoon samtang nag-atubang ug lisod kaayong mga kahimtang. Hinungdanon nga mohatag ug tambag nga nahiuyon sa Kasulatanhong mga lagda. Busa, ang mga ansiyano kinahanglang mamati sa tambag: “Magmakugihon . . . sa pagpanambag.” (1 Tim. 4:13) Bisan pag ang atong paghisgot dinhi sa panguna gitumong sa mga ansiyano o niadtong nagapangab-ot sa maong pribilehiyo, may mga panahong ang mga ginikanan kinahanglang magtambag sa ilang mga anak o kadtong nagdumalag mga pagtuon sa Bibliya angayng magtambag sa ilang mga estudyante sa Bibliya. Sa maong mga kahimtang, ang susamang mga lagda mapadapat.

Mga Kahimtang nga Nagkinahanglan sa Pagpanambag. Aron matino kon kanus-a kinahanglan ang pagpanambag, makatabang ang pagsusi sa mga kahimtang nga natala sa Bibliya diin gihatag ang pagpanambag. Si apostol Pedro nagtambag sa mga ansiyano nga magtagad sa ilang responsabilidad ingong mga magbalantay sa panon sa Diyos. (1 Ped. 5:​1, 2) Gitambagan ni Pablo si Tito nga tambagan ang batan-ong mga lalaki nga ‘magbaton ug maayong panghunahuna.’ (Tito 2:6) Si Pablo miawhag sa mga isigka-Kristohanon nga “magasulti nga may panagkauyon” ug likayan kadtong nagtinguha nga magpahinabog mga pagkabahin taliwala sa mga igsoon. (1 Cor. 1:10; Roma 16:17; Filip. 4:2) Bisan pag si Pablo nagdayeg sa mga membro sa kongregasyon sa Tesalonica tungod sa maayong mga butang nga ilang gibuhat, iyang gitambagan sila nga ipadapat nga mas bug-os pa ang instruksiyong ilang nadawat. (1 Tes. 4:​1, 10) Si Pedro nangaliyupo sa mga isigka-Kristohanon nga ‘magpadayon sa pag-ayad sa unodnong mga tinguha.’ (1 Ped. 2:11) Gitambagan ni Judas ang iyang mga igsoon nga “kusganong makigbugno alang sa pagtuo” tungod sa impluwensiya sa mga tawong dili diyosnon nga nagpatuyang sa malaw-ay nga panggawi. (Jud. 3, 4) Ang mga Kristohanon sa katibuk-an giawhag nga magtinambagay sa usag usa aron walay magmatig-a tungod sa malimbongong gahom sa sala. (Heb. 3:13) Gitambagan ni Pedro ang mga Hudiyo nga wala pa magtuo kang Kristo: “Luwasa ninyo ang inyong kaugalingon gikan niining baliko nga kaliwatan.”​—Buh. 2:40.

Unsang mga hiyas ang gikinahanglan aron makapanambag sa maong mga kahimtang? Sa unsang paagi ang usang nagatambag makapahimo sa iyang pangaliyupo nga mahinungdanon kaayo nga dili siya magmalupigon o mag-inisog?

“Pinasukad sa Gugma.” Kon ang atong pagpanambag dili himoon “pinasukad sa gugma,” basin kana daw estriktong paminawon. (Filem. 9) Tinuod, kon gikinahanglan ang dihadihang paglihok, ang pagpahayag sa mamumulong angayng magpadayag sa pagkadinalian sa kahimtang. Ang lumo-ug-tingog nga paagi daw nangayog pasaylo nga paminawon. Sa samang higayon, ang pagpangaliyupo angayng himoon sa katim-os ug may empatiya. Ang mahigugmaong pangaliyupo lagmit mopalihok sa mamiminaw. Sa dihang namulong alang sa iyang kaugalingon ug sa iyang mga kauban, gisultihan ni Pablo ang mga taga-Tesalonica: ‘Kamo nahibalo pag-ayo kon sa unsang paagi, ingon sa ginahimo sa usa ka amahan sa iyang mga anak, kami nagpadayon sa pagtambag sa matag usa kaninyo.’ (1 Tes. 2:11) Kadtong Kristohanong mga magtatan-aw nangaliyupo sa mga igsoon uban sa gugma. Himoang ang imong mga pulong mogawas gumikan sa tinuod nga kabalaka alang sa imong mga tigpatalinghog.

Magmataktikanhon. Ayawg supaka kadtong gipaningkamotan nimo nga dasigon sa paglihok. Sa samang higayon, ayaw pugngi ang pagsulti sa imong mamiminaw sa “tanang gimbut-an sa Diyos.” (Buh. 20:27) Ang mapabilhong mga tawo dili masilo o matibhangan ang ilang gugma kanimo tungod kay ikaw malulotong nag-awhag kanila sa pagbuhat kon unsay matarong.​—Sal. 141:5.

Kasagaran, mapuslanon nga paunhan ang pagpanambag ug espesipiko, sinserong pagdayeg. Hunahunaa ang maayong mga butang nga ginabuhat sa imong mga igsoon​—mga butang nga gikahimut-an pag-ayo ni Jehova: ang pagtuo nga gipadayag diha sa ilang buluhaton, ang gugma nga nagtukmod kanila sa pagpanlimbasog, ug ang ilang paglahutay bisan pa sa masulayong mga kahimtang. (1 Tes. 1:2-8; 2 Tes. 1:3-5) Kini motabang sa imong mga igsoon sa pagbati nga gipabilhan ug nasabtan ug ang ilang hunahuna mahimong madinawaton sa pangaliyupo nga sunod ipahayag.

“Uban sa Tanang Hataas-nga-Pailob.” Ang pagpanambag angayng ihatag “uban sa tanang hataas-nga-pailob.” (2 Tim. 4:2) Unsay nalangkit niini? Ang hataas-nga-pailob naglakip sa mapailobong pag-antos sa daotang buhat o sa paghagit aron sa pagkasuko. Ang usang may hataas-nga-pailob naglaom nga ang iyang mga tigpatalinghog magpadapat sa iyang isulti. Ang pagpanambag diha sa maong espiritu mopugong sa imong mga tigpatalinghog sa paghunahuna nga giisip mo ang labing daotan bahin kanila. Ang imong pagsalig nga ang imong mga igsoong lalaki ug babaye buot moalagad kang Jehova kutob sa ilang maarangan motandog sa ilang tinguha sa pagbuhat kon unsay matarong.​—Heb. 6:9.

“Pinaagi sa Makapahimsog nga Pagtulon-an.” Sa unsang paagi ang usa ka ansiyano “makatambag pinaagi sa makapahimsog nga pagtulon-an”? Pinaagi sa ‘hugot nga pagpangupot sa kasaligang pulong kon bahin sa iyang arte sa pagpanudlo.’ (Tito 1:9) Inay ipahayag ang imong personal nga opinyon, himoa ang Pulong sa Diyos nga mao ang gahom sa imong pangaliyupo. Himoa nga ang Bibliya makatabang kanimo sa pagsabot kon unsay kinahanglang isulti. Itala ang mga kaayohan sa pagpadapat kon unsay giingon sa Bibliya bahin sa butang nga imong gikabalak-an. Ibutang gayod sa hunahuna ang mga sangpotanan​—pagkakaron ug sa umaabot—​sa dili pagsunod sa Pulong sa Diyos, ug gamita kini sa pagkombinsir sa imong mamiminaw nga kinahanglang himoon ang angayang paglihok.

Tinoa nga imong ipatin-aw ngadto sa imong mamiminaw kon unsay ilang buhaton ug kon unsaon nila pagbuhat kana. Ipatin-aw nga ang imong pangatarongan lig-ong gipasukad sa Kasulatan. Kon ang Kasulatan nagtugot ug diyutayng kagawasan sa bisan unsang desisyong pagahimoon, ilaraw ang gidak-on sa maong kagawasan. Unya, sa imong konklusyon, himoa ang kataposang pagpangaliyupo nga makapalig-on sa determinasyon sa imong mga tigpatalinghog sa paglihok.

Uban sa “Kagawasan sa Pagsulti.” Aron makatambag sa uban nga epektibo, ang usa kinahanglang adunay “kagawasan sa pagsulti diha sa pagtuo.” (1 Tim. 3:13) Unsay makapaarang sa usa ka tawo sa pagsulting gawasnon? Ang kamatuoran nga ang iyang “panig-ingnan sa maayong mga buhat” nahiuyon sa iyang gitambag nga buhaton sa iyang mga igsoon. (Tito 2:​6, 7; 1 Ped. 5:3) Kon kini mao ang kahimtang, kadtong mga giawhag nga molihok makaamgo nga ang usang nagtambag kanila dili magdahom nga buhaton nila ang kon unsay wala niya mismo buhata. Masabtan nila nga sila makasundog sa iyang pagtuo maingon nga siya naningkamot sa pagsundog kang Kristo.​—1 Cor. 11:1; Filip. 3:17.

Ang pagpanambag nga gipasukad sa Pulong sa Diyos ug gihatag sa mahigugmaong paagi may dakong mahimo nga kaayohan. Kadtong gisaligan sa kaakohan sa paghatag sa maong pagpanambag angayng manlimbasog mismo sa pagbuhat nianang maayo.​—Roma 12:8.