Gituman Nila ang Kabubut-on ni Jehova

Gigantihan ang Pagtuo sa mga Ginikanan

ALANG sa mga Israelinhon, ang pagkatawo sa usa ka batang lalaki maoy hinungdan sa dakong pagmaya. Kana nagkahulogan nga ang linya sa kaliwat magpadayon ug ang panulondon nga yuta magpabilin diha sa pamilya. Apan sa mga tuig 1593 W.K.P., ang pagpanganak ug usa ka anak lalaki daw usa ka tunglo inay panalangin ngadto sa mga Hebreohanon. Ngano? Tungod kay ang Paraon sa Ehipto, nga nahadlok sa kusog nga pagdaghan sa populasyon sa mga Hudiyo diha sa teritoryo nga ilalom sa iyang pagmando, nagsugo nga ang tanan nilang bag-ong natawo nga mga lalaki pagapatyon.​—Exodo 1:​12, 15-22.

Maoy panahon niining linuog nga pagsulay sa pagpuo sa kaliwat nga si Amram ug Jochebed, usa ka Hebreohanong magtiayon, nahimong mga ginikanan sa usa ka ambongang batang lalaki. Sayon lang handurawon kon sa unsang paagi ang ilang kangaya nahawngan sa kahadlok sa dihang ilang nahinumdoman ang sugo ni Paraon. Bisan pa niana, samtang gitan-aw ni Amram ug Jochebed ang ilang batang lalaki, hugot silang mihukom nga dili siya pasagdan, bisan unsa pay mahitabo.​—Exodo 2:​1, 2; 6:20.

Paglihok Pinaagi sa Pagtuo

Sulod sa tulo ka bulan si Amram ug Jochebed nagtago sa ilang batang lalaki. (Exodo 2:2) Hinunoa, peligroso kadto sanglit dug-ol ra ang mga pinuy-anan sa mga Hebreohanon ug mga Ehiptohanon. Si bisan kinsa nga nakaplagang misulay sa pagsupak sa sugo ni Paraon kalagmitang silotan ug kamatayon​—ug ang bata mamatay usab. Nan, unsay mahimo niining debotadong mga ginikanan aron sila ug ang ilang anak magpabiling buhi?

Si Jochebed nanguha ug pipila ka linghod nga punoan sa papiro. Ang papiro maoy usa ka lig-on nga sagbot, nga susama sa kawayan, ug adunay tulo-ug-kilid nga punoan nga halos sama ka baga sa tudlo. Mahimong moabot ug 6 ka metros ang gitas-on niini. Ang mga Ehiptohanon naggamit niining tanoma sa paghimog papel, mga banig, mga layag, mga sandalyas, ug gaan nga mga sakayan.

Si Jochebed mihimo ug usa ka takupis gikan sa mga punoan sa papiro nga may igong gidak-on nga kasudlan sa iyang bata. Unya iyang gibulitan ug balaw ug alkitran aron dili mabungkag ang takupis ug aron dili mosulod ang tubig. Unya gipahiluna ni Jochebed ang iyang bata sa sulod sa takupis ug gibutang kini sa kabugangan ubay sa tampi sa Subang Nilo.​—Exodo 2:3.

Nakaplagan ang Bata

Ang anak babaye ni Jochebed, si Miriam, nagtindog sa duol sa pagtan-aw kon unsay sunod nga mahitabo. Unya ang anak babaye ni Paraon midulhog sa Nilo aron maligo.a Lagmit nasayod si Jochebed nga ang prinsesa nagkanunayan niining bahina sa Nilo ug gituyo pagbilin ang takupis diin dali ra kining makaplagan. Bisan unsa pa, ang anak babaye ni Paraon sa wala madugay nakakita sa takupis nga nahimutang sa kabugangan, ug iyang gitawag ang usa sa iyang mga sulugoon aron kuhaon kana. Sa dihang nakita niya ang naghilak nga bata sa sulod, natandog ang iyang pagbati. Iyang nasabtan nga kini usa ka batang Hebreohanon. Apan, makaako ba siya sa pagpapatay sa ingon ka ambongang bata? Gawas pa sa tawhanong kalulot, ang anak babaye ni Paraon lagmit naimpluwensiyahan sa popular nga Ehiptohanong tinuohan nga ang pagdawat sa langit nagdepende sa usa ka talaan sa malulotong mga buhat panahon sa pagkinabuhi sa usa.b​—Exodo 2:​5, 6.

Si Miriam, kinsa nagtan-aw gikan sa halayo, miduol sa anak babaye ni Paraon. “Molakaw ba ako sa pagtawag kanimo ug usa ka iwa sa mga babaye nga Hebreohanon aron magapasuso sa bata alang kanimo?” siya nangutana. Ang prinsesa mitubag: “Lakaw!” Unya si Miriam nagdali pag-adto sa iyang inahan. Sa wala madugay, si Jochebed nagbarog sa atubangan sa anak babaye ni Paraon. “Dad-a kining bataa uban kanimo ug alimahan mo siya alang kanako,” miingon ang prinsesa kaniya, “ug ako mismo magasuhol kanimo.” Kalagmitan kaayo nga niining panahona ang anak babaye ni Paraon nakaamgo nga si Jochebed mao ang inahan sa bata.​—Exodo 2:​7-9, potnot.

Gihuptan ni Jochebed ang iyang anak hangtod nga siya nalutas.c Naghatag kini kaniya ug daghang bililhong mga kahigayonan sa pagtudlo kaniya mahitungod sa matuod nga Diyos, si Jehova. Unya gidala pagbalik ni Jochebed ang bata ngadto sa anak babaye ni Paraon, kinsa nagngalan sa bata nga Moises, nga nagkahulogang “giluwas gikan sa tubig.”​—Exodo 2:10.

Pagtulon-an Alang Kanato

Si Amram ug Jochebed nagpahimulos pag-ayo sa mubong kahigayonan nga ilang nabatonan sa pagtudlo sa ilang anak lalaki sa mga prinsipyo sa putling pagsimba. Ang mga ginikanan karong adlawa kinahanglang mohimo sa ingon. Sa pagkatinuod, kinahanglang buhaton nila kana. Si Satanas nga Yawa “nagasuroysuroy sama sa usa ka leon nga nagangulob, nga nagapangita ug usa nga matukob.” (1 Pedro 5:8) Buot niyang biktimahon ang bililhong mga batan-on​—mga lalaki ug babaye​—nga adunay paglaom nga mahimong maayong mga alagad ni Jehova. Ang ilang linghod nga katuigan dili magpukaw sa iyang simpatiya! Tungod niini, ang maalamong mga ginikanan nagbansay sa ilang masusong mga anak sa pagkahadlok sa matuod nga Diyos, si Jehova.​—Proverbio 22:​6; 2 Timoteo 3:​14, 15.

Sa Hebreohanon 11:​23, ang paningkamot ni Amram ug Jochebed sa pagtago sa ilang masuso sulod sa unang tulo ka bulan sa iyang kinabuhi gisulat ingong buhat sa pagtuo. Kining mahinadlokon-sa-Diyos nga mga ginikanan nagpasundayag ug pagsalig sa gahom ni Jehova sa pagluwas pinaagi sa dili pagpasagad sa ilang anak, ug tungod niini sila gipanalanginan. Kita usab kinahanglang magpakita ug bug-os nga pagsunod sa mga balaod ug mga prinsipyo ni Jehova, nga masaligon nga bisan unsay itugot ni Jehova nga mahitabo kanato sa ngadtongadto mosangpot sa atong walay-kataposang kaayohan ug kalipay.​—Roma 8:28.

[Mga footnote]